Səbail rayonunda 2012-ci ilin yekunları müzakirə olundu

Dünən Səbail rayonunda 2012-ci ildə sosial-iqtisadi inkişaf istiqamətində görülmüş işlərə yekun vuruldu və 2013-ci il üçün qarşıda duran vəzifələr müzakirə olundu.

Hesabat yığıncağında öncə 2012-ci il üzrə Səbail rayonunun sosial-iqtisadi inkişafının yekunları və görülən işlər barədə video-film nümayiş olundu. Sonra məruzə ilə çıxış edən Səbail Rayon İcra Hakimiyyətinin başçısı Asif Əsgərov ötən il Azərbaycan Prezidenti İlham Əliyevin rəhbərliyi altında respublikanın sosial-iqtisadi inkişafı sahəsində əldə olunmuş nailiyyətlər barədə məlumat verdi, 2012-ci il ərzində rayonda görülmüş işləri təhlil edərək həlli vacib olan problemlərin aradan qaldırılması yollarından danışdı. Qeyd olundu ki, ötən il Səbail rayonunda bir sıra obyektlərin açılış mərasimlərində Azərbaycan Prezidenti İlham Əliyevin iştirakı Səbail rayonuna olan diqqət və qayğının bir nümunəsidir.

Ölkə başçısı İlham Əliyevin imzaladığı "2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı"nın Əlavə Tədbirlər Planında yenə də Səbail rayonuna geniş yer ayrılıb, əvvəlki dövlət proqramına əlavə olaraq daha 2 sahə üzrə 11 bəndlik tədbirin həyata keçirilməsi proqrama daxil edilib. Bununla yanaşı, 2012-ci ildə Səbail rayonunda nəzərəçarpacaq müsbət dəyişikliklər baş verib, ilin yekunlarına görə sənaye müəssisələri üzrə 23 milyard 949,1 milyon manatlıq məhsul istehsal edilib, nəqliyyat sektorunda fəaliyyət göstərən müəssisələr tərəfindən 633.4 milyon manatlıq nəqliyyat xidmətləri göstərilib. 2012-ci il ərzində Səbail rayonunda hamısı daimi olmaqla 2697 yeni iş yeri açılıbdır. Ümumiyyətlə, 2003-cü ildən 2013-ci ilin yanvar ayının 1-dək rayonda 40070 yeni iş yeri açılıb ki, onların da 39202-i daimidir.

Yığıncağın sonunda ölkə başçısı cənab İlham Əliyevə müraciət qəbul olundu.

R.BAXŞƏLİYEV

Azərbaycan.-2013.- 2 fevral.- S.7.