BMT Təhlükəsizlik Şurasının qətnamələri Ermənistan-Azərbaycan, Dağlıq Qarabağ münaqişəsinin həlli üçün beynəlxalq hüquqi əsas təşkil edir

Almaniya Bundestaqının Xristian Demokrat İttifaqı/Xristian-Sosial İttifaqı fraksiyasından olan deputat, Avropa Şurası Parlament Assambleyasının üzvü Aksel Fişer Ermənistanın Xocalı aeroportu barədə planlarına dair Avropa Azərbaycan Cəmiyyətinin sualına cavab verərək demişdir ki, BMT Təhlükəsizlik Şurası tərəfindən qəbul edilmiş bir neçə qətnamədə Dağlıq Qarabağ bölgəsinin və onun ətrafındakı yeddi rayonun hələ də Ermənistanın işğalı altında qalması faktı pislənmişdir. Bunun beynəlxalq hüququn normalarına və prinsiplərinə zidd olduğu bəyan edilmiş, Ermənistan silahlı qüvvələrinin işğal olunmuş Azərbaycan ərazilərindən dərhal çıxarılması tələb edilmişdir.

Deputat bildirmişdir ki, biz BMT Təhlükəsizlik Şurasının bütün qətnamələrini tam dəstəkləyirik. Bu qətnamələr münaqişənin həlli üçün beynəlxalq hüquqi əsas təşkil edir. Ermənistan bu işğala çoxdan son qoymalı idi.

Qaçqın və məcburi köçkünlərin taleyinin Azərbaycanın ərazi bütövlüyünün bərpasından asılı olduğunu vurğulayan A.Fişer demişdir ki, ilk addım Ermənistan tərəfindən atılmalıdır, yəni, o, işğal edilmiş ərazilərdən silahlı qüvvələrini çıxarmalıdır.

Öz hüquqlarını qorumaqda bizim Azərbaycana regional dəstəyimiz yaxın əməkdaşlıqdan irəli gəlir, - deyən almaniyalı deputat bildirmişdir ki, Cənubi Qafqaz siyasi, iqtisadi və mədəni baxımdan cəlbedici regiondur. Burada Azərbaycan mühüm rol oynayır. O demişdir ki, Almaniya, xüsusilə də Avropa ictimaiyyəti içərisində öz roluna çox məsuliyyətlə yanaşır. Avropa İttifaqı ötən il Dağlıq Qarabağda keçirilmiş qondarma "prezident seçkiləri"ndən sonra onların nəticələrini tanımamış və açıq bir mövqe bildirmişdir. Münaqişənin hüdudları bundan kənara çıxmamalıdır. Lakin Ermənistanın Xocalı aeroportunu beynəlxalq aviasiyaya yenidən açma niyyəti ciddi narahatlıqlar törətsə də bunun qarşısının alına bilinəcəyi sual altındadır.

AzərTAc

Azərbaycan.-2013.- 2 fevral.- S.7.