Ermənistanın qeyri-konstruktiv mövqeyi Dağlıq Qarabağ münaqişəsinin həlli istiqamətində sülh danışıqları prosesinə ciddi xələl gətirir

Son vaxtlar Ermənistan Respublikası Dağlıq Qarabağ münaqişəsinin həlli istiqamətində göstərilən səylərə böyük zərbə vura biləcək addımlar atmaqda davam edir. İyirmi ildir davam edən sülh danışıqları prosesində böyük iradə nümayiş etdirən Azərbaycan bu münaqişənin sülh yolu ilə həll olunmasının tərəfdarı kimi çıxış edir. Lakin Ermənistan tərəfinin tutduğu qeyri-konstruktiv mövqe və apardığı təcavüzkar siyasət sülh danışıqları prosesinə ciddi xələl gətirir.

Bu fikirlər "Azərbaycan Respublikası Dağlıq Qarabağ Bölgəsinin Azərbaycanlı İcması" İctimai Birliyinin bəyanatında öz əksini tapmışdır.

Bəyanatda deyilir: "Bütün dünyaya bəllidir ki, Azərbaycanın işğal olunmuş ərazilərindəki tanınmamış qanunsuz rejim azərbaycanlı əhalinin etnik təmizlənməsi əsasında Ermənistan tərəfindən yaradılmış cinayətkar qurumdur. Məhz buna görə də beynəlxalq təşkilatlar və dünya dövlətləri Ermənistanın öz işğalçılıq siyasətini ört-basdır etmək məqsədi ilə Dağlıq Qarabağda müxtəlif vaxtlarda keçirdiyi qondarma seçkiləri heç vaxt tanımamışdır. Tanınmamış və faktiki mövcud olmayan bir "dövlət"də seçkilərin keçirilməsi və ya burada hər hansı bir fəaliyyətin görülməsi qeyri-mümkündür.

Dağlıq Qarabağda yaradılmış qondarma qurumun tanınmasının guya təbii proses olduğunu və artıq Ermənistan Respublikası tərəfindən tanındığını bəyan edən qondarma qurumun "rəsmiləri" unudurlar ki, bu, absurddur. Çünki Ermənistan Respublikasının parlamenti 1989-cu il dekabrın 1-də Dağlıq Qarabağın Ermənistana birləşdirilməsi haqqında qərar qəbul etmiş və bu qərar indi də qüvvədədir".

Bəyanatda bildirilir ki, Ermənistan mövcud status-kvonu imkan qədər uzatmaq və öz işğalçılıq siyasətini ört-basdır etmək məqsədi ilə müxtəlif vaxtlarda işğal etdiyi Azərbaycan ərazilərində bir sıra tədbirlər keçirməklə oradakı cinayətkar rejimin dünya birliyi tərəfindən tanınmasına cəhd göstərir. Lakin oradakı bir ovuc cinayətkar dəstənin Ermənistanın himayəsi altında hər hansı müvəqqəti fəaliyyəti heç vaxt Dağlıq Qarabağın müstəqilliyinin tanınmasına gətirib çıxara bilməz. Çünki dünya birliyi birmənalı şəkildə dəfələrlə bəyan etmişdir ki, Azərbaycanın ərazi bütövlüyünü tanıyır. BMT Təhlükəsizlik Şurasının Dağlıq Qarabağ münaqişəsi ilə bağlı qəbul etdiyi 822, 853, 874 və 884 saylı qətnamələrdə Azərbaycanın suverenliyinə, ərazi bütövlüyünə və sərhədlərinin toxunulmazlığına hörmət ifadə edilmiş, zor tətbiq etməklə sərhədlərin dəyişdirilməsinin yolverilməzliyi qeyd olunmuş və erməni hərbi birləşmələrinin Azərbaycanın işğal olunmuş ərazilərindən dərhal, tamamilə və qeyd-şərtsiz çıxarılması tələbi irəli sürülmüşdür.

Bəyanatda qeyd edilir ki, bəzi xarici dairələr, təşkilatlar müxtəlif vaxtlarda Azərbaycan reallıqlarını təhrif edərək qeyri-obyektiv və qərəzli məlumatlar yayırlar. Subyektiv mülahizələri ilə "məşhurlaşan" qurumların, o cümlədən "Freedom House" təşkilatının mövqeyinə gəldikdə isə, bu, Azərbaycan haqqında qərəzli mövqedir. Əminliklə demək olar ki, bu hesabat müxtəlif beynəlxalq dairələrin, hətta Ermənistan tərəfindən idarə olunan, maliyyələşdirilən müxtəlif lobbi qruplarının fikirlərini əks etdirir. "Freedom House"un hesabatında ən çox ziddiyyət doğuran məqamlardan biri də Azərbaycanın "qeyri-azad", Ermənistanın isə "qismən azad" ölkə kimi göstərilməsidir. Görünür, bu gün insan hüquq və azadlıqlarının pozulması və məhz bu səbəbdən get-gedə daha çox insanın Ermənistanı tərk etməsi faktı hesabatı hazırlayanların nəzərindən qaçmışdır. Danışıqlar prosesinin Dağlıq Qarabağ bölgəsinin azərbaycanlı icmasının rəyi və birbaşa iştirakı ilə aparılması həm hüquqi, həm də mənəvi çərçivə normalarının zəruri daxili hissəsidir.

Bəyanatda deyilir: "Qərəzli və obyektivlikdən çox uzaq olan "Freedom House"u və subyektiv mövqe tutan digər qurumları Azərbaycanın qaçqın və məcburi köçkün vətəndaşlarının düşdüyü duruma nəzər salmağa və insanların yaşamaq hüquqlarını ciddi şəkildə pozan, terrorçu bir rejim ilə idarə olunan, heç bir beynəlxalq hüquq normasını tanımayan, ona hörmətlə yanaşmayan bir ölkəni "qismən azad" göstərməsinə real baxmağa dəvət edirik".

Azərbaycan.-2013.- 1 fevral.- S.4.