Vokalçılarımız qalib olublar

Latviyanın paytaxtında gənc vokalçıların beynəlxalq "Riqa Symphony-2013" festivalı keçirilib. Müsabiqədə 20-dən çox ölkədən solistlər və ansambllar çıxış edib. Münsiflər heyətinin işində və festivalın ustad dərslərində iştirak etmək üçün ABŞ, Britaniya, İtaliya, Rusiya və digər ölkələrin tanınmış pedaqoq və vokalçıları Riqaya dəvət edilib.

Vokalçıların bu müsabiqəsində Azərbaycanı Bülbül adına Orta İxtisas Musiqi Məktəbinin yetirmələrindən Mərziyə Hüseynova, Ellara Əliyeva, Sona İsgəndərli və Çinarə Əzimova təmsil ediblər. Kollektivin rəhbəri Mədəniyyət və İncəsənət Universitetinin Vokal kafedrasının dosenti, fəlsəfə doktoru İradə Xəlilovadır.

Maraqlıdır ki, müsabiqənin "Qran-pri"sini VI sinif şagirdi Çinarə Əzimova qazanıb. O, akademik vokal nominasiyasında "Laçın" xalq mahnısını ifa edib.

Qala-konsertdə Mərziyə Hüseynova (X sinif şagirdi) "Evləri var xana-xana" xalq mahnısını, Ellara Əliyeva (VIII sinif şagirdi) "Elə demə, zalım yar", Sona İsgəndərli isə "Kəklik" nəğmələrini ifa edərək mükafata layiq yerləri tutublar.

Azərbaycan.-2013.-14 dekabr.-S.7.