Azərbaycan Respublikasının Maliyyə Nazirliyində geniş tərkibli kollegiya iclası keçirilmişdir

Fevralın 1-də Maliyyə Nazirliyində 2012-ci ilin yekunları və 2013-cü ildə qarşıda duran vəzifələrə həsr olunmuş geniş kollegiya iclası keçirilmişdir.

Nazirliyin mətbuat xidmətindən AzərTAc-a bildirmişlər ki, maliyyə naziri Samir Şərifov çıxış edərək Azərbaycan Prezidenti İlham Əliyev tərəfindən uğurla davam etdirilən, keyfiyyətcə yeni inkişaf mərhələsinə daxil olan və sürətlə dünya iqtisadiyyatına inteqrasiya edən çoxşaxəli iqtisadiyyatımızda ötən ildə də makroiqtisadi sabitliyə, qeyri-neft sektorunda yüksək artım sürətinə, dövlət büdcəsinin stabil icrasına nail olunduğunu, əhalinin yaşayış səviyyəsinin və pul gəlirlərinin, ölkənin valyuta ehtiyatlarının artdığını bildirmişdir.

Azərbaycanın ötən il qazandığı nailiyyətlərdən söz açan S.Şərifov bildirmişdir ki, Prezidenti İlham Əliyevin rəhbərliyi ilə 2012-ci ildə ölkəmiz ciddi uğurlara imza atmış, Azərbaycan BMT Təhlükəsizlik Şurasının qeyri-daimi üzvü kimi fəaliyyətə başlayaraq may ayı ərzində Şuraya sədrlik etmişdir. Bir sıra mötəbər beynəlxalq tədbirlərə və yarışlara, o cümlədən "Eurovision-2012" mahnı müsabiqəsinə ev sahibliyi edən Azərbaycan London Yay Olimpiya Oyunlarında tarixi qələbələr qazanmış və nəhayət, birinci Avropa Olimpiya Oyunlarının 2015-ci ildə Bakıda keçirilməsi barədə qərarın qəbul edilməsinə nail olmuşdur.

Nazir 2012-ci ilin digər böyük sosial hadisəsindən - sovet dövründən qalan əmanətlərin qaytarılması prosesindən danışaraq bildirmişdir ki, Prezidenti İlham Əliyevin müvafiq fərmanı ilə bu istiqamətdə qarşıya qoyulmuş vəzifələrin icrası müvəffəqiyyətlə təmin edilmişdir. Ötən il iyunun 1-dən 2013-cü il yanvarın 1-dək "Kapital Bank" ASC-nin struktur bölmələri tərəfindən 1 milyon 448 min 941 əmanət hesabı üzrə 554 milyon 711 min manatdan çox vəsait fərdi birdəfəlik ödəmələr şəklində əmanətçilərə qaytarılmışdır.

Keçən büdcə ilinin uğurla icra edildiyini bildirən nazir qeyd etmişdir ki, ilkin məlumatlara əsasən 2012-ci il icmal büdcəsinin gəlirləri 22.1 milyard manat və ya 101 faiz, icmal büdcənin xərcləri 19,7 milyard manat və ya 94,4 faiz icra olmuşdur. Dövlət büdcəsinin mədaxili 17.3 milyard manat və ya 101,4 faiz, xərcləri isə 17.1 milyard manat və ya 96,7 faiz təşkil etmişdir. 2012-ci ildə dövlət büdcəsi xərclərinin 55,3 faizi cari xərclərə, 43,4 faizi əsaslı xərclərə, 1,3 faizi isə dövlət borclarına xidmətlə bağlı xərclərə sərf edilmişdir. 2011-ci ilə nisbətən 2012-ci ildə dövlət büdcəsindən təhsil, səhiyyə, mədəniyyət, sosial müdafiə və sosial təminat, müdafiə, kənd təsərrüfatı xərclərinə orta hesabla 8,7 faizədək çox vəsait yönəldilmişdir. Dövlət büdcəsindən sosialyönümlü xərclərə 4.7 milyard manat və ya 27,4 faiz sərf edilmişdir ki, bu da 2011-ci illə müqayisədə 7,9 faiz çoxdur.

Ötən il dövlət büdcəsinin icrası ilə bağlı maliyyə orqanlarının qarşısında duran vəzifələrin ümumən yerinə yetirildiyini deyən nazir qeyd etmişdir ki, əmək haqlarının, müavinətlərin, pensiyaların, dövlət borcu üzrə öhtəliklərin yerinə yetirilməsi, bütün zəruri xərclərin maliyyələşdirilməsi təmin edilmişdir.

Bildirilmişdir ki, Azərbaycan Respublikası Prezidentinin "Azərbaycan Respublikası Silahlı Qüvvələrinin hərbi qulluqçularının sosial müdafiəsinin gücləndirilməsi tədbirləri barədə" 2011-ci il 28 dekabr tarixli fərmanı ilə yaradılmış Komissiya tərəfindən müvafiq meyarlara uyğun olan və Azərbaycan Silahlı Qüvvələrində 20 təqvim ili və daha çox xidmət etmiş hərbi qulluqçuların dövlət vəsaiti hesabına mənzillə təmin olunmasına başlanılmışdır.

Nazir dövlət büdcəsi layihəsinin tərtibi prosesinin və xərclərinin strukturunun təkmilləşdirilməsi, səmərəliliyinin və ünvanlılığının təmin edilməsi istiqamətində işlərin 2012-ci ildə də davam etdirildiyini kollegiya iştirakçılarının diqqətinə çatdırmışdır.

Maliyyə naziri bu istiqamətdə gedən işlərlə bağlı bildirmişdir ki, əhalinin ətraflı məlumatlandırılması üçün 2013-cü ilin dövlət və icmal büdcələrinin layihələri Azərbaycan Respublikası Milli Məclisinə təqdim olunmamışdan qabaq Maliyyə Nazirliyinin rəsmi internet səhifəsində yerləşdirilmişdir.

Hesabat ilinin II rübündən başlayaraq dövlət büdcəsinin icrasına dair rüblük hesabata icmal büdcənin göstəriciləri də daxil edildiyi, yerli xərclərdən maliyyələşən və maliyyə yardımı alan təşkilatların, maliyyə orqanlarının aidiyyəti işçilərinə büdcə layihəsinin tərtibi ilə bağlı praktiki kömək göstərilməsi üçün Maliyyə Nazirliyinin İşçi qrupu tərəfindən bütün rayon və şəhərləri əhatə edən zonalar üzrə seminar-müşavirələrin keçirildiyi diqqətə çatdırılmışdır.

İclasda 2013-cü il dövlət büdcəsinin bütün parametrləri üzrə icrasının təmin olunması, vəsaitlərdən daha da səmərəli istifadə edilməsi və nəzarətin gücləndirilməsi, 2012-ci il dövlət büdcəsinin icrasına dair müvafiq qanun layihəsinin və yardımçı materialların hazırlanıb aidiyyəti üzrə təqdim olunması, 2014-cü il və sonrakı üç il üçün dövlət və icmal büdcə layihəsinin vaxtında və daha da keyfiyyətlə hazırlanması üçün qanunvericiliklə qarşıya qoyulmuş vəzifələrin vaxtında yerinə yetirilməsinə dair tapşırıqlar verilmişdir.

Kollegiya iclasında Azərbaycan Respublikası Prezidentinin 2012-ci il 5 sentyabr tarixli sərəncamı ilə təsdiq edilmiş "Açıq Hökumətin təşviqinə və Korrupsiyaya qarşı mübarizəyə dair 2012-2015-ci illər üçün Milli Fəaliyyət Planlarının icrası üzrə Maliyyə Nazirliyinin 2013-cü il üçün Tədbirlər Planları barədə" məsələ də müzakirə olunmuşdur. "Şəffaflığın artırılması və korrupsiyaya qarşı mübarizə üzrə Milli Strategiya" çərçivəsində həyata keçirilən tədbirlərin davamlılığının təmin edilməsi, bu sahədə normativ hüquqi bazanın və institusional mexanizmlərin təkmilləşdirilməsi, dövlət və yerli özünüidarə orqanlarının fəaliyyətinin açıq hökumət prinsiplərinə uyğunlaşdırılması, qərarların qəbulu prosesində ictimaiyyətin iştirakının genişləndirilməsi və şəffaflığın artırılması, vətəndaş müraciətlərinə baxılması, vətəndaşların qəbul edilməsi, onların ərizə və şikayətlərinə baxılması, onları hərtərəfli təhlil edərək əsaslı şikayətlərin aradan qaldırılması üçün operativ şəkildə tədbirlərin həyata keçirilməsi ilə bağlı konkret tapşırıqlar verilmişdir.

Çıxışlarda bəzi rayon, şəhər üzrə maliyyə orqanları tərəfindən dövlət büdcəsinin yerli gəlir və xərclərinin tərtibi və icrası prosesində, kargüzarlıq və xəzinə əməliyyatlarının aparılmasında nöqsanlara yol verildiyi, hesabat və məlumatların vaxtında və keyfiyyətli nazirliyə təqdim olunmasında bir sıra nöqsanlara yol verildiyi qeyd olunmuşdur. Bəzi rayon, şəhər maliyyə orqanlarının rəhbərlərinə işlərində dönüş yaradılması üçün müvafiq tapşırıqlar verilmişdir.

İclasda Maliyyə Nazirliyinin tabeliyindəki qurumların, rayon, şəhər maliyyə orqanlarının maddi-texniki bazasının və iş şəraitinin yaxşılaşdırılması istiqamətində işlərin davam etdirildiyi qeyd olunmuşdur.

Kollegiya iclasının yekununda müzakirə edilən məsələlərə dair müvafiq qərarlar qəbul edilmişdir.

Sonra uzun müddət dövlət qulluğunda səmərəli fəaliyyət göstərdiklərinə görə Azərbaycan Respublikası Prezidentinin sərəncamı ilə "Dövlət qulluğunda fərqlənməyə görə" medalı ilə təltif olunmuş 4 əməkdaşa medal təqdim olunmuşdur. Tədbirdə həmçinin Maliyyə Nazirliyi sistemində uzunmüddətli səmərəli fəaliyyətləri və peşəkarlıqlarına görə nazirliyin müvafiq əmrlərinə əsasən "Azərbaycan Respublikası maliyyə nazirinin Təşəkkürnaməsi" ilə 7 nəfər əməkdaş təltif olunmuşdur.

Azərbaycan.-2013.- 2 fevral.- S.7.