«Dövlət idarəçiliyində varislik, novatorluq və dinamizm. İlham Əliyevin prezidentlik fəaliyyətinin xronikası: rəsmi qəbul və səfərlərin icmalı (2008-2013-cü illər)» dördcildliyinin yeni nəşr olunmuş III və IV cildlərinin təqdimatı

Dekabrın 18-də Azərbaycan Respublikasının Prezidenti yanında Dövlət İdarəçilik Akademiyası (DİA) tərəfindən hazırlanmış "Dövlət idarəçiliyində varislik, novatorluq və dinamizm. İlham Əliyevin prezidentlik fəaliyyətinin xronikası: rəsmi qəbul və səfərlərin icmalı (2008-2013-cü illər)" dördcildliyinin yeni nəşr olunmuş III və IV cildlərinin təqdimatı keçirilmişdir.

AzərTAc xəbər verir ki, bu cildlərdə Prezident İlham Əliyevin fəaliyyətinin son beş illik dövrünün xronikası geniş şəkildə əksini tapmışdır. Kitabın III cildi Azərbaycan Prezidentinin siyasi fəaliyyətinin 2008-ci ilin oktyabrından 2010-cu ilədək, IV cildi isə 2011-ci ildən 2013-cü ilin martınadək olan dövrünü əhatə edir.

Təhsil Nazirliyi tərəfindən dərs vəsaiti kimi tövsiyə olunmuş kitabın elmi redaktoru Prezident Administrasiyasının rəhbəri, akademik Ramiz Mehdiyev, rəyçisi tarix elmləri doktoru, professor Əli Həsənov, tərtibçiləri akademik Urxan Ələkbərov, siyasi elmlər doktoru, professor Elman Nəsirov, siyasi elmlər üzrə fəlsəfə doktoru Elçin Əhmədovdur.

DİA-nın rektoru, akademik Urxan Ələkbərov əsərin əhəmiyyətini vurğulayaraq bu materiallardan tədrisdə də geniş istifadə olunduğunu qeyd etmişdir. Rektor bu istiqamətdə tədqiqatların hazırda da davam etdirildiyini demişdir. Bildirilmişdir ki, geniş oxucu auditoriyasının, politoloqların, tarixçilərin, o cümlədən xarici siyasət məsələləri ilə məşğul olan mütəxəssislərin marağına səbəb olacaq bu cildlər gələcək tədqiqatlar baxımından da dəyərli mənbədir.

Azərbaycan Respublikası Prezidenti Administrasiyasının humanitar siyasət məsələləri şöbəsinin müdiri Fatma Abdullazadə çıxışında dövlətimizin başçısı İlham Əliyevin fəaliyyəti ilə daim Heydər Əliyev siyasətinə varisliyini nümayiş etdirdiyini bildirmişdir. Şöbə müdiri demişdir ki, məhz bu sadiqliyin nəticəsində Heydər Əliyev siyasəti bu gün Azərbaycanda yaşayır, inkişaf etdirilir və uğurlar qazanır.

Heydər Əliyev siyasətinin üç amilinin bu varislik prinsiplərində necə yaşamasını şərh edən Fatma Abdullazadə ulu öndərin ən müdrik addımlarından birinin "Əsrin müqaviləsi"nin imzalanması olduğunu bildirmişdir. "Əsrin müqaviləsi" iqtisadi addımdan daha çox siyasi layihədir, çünki bu, ilk növbədə Heydər Əliyevin siyasi iradəsinin ifadəsi idi. Dünən hamımız bunun nə dərəcədə uğurlu layihə olmasını bir daha müşahidə etdik. Şöbə müdiri dekabrın 17-də Bakıda "Şahdəniz-2" üzrə yekun investisiya qərarının imzalanmasını bu varisliyin inkişaf etdirilməsinin və yüksək səviyyəyə çatdırılmasının bariz nümunəsi kimi dəyərləndirmişdir. Bildirilmişdir ki, 1994-cü ildə "Əsrin müqaviləsi" bizi zülmətdən, ümidsizlikdən işığa çıxarmışdır. Dekabrın 17-də imzalanan sənədlər isə Azərbaycanın nəinki bu nurla özünü kifayət qədər təmin etməyə, hətta öz işığından, imkanlarından başqalarına da pay verməyə qadir olduğunu göstərmişdir.

Fatma Abdullazadə diqqətə çatdırmışdır ki, ulu öndər Heydər Əliyev siyasətinin ikinci mühüm cəhəti onun humanizm ideyalarından mayalanmış bir siyasət olmasıdır. Ulu öndərin müstəqillik dövründə hakimiyyətdə olduğu on il ərzində sovet dövründə ölkəmizə rəhbərliyi illərində bünövrəsini qoyduğu siyasəti davam etdirmiş, Azərbaycan xalqının mədəni irsini özünə qaytarmışdır. Məhz onun hakimiyyəti illərində iki yubiley, - Füzulinin 500, "Kitabi-Dədə Qorqud" dastanının 1300 illik yubileyləri dünya miqyasında, UNESCO səviyyəsində keçirilmişdir. Sovet dövründə ixtisar olunmuş, zəngin ədəbi irsi ikicildliyə yerləşdirilmiş Füzuli böyük bir şair, o cümlədən mənəvi dəyərlərimizin, İslam dəyərlərinin daşıyıcısı kimi Azərbaycan xalqına qaytarılmışdır.

Azərbaycanda bu gün həmin humanist siyasətin uğurla həyata keçirildiyini vurğulayan Prezident Administrasiyasının şöbə müdiri dövlət başçısının bir neçə gün əvvəl Bakıda "Kitabi-Dədə Qorqud" abidəsinin və parkının açılışında iştirak etdiyini vurğulamışdır.

Müasir informasiya cəmiyyətində insan intellektinin ən böyük sərvət olduğunu bildirən F.Abdullazadə məhz bu baxımdan Prezident İlham Əliyevin öz fəaliyyətində "qara qızıl"ı insan kapitalına çevirmək prinsipini rəhbər tutduğunu qeyd etmişdir. Bu prinsip son on ildə ən əsas, işlək şüarlardan biri olmuşdur. Bunu Azərbaycan gənclərinin xaricdə təhsil almasının maliyyələşdirilməsində daha aydın görmək olar.

Sonuncu amilin dinamizm olduğunu diqqətə çatdıran F.Abdullazadə bu cəhətin Prezident İlham Əliyevin fəaliyyətində ən əsas istiqamətlərdən birinə çevrildiyini qeyd etmişdir. Bu, ilk növbədə dövlət başçısının şəxsiyyətindən, siyasi məfkurəsindən irəli gələn dinamizmdir. Həm varislik, həm də novatorluq özünü Azərbaycan Prezidentinin fəaliyyətindəki dinamizmdə əyani sürətdə nümayiş etdirir.

Prezident Administrasiyasının şöbə müdiri dövlət başçısı İlham Əliyevin siyasi fəaliyyətini əks etdirəcək yeni cildlərin hazırlanacağına əminliyini diqqətə çatdıraraq kitabın ərsəyə gəlməsində əməyi olanlara təşəkkürünü bildirmişdir.

Prezident Administrasiyasının ictimai-siyasi məsələlər şöbəsinin müdiri Əli Həsənov çıxış edərək ulu öndər Heydər Əliyevin ölkəmizdə müasir müstəqil dövlət quruculuğu ilə yanaşı, dövlət idarəçilik təliminin də əsasını qoyduğunu vurğulamışdır. Bildirilmişdir ki, Azərbaycan mədəniyyətini, adət-ənənələrini, azərbaycançılığı xarakterizə edən dəyərlər, onların sistemləşdirilmiş idarəçiliyin əsasında dayanması, novatorluq, dinamizm ümummilli lider Heydər Əliyevin dövlət idarəçilik təlimini xarakterizə edən əsas amillərdir. Şöbə müdiri həmin dövlət idarəçilik təliminin ölkəmizdə bu gün də araşdırıldığını bildirmişdir. Bu gün Azərbaycan dövləti həmin təlimdən istifadə olunaraq idarə edilir. Ona görə də bu təlimin salnaməsinin yaradılması, təhlil olunması, ayrı-ayrı xarakterik xüsusiyyətlərinin ümumiləşdirilməsi və geniş oxucu kütləsinə çatdırılması böyük aktuallıq kəsb edir.

Ümummilli lider Heydər Əliyevin dövlət idarəçilik təliminin Azərbaycan xalqının milli iradəsinə söykəndiyini qeyd edən Əli Həsənov ulu öndərin bu məsələni Azərbaycanın müstəqilliyinin qorunması, milli birliyin dövlətimizin əsas prinsiplərindən birinə çevrilməsi baxımından mühüm ideya kimi irəli sürdüyünü vurğulamışdır. Ümummilli liderin irəli sürdüyü ikinci prinsip sosial ədalət idi. Yəni, haqlının hüquqlarının dövlət tərəfindən qorunması Heydər Əliyevin idarəçiliyinin əsas prinsiplərindən biri idi. Azərbaycanda 1991-1993-cü illərdə xaosun, anarxiyanın hökm sürdüyünü xatırladan Əli Həsənov belə şəraitdə Heydər Əliyevin dövlətçilik təliminin əsas şərtlərindən birinin hüquqi dövlət, demokratiya prinsipləri olduğunu bildirmişdir. Ümummilli lider Heydər Əliyev müstəqil Azərbaycan dövlətinin qurulmasının əsas prinsipləri sırasında demokratiya, siyasi plüralizm məsələsini irəli sürdü.

Şöbə müdiri ümummilli lider Heydər Əliyevin təliminin əsas tərkib hissələrindən birinin də səmərəli dövlət idarəçiliyi sisteminin yaradılması olduğunu vurğulayaraq Prezident İlham Əliyevin siyasi fəaliyyətində dövlət idarəçiliyinin səmərəliliyini, əhalidən gələn düşüncələrin qəbul edilməsini, onların sintezinin aparılmasını və tətbiqini diqqət mərkəzində saxladığını bildirmişdir. Azərbaycanda Prezident İlham Əliyevin yürütdüyü siyasətin müvəffəqiyyət qazanmasının təməlində bir tərəfdən səmərəli idarəçiliyin, digər tərəfdən isə həmin idarəçiliyin xalq tərəfindən dəstəklənməsi, insanların iradəsinə söykənməsi olduğunu vurğulayan Əli Həsənov bu amilin özünü məhz varislikdə, novatorluqda və dinamizmdə göstərdiyini bildirmişdir.

Bu gün Prezident İlham Əliyevin ulu öndər Heydər Əliyev siyasətini novatorluqla davam etdirdiyini deyən Əli Həsənov bu siyasət nəticəsində qazanılan uğurlardan söhbət açmışdır. Qeyd olunmuşdur ki, Prezident İlham Əliyev 2008-ci ildə ölkəmizdə keçid dövrünün artıq başa çatdığını və Azərbaycanı qarşıda yeni hədəflərin gözlədiyini bəyan etmişdir. "Azərbaycan 2020: gələcəyə baxış" İnkişaf Konsepsiyasında keçid dövründən sonra yeni tələblərə novatorcasına yanaşmaq, modernləşmənin Azərbaycan variantı, qloballaşmada milli hisslərin, ənənələrin, varlığın qorunması məsələləri əksini tapmışdır. Qloballaşma şəraitində hər bir millət özünəməxsus dəyərləri qorumalıdır. Bu baxımdan novatorluq milli dəyərləri inkişaf etdirməyi, onu dünyanın mövcud texnologiyaları, inkişafı ilə zənginləşdirməklə rəqabətə davamlı xalq formalaşdırmağı ehtiva edir.

Şöbə müdiri nəşrin Prezident İlham Əliyevin çıxışlarını, nitqlərini, görüşlərini əks etdirməklə tədqiqatçılara dövlət başçısının idarəçiliyinin varislik, novatorluq və dinamik cəhətlərini təhlil etməyə imkan yaratdığını demişdir. Kitabın Dövlət İdarəçilik Akademiyasının təşəbbüsü ilə hazırlandığını qeyd edən şöbə müdiri nəşrin ərsəyə gəlməsində əməyi olanlara təşəkkürünü bildirmişdir.

Kitabda Azərbaycan Dövlət Teleqraf Agentliyinin (AzərTAc-ın) materiallarından da geniş istifadə edildiyini vurğulayan Əli Həsənov agentliyin əməkdaşlarının fəaliyyətini yüksək qiymətləndirmişdir. Bu salnaməni yazıb ortaya çıxaran AzərTAc-ın jurnalistləridir. AzərTAc-ın əməkdaşları Prezident İlham Əliyevin görüşlərini, səfərlərini geniş işıqlandırırlar. Bu cildlərdəki materialların əksəriyyəti AzərTAc-ın informasiyaları əsasında hazırlanmışdır.

Milli Məclis Sədrinin müavini Bahar Muradova Azərbaycan Prezidentinin fəaliyyətini əks etdirən belə bir toplunun nəşr olunmasının əhəmiyyətini vurğulayaraq dövlət başçısının siyasətinin ölkə vətəndaşlarında böyük məmnunluq doğurduğunu, onların həyatına müsbət təsir göstərdiyini demişdir.

Bahar Muradova bildirmişdir ki, ümummilli lider Heydər Əliyev təliminin, siyasətinin əsas qayəsi Azərbaycan vətəndaşıdır. Müstəqilliyin birinci on ilində dövlətin qarşısında duran əsas məqsəd Azərbaycan vətəndaşının təhlükəsizliyinin, sosial ehtiyacının təmin edilməsi, onlarda öz hüquqlarını qorumaq vərdişlərini formalaşdırmaq idisə, son on ildə - İlham Əliyevin prezidentliyi dövründə hədəf artıq Azərbaycan vətəndaşının rifah içərisində yaşaması, onun dünya insanı ilə birlikdə qlobal çağırışlara hazır olması, öz mövqeyini ortaya qoyması və əsl vətəndaş mövqeyi formalaşdırmaq idi. Bu gün artıq tam formalaşmış Azərbaycan vətəndaşı özünün və xalqının inkişafı, təhsili, sağlamlığı, yüksək biliklərə və innovativ texnologiyalara malik olması, bu yeniliklərin ölkəmizdə yaradılması işində yaxından iştirak edir. Bu baxımdan informasiya-kommunikasiya texnologiyaları, ətraf mühitin qorunması, təhsilin və sağlamlığın inkişafı ilə bağlı mövcud dövlət proqramları, onların konkret nəticələri, Azərbaycanın regionda və beynəlxalq aləmdə mövqeyinin möhkəmləndirilməsi, mötəbər beynəlxalq qurumların idarə olunmasında yaxından iştirakı ölkəmizin ən başlıca nailiyyətləridir. Bu nailiyyətlərin əldə edilməsində ulu öndər Heydər Əliyev təliminin, idarəçilik mövqeyinin, yaratdığı irsin - Azərbaycan dövlətinin və bu dövləti daha da qüdrətləndirmək qabiliyyətinə, güclü siyasi iradəyə malik olan Prezident İlham Əliyevin misilsiz xidmətləri vardır.

Milli Məclisin İqtisadi siyasət komitəsinin sədri akademik Ziyad Səmədzadə Azərbaycan Prezidenti İlham Əliyevin həyata keçirdiyi siyasətin əldə etdiyi uğurların təməlində siyasi və iqtisadi müstəqilliyin durduğunu vurğulamışdır. Məhz bu siyasət nəticəsində Azərbaycan qlobal maliyyə böhranından uğurla keçərək sürətlə dünyaya inteqrasiya etmişdir.

Azərbaycanın müstəqil iqtisadi siyasətinin əsas cəhətlərindən danışan Ziyad Səmədzadə ölkə iqtisadiyyatı üçün çox vacib olan 7 alternativ neft-qaz marşrutunun yaradılmasının əhəmiyyətini xüsusilə qeyd etmişdir. Prezident İlham Əliyevin yürütdüyü uğurlu siyasət nəticəsində Azərbaycan artıq borc alan ölkədən borc verən ölkəyə çevrilmiş, dövlət büdcəsi və ümumi daxili məhsul dəfələrlə artmışdır.

Akademik bildirmişdir ki, dekabrın 17-də imzalanan qaz sazişləri Azərbaycanın iqtisadi müstəqilliyini daha da gücləndirəcəkdir. Azərbaycan artıq nəinki özünün, digər ölkələrin enerji təhlükəsizliyini təmin edən güclü dövlətlərdən birinə çevrilmişdir. Kitabda toplanmış materiallardan da göründüyü kimi, bu məsələ Azərbaycan Prezidentinin görüşlərində xüsusi vurğulanır.

Nəşrdə toplanan materialların Prezident İlham Əliyevin titanik fəaliyyətinin məntiqi nəticəsi olduğunu qeyd edən Ziyad Səmədzadə dövlət başçısının yürütdüyü siyasətin uğurlarının təhlili və təbliği baxımından əsərin qiymətli mənbə rolu oynadığını vurğulamışdır.

Akademiyanın prorektoru, professor Əlikram Abdullayev kitabda dünya miqyasında baş verən proseslər fonunda Azərbaycanın təqdim edilməsinin ciddi elmi axtarışların nəticəsi olduğunu diqqətə çatdırmışdır.

DİA-nın siyasi araşdırmalar institutunun direktoru, siyasi elmlər doktoru, professor Elman Nəsirov nəşrin III və IV cildlərinin təqdimatının "Şahdəniz-2" üzrə yekun investisiya qərarının imzalanması, Azərbaycan Prezidentinin qarşıdan gələn ad günü və Dövlət İdarəçilik Akademiyasının 15 illik yubileyi ilə üst-üstə düşdüyünü əlamətdar hadisə kimi qeyd etmişdir.

Təhsil ocağının dosenti, siyasi elmlər üzrə fəlsəfə doktoru Elçin Əhmədov dördcildliyin ölkəmizin dinamik inkişafının, Azərbaycan tarixində böyük iz qoymuş son on ilin salnaməsi olduğunu bildirmişdir. Azərbaycanın son illərdə əldə etdiyi uğurlardan danışan Elçin Əhmədov bu cildlərin Azərbaycan Prezidenti İlham Əliyevin uğurlu siyasi fəaliyyətinin nəticəsi olduğunu vurğulamışdır. Buna görə də dördcildliyin ərsəyə gəlməsinə görə ən çox Azərbaycan Prezidentinə minnətdar olmalıyıq.

DİA-nın rektoru Urxan Ələkbərov tədbirə yekun vuraraq Azərbaycan Prezidentinin çoxşaxəli siyasi fəaliyyətinin salnaməsi olan nəşrin yeni cildlərinin də hazırlanacağına əminliyini bildirərək ölkəmizin artan iqtisadi və siyasi qüdrətinin bunu deməyə əsas verdiyini diqqətə çatdırmışdır.

Azərbaycan.-2013.- 19 dekabr.- S.2.