Bakıda «Kadr
hazırlığı və əmək məhsuldarlığının
yüksəldilməsində peşə standartlarının rolu» mövzusunda konfrans keçirilmişdir
Dekabrın 19-da Bakıda "Kadr hazırlığı və əmək məhsuldarlığının yüksəldilməsində peşə standartlarının rolu" mövzusunda konfrans keçirilmişdir.
AzərTAc xəbər verir ki, konfransı giriş sözü ilə açan əmək və əhalinin sosial müdafiəsi naziri Səlim Müslümov rəhbərlik etdiyi nazirlik ilə Dünya Bankının birgə həyata keçirdikləri "Sosial müdafiənin inkişafı" layihəsi çərçivəsində 2010-2013-cü illərdə Azərbaycanda 200 peşə standartının hazırlandığını diqqətə çatdırmışdır. Bildirmişdir ki, indiyədək ölkəmizdə peşələrin ətraflı təsviri və müasir tələblərə, bazar iqtisadiyyatı prinsiplərinə uyğun peşə tələbləri sistemi, demək olar ki, mövcud olmamışdır. Bu isə istehsal prosesinə müəyyən maneələr yaratmaqla yanaşı, əmək bazarına daxil olan işçi qüvvəsinin peşə bacarıqları ilə işəgötürənlərin tələbləri arasında ziddiyyətin yaranmasına, məhsuldarlığın təminatında çətinliyə səbəb olurdu, işçi qüvvəsinin zəruri bacarıqlara malik olmaması işəgötürənlər üçün vaxt və maliyyə itkisi ilə nəticələnirdi. Peşə standartlarının hazırlanması ölkəmizdə əmək resurslarının təkmilləşdirilməsi istiqamətində görüləcək işlər üçün mühüm əsasdır.
S.Müslümov vurğulamışdır ki, bu standartlar peşə təhsili və təlimi sisteminin iqtisadi sferanın tələblərinə uyğunlaşdırılması kimi vacib məsələnin həllində bir açar rolunu oynayacaqdır. Bu sahədə mütərəqqi beynəlxalq təcrübədən istifadə olunmuşdur. Peşə standartları artıq müəssisələr tərəfindən tətbiq olunmağa başlanmışdır. Bu sahədə fəaliyyətimizi davam etdirəcəyik.
Konfransda Azərbaycan Həmkarlar İttifaqları Konfederasiyasının (AHİK) sədri, Milli Məclisin deputatı Səttar Mehbalıyev çıxış edərək ölkədə sosial-iqtisadi sahələrdə əldə olunan uğurlardan, kadr hazırlığının vacibliyindən, peşə standartlarının yaradılmasının əhəmiyyətindən danışmışdır. S.Mehbalıyev bildirmişdir ki, ölkəmizdə insan resurslarının inkişaf etdirilməsi, peşə standartlarının hazırlanması, onların faydası və tətbiqi mexanizmləri daim diqqətdə saxlanılır. Bu gün respublikamızda əmək bazarının dəyişməsi işçilərin səlahiyyətlərinin və peşə biliklərinin daim inkişafını tələb edir. Kadr hazırlığı üçün peşə standartlarının hazırlanması dövrün tələblərindən biridir. Bu məqsədlə ölkəmizdə beynəlxalq təşkilatlarla əməkdaşlıq çərçivəsində müxtəlif layihələr həyata keçirilir, peşə standartlarının hazırlanması üçün müvafiq tövsiyələr hazırlanır.
S.Mehbalıyev qeyd etmişdir ki, peşə standartlarının hazırlanması məqsədəmüvafiqdir. Azərbaycanda peşə standartlarının tətbiqi işçi qüvvəsinin keyfiyyətinə nəzarəti gücləndirəcəkdir. Yüksək ixtisaslı mütəxəssislərin hazırlanması, onlardan istehsalatda istifadə olunması ölkə iqtisadiyyatının yüksələn xətlə inkişafının davam etdirilməsi deməkdir. AHİK öz növbəsində sosial tərəfdaşlarla kadr hazırlığı, peşə standartlarının işlənib hazırlanması, yeni texnologiyaların istehsalatda tətbiqi nəticəsində əmək məhsuldarlığının artırılması sahəsində əməkdaşlıq etməyə hazırdır.
Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının (ASK) prezidenti Məmməd Musayev rəhbərlik etdiyi qurumun fəaliyyətindən danışmış, kadr hazırlığı, peşə standartlarının yaradılmasının vacibliyindən bəhs etmişdir. Bildirilmişdir ki, 200 peşə standartının hazırlanması rəqabətqabiliyyətli kadrların yetişdirilməsində mühüm məsələdir və əmək bazarının keyfiyyətinin yüksəldilməsinə müsbət təsirini göstərəcəkdir.
Dünya Bankının Azərbaycan üzrə ölkə meneceri xanım Larisa Leşçenko layihə barədə məlumat vermiş, peşə standartlarının hazırlanmasının, əmək ehtiyatları ilə bağlı agentliyin yaradılmasının vacibliyindən danışmışdır. O bu sahədə fəaliyyətlərini davam etdirəcəklərini söyləmişdir.
Daha sonra "Peşə standartlarının hazırlanması" (DIOS) layihəsinin direktoru Hans Bonarius çıxış edərək peşə standartlarının yaradılmasının əhəmiyyətindən və vacibliyindən bəhs etmişdir. Natiq bu standartların hazırlanmasının əmək bazarının keyfiyyətinin yüksəldilməsinə töhfə verəcəyini söyləmişdir.
Konfransda "Peşə standartları beynəlxalq perspektivdə", "Peşə standartlarının hazırlanması və tətbiqinin kadr hazırlığı və əmək məhsuldarlığının yüksəldilməsinə təsirləri" və digər mövzularda çıxışlar olmuş, müzakirələr aparılmışdır. Həmçinin DIOS layihəsi haqqında videoçarx, hazırlanmış peşə standartlarının çap nümunələri nümayiş etdirilmişdir.
Tədbirdə
nazirlik ilə bir sıra təşkilatlar arasında əməkdaşlıq
haqqında memorandum imzalanmışdır.
Azərbaycan.-2013.- 20 dekabr.- S.11.