Almaniyanın deputatı Katerina REYÇ: «Ermənistan silahlı qüvvələrinin Dağlıq Qarabağdan çıxarılmasının vaxtı çoxdan çatmışdır»

Ermənistan silahlı qüvvələrinin Dağlıq Qarabağdan çıxarılmasının vaxtı çoxdan çatmışdır. AzərTAc xəbər verir ki, bu sözləri Almaniya Bundestaqının üzvü, Xristian Demokrat İttifaqı/Xristian-Sosial İttifaqı fraksiyasından deputatı, Ətraf Mühit, Təbiətin Mühafizəsi və Nüvə Təhlükəsizliyi Nazirliyində dövlət katibi Katerina Reyç Ermənistanın Xocalı aeroportu barədə planlarına dair Avropa Azərbaycan Cəmiyyətinin sualına cavab verərək demişdir.

Deputat bildirmişdir ki, BMT Təhlükəsizlik Şurası bunu qətnamələrində dəfələrlə tələb etmişdir: "Almaniya və Avropa İttifaqı (Aİ) bu məsələdə həmfikirdir. Ötən il iyulun 19-da Dağlıq Qarabağda keçirilmiş qondarma prezident seçkilərinə münasibət bildirən Aİ-nin təhlükəsizlik məsələləri üzrə ali nümayəndəsi Ketrin Eşton açıq şəkildə bəyan etmişdir ki, bu seçkiləri Aİ tanımır. Almaniyanın da mövqeyi aydındır: Dağlıq Qarabağ Azərbaycan Respublikasının ayrılmaz bir hissəsidir və işğala son qoyulmalıdır. İşğala son qoyulması ilə regiondakı qaçqın və məcburi köçkünlərin çoxu üçün yeni perspektivlər yaranacaqdır. Cənubi Qafqazda sabitliyi və təhlükəsizliyi təmin etmək üçün biz Azərbaycan ilə yaxından əməkdaşlıq edirik. Dağlıq Qarabağ münaqişəsi ölkənin ən böyük problemidir. Münaqişənin sülh yolu ilə həlli bütövlükdə regionun iqtisadiyyatı və cəmiyyəti üçün müsbət təkan yarada bilər. Bu, regionun bütün dövlətlərinin marağındadır".

Bundestaqın üzvü qeyd etmişdir ki, sülh prosesi ilə bağlı beynəlxalq ictimaiyyətlə əməkdaşlıq Almaniya üçün xüsusilə vacibdir. BMT, Aİ və ATƏT uzun müddətdir ki, münaqişənin sülh yolu ilə həlli yollarını birlikdə axtarır. Sülhə gedən yolda geriyə addım atılmamalıdır. Lakin işğal olunmuş Dağlıq Qarabağın ərazisində Xocalı aeroportunu yenidən açmaqla, Ermənistan hökuməti bunun əksini edir. Bu, Azərbaycanın hava məkanının pozulmasıdır.

Azərbaycan.-2013.- 1 fevral.- S.5.