Prezident qətiyyətinin təntənəsi

Fəttah HEYDƏROV: 60 milyonluq azərbaycanlı iftixarla deyir - biz Sizə özümüz qədər inanırıq, cənab Prezident!

Böyük Qafqaz sıra dağlarının ətəklərində - Qəbələnin qədim dağ kəndlərindən olan Laza ərazisində, həzin küləyin, ətrafı ağuşuna alan qarın xoş təsiri altında dərin düşüncələrə dalıb həmsöhbətimiz...

Seçicilərlə (özü heç vaxt "seçici" sözünü işlətmir - "əziz dostlarım" ifadəsinə üstünlük verir) maraqlı və səmimi şəraitdə keçən görüşün duyğusal ovqatı yorğunluğu da unutdurub. Hələ də seçiciləri ilə yeni ilin ilk görüşünün təəssüratları altındadır...

Müsahibə üçün bu məkanı seçməyini də təsadüfi saymır: "Minilliklərdən soraq verir bu uca, məğrur dağlar... Hər dəfə bu zirvələrə boylananda, qeyri-ixtiyari düşünürəm: bu dağlar nələrə şahidlik etməyib, İlahi?! Azərbaycanın zəngin təbiətinin sivmolu sayıla biləcək bu dağlar həm də keşməkeşli minillik tariximizin də şahidi, rəmzidir. Bu dağlara, meşələrə baxdıqca bütün keçmişimizi - qələbələrimizi, itkilərimizi, xəyanətləri, intibahı, insan zəhmətinin bəhrələrini - bir sözlə, tarixi salnamələrimizin hər səhifəsini canlandırmaq, xatırlamaq olar".

Amma xatırlanası və canlandırılası mövzular bambaşqadır. Ötən ilin əsas məqamları - dünyadakı və məmləkətimizdəki siyasi gərdişlər, ictimai təbəddülatlar, sosial nailiyyətlər, bir sözlə, çağdaş dövrün prosesləri barədə münasibətini öyrənməliyik həmsöhbətimizdən. Müsahibimizi oxucuya mənalı həyatının onilliklərlə ölçülən məhsuldar illərini siyasətdə keçirmiş təcrübəli dövlət adamı kimi də təqdim etmək olar, son 20 illik dövlət quruculuğu prosesində mühüm iştirakı olan nüfuzlu millət vəkili, yaxud müdrik el ağsaqqalı kimi də...

Fəqət xüsusi təqdimata ehtiyac yoxdur: sadəcə, Fəttah HEYDƏROV...

Qəbələnin xoş növrağı

Diktofonun yaddaşına, qeyd dəftərinin səhifələrinə köçən, yalnız oxuculara kiçik bir qismini təqdim etdiyimiz söhbətə Fəttah Heydərov Qəbələnin tarixi keçmişi ilə körpü salır, bugünkü inkişafına qədər olan dövrü xarakterizə edir. Yəqin ki, tariximizdən az-çox xəbəri olanlar da bilməmiş deyillər: Qəbələ Arazın şimalındakı ən qədim türk dövlətinin - Qafqaz Albaniyasının ana şəhəri sayılmaqla, əsrlər boyu ölkənin ictimai-siyasi həyatında önəmli rol oynayıb. Qədim Qəbələ dünyanın Babil, Troya, Pompey kimi antik şəhərləri ilə müqayisə ediləcək dərəcədə mühüm, siyasi-iqtisadi və ticarət mərkəzlərindən olub. Eramızdan əvvəl yaşayan Böyük Plini Albaniyanın əsas şəhərinin Kabalaka olduğunu yazırdı. Digər bir tanınmış tarixçi Ptolemey isə Qəbələnin adını Xabala (Chabala) kimi çəkirdi.

Qəbələ adının qədim türk sözü olan "Qapıqala"dan əmələ gəldiyini iddia edənlər də var. Qəbələ həqiqətən də, qədim zamanlardan Böyük Qafqazın ətəklərində yerləşən şəhər və yaşayış məntəqələrinin qapısı hesab olunurdu. Azərbaycanın şimal və cənubuna gedən yollar məhz bu qədim yurdda kəsişirdi. Bizim günlərdə isə AMEA-nın Tarix və Etnoqrafiya İnstitutunun alimləri Qəbələ Tarix-Bədii Qoruğunda aparılan arxeoloji qazıntılar nəticəsində rayonun və bütövlükdə Qafqaz Albaniyasının tarixi baxımından çox qiymətli tapıntılar aşkarlayıblar.

Tarixiliyini bu gün də qoruyub saxlayan qədim Qəbələnin qərinələrdən nişan verən yaşayış məskənləri indi də buraya yolu düşənlərə xoş ovqat, yüksək əhval-ruhiyyə bəxş edir. Qədim diyarın son illərdə Azərbaycanımızın heyrətamiz inkişaf və müasirliyinin simvoluna çevrildiyini aydın görmək olur.

Fəttah müəllim bu yerdə cəmi bir neçə saat əvvəl şahidi olduğumuz hadisəni yada salır: "Laza kəndində seçicilərimlə görüşərkən ahıl bir kişinin dedikləri bir neçə saatdır bütün diqqətimi özünə çəkib. Ağsaqqal söylədi ki, "Qədim zamanlarda qılıncların, süngülərin, tüfənglərin gücü duyulan Qəbələdə indi dövlət başçımızın əzmi, zəkası, qüdrəti öz sözünü deyir". Elə hesab etməyin ki, bu müdrik fikirlər bəlağətli söz xatirinə deyilmişdi, əsla yox. Dünya görmüş ağsaqqal sakini olduğu rayonun gündən-günə gözəlləşməsini, müasirləşməsini, yeni iqtisadi və mədəni mərkəzə çevrilməsini özünəməxsus şəkildə ifadə etdi, həm də hədsiz sevincini büruzə verdi.

Son illər həqiqətən də, Qəbələni tanımaq olmur. Tarixi şəhər indi qədimliklə müasirliyin ən parlaq cizgilərini özündə dolğun təcəssüm etdirir. Qəbələ özünün ikinci gənclik dövrünü yaşayır. Möhtərəm Prezidentimiz İlham Əliyev rayonda olarkən bildirdi ki, "Qədim yaşayış yurdu olan Qəbələnin tarixi şöhrəti bu gün özünə qaytarılıb".

Qəbələni böyük tikinti meydanı kimi görmək ürəyimi dağa döndərir. Yüksək zövq və müasir arxitektura əsasında inşa edilən bir-birindən gözəl binalar, yeni hotellər, istirahət və turizm mərkəzləri, iri istehsal müəssisələri Qəbələni nəinki regionun, bütövlükdə Avropanın perspektivli, böyük gələcəyi olan şəhərlərindən birinə çevirib. Rayondakı tərəqqi və yüksəlişi sözün qüdrəti ilə tam canlandırmaq çətindir. Qürur hissi ilə demək istərdim ki, Milli Məclisdə təmsilçisi olduğum rayon son illərdə tanınmaz dərəcədə müasirləşərək paytaxt Bakı ilə ayaqlaşmağı bacarıb. Dövlət başçısının xüsusi diqqət və qayğısı ilə rayonda abadlıq, quruculuq işləri müasir tələblər əsasında, yüksək səviyyədə aparılır. Əldə olunan tərəqqi və rifah bütövlükdə insanların gündəlik həyatında, məişətində duyulur.

Bu gün Qəbələnin yalnız rayon mərkəzi inkişaf etmir. Rayonun bütün kəndləri, yaşayış məntəqələri abadlaşır, yeniləşir, inkişaf edir. Ən əsası isə infrastruktur cəhətdən təkmilləşir. Lazadan Yengicəyədək, Zarağandan Qəmərvana qədər, Hacıalılıdan Nicə kimi, Vəndamdan Bumadək Qəbələnin dörd bir tərəfində, ən ucqar kəndlərində belə quruculuq vüsət alır, yeni müəssisələr açılır. Bəli, Qəbələnin mühüm göstəricisi budur ki, rayonun indi hətta kəndləri istehsal mərkəzinə, iqtisadi gücə, sənaye məkanına çevrilir. Kəndlərimizdə açılan müəssisələrdə xaricə ixrac olunan məhsullar istehsal olunur. Saysız-hesabsız idman məkanları, idman qurğuları, idmanın müxtəlif növləri üzrə akademiya, meydan və mərkəzləri bugünkü Qəbələnin bənzərsiz simasıdır. Bununla necə qürur duymayasan?!

Bütün həqiqətlər müqayisədə üzə çıxır. Bu mənada, Qəbələnin 20 il əvvəlki miskin görkəmi təkrarlanmasını istəmədiyim kino lenti tək gözlərim önündən keçir. Hələ sovetlər birliyi dövründə bölgədə iqtisadi potensialı ilə seçilən şəhər müstəqilliyin ilk illərində taleyin ümidinə buraxılmışdı. İri müəssisələr fəaliyyətsiz qalmış, istehsal prosesi dayanmış, işsizliyin səviyyəsi dözülməz həddə çatmış, əhalinin sosial vəziyyəti pisləşmişdi. Xalqımızın böyük xilaskarı Heydər Əliyevin 1993-cü ildə hakimiyyətə qayıdışından sonra respublikanın hər bir şəhər və rayonu kimi, Qəbələdəki vəziyyət də kökündən dəyişməyə başladı. Rayonun turizm potensialını yüksək dəyərləndirən ümummilli lider ölkənin iqtisadi durumunun heç də yaxşı olmadığı bir dövrdə rayona xüsusi diqqətlə yanaşırdı. 2002-ci ildə Heydər Əliyevin bölgəyə səfərindən sonra Qəbələ daha böyük sürətlə inkişaf etməyə başladı. İnsanların rifahında, yaşayış tərzində mühüm keyfiyyət dəyişiklikləri baş verdi".

Böyük tikinti meydanı

Elə rayon mərkəzində, kəndlərdə təsadüfən ünsiyyət qurduğumuz sakinlərlə söhbətlərimizdən də aydın olurdu ki, sadə qəbələlilər keçmişin acı dərslərini unutmurlar, 21 illik müstəqilliyin uğur və bəhrələrini artıq gündəlik həyatlarında daha qabarıq hiss edirlər. Ən əsası, doğma rayonlarının qət etdiyi möhtəşəm inkişaf yolundan fəxrlə söz açırlar. Qəbələlilər nikbindirlər. Həm də əmindirlər ki, bu gün əldə etdikləri tərəqqi sabah daha geniş miqyas alacaq, çörəkləri daha bol, torpaqları daha bərəkətli olacaq.

Fəttah müəllim də söhbəti məhz bu məcraya yönəldir: "Mən bu gün rayon sakinlərinin üzünə baxanda böyük qürur hissi keçirirəm. 18-20 il öncəki bədbin, inamsız, çörəksiz, özlərini tənha və dövlətləri tərəfindən atılmış sayan insanlar sanki bunlar deyilmiş. Qəbələlilərin simasında indi sevinc, təbəssüm, özünə və sabahına əminlik duyuram. Hər biri əlinin qabarının məhsulunu, zəhmətinin bəhrəsini yeyir. Amma onun da fərqindədir ki, çörək təknəsini dolduran yalnız zəhməti deyil, həm də bu zəhməti üzə çıxaran, bu zəhmətə dəyər verən Ali Rəhbəridir. "Hər bir azərbaycanlının Prezidenti olmaq" qayəsi ilə fəaliyyətə başlayan möhtərəm İlham Əliyev bu gün həm də hər bir qəbələlinin sevimli Prezidenti, dayağı, güvənci, ümid yeri, yaxşı yaşamasının səbəbkarıdır.

Cənab İlham Əliyevin ölkə rəhbərliyinə gəlişindən sonra Qəbələnin taleyində yeni səhifə açılıb. Prezidentimizin daim diqqət mərkəzində olan rayonun siması ötən 9 ildə tamamilə dəyişib. Ölkə başçısının dəfələrlə Qəbələdə səfərdə olması, rayonun inkişaf perspektivləri ilə bağlı dəyərli tövsiyə və tapşırıqlarını verməsi görülən işlərin səmərəsini və keyfiyyətini artırıb. Bu gün Qəbələ həm də turizm potensialı ilə bütövlükdə şimal-qərb bölgəsinin iqtisadi və mədəni mərkəzinə çevrilib.

Regionların sosial-iqtisadi inkişafına xidmət edən dövlət proqramları rayonda uğurla gerçəkləşdirilir. Ən əsası odur ki, qazanılan uğurlar məqsədyönlü, ardıcıl, səmərəli və yeniliyə əsaslanan mütərəqqi iş üslubunun nəticəsidir. Ölkə Prezidentinin müvafiq sərəncamları, dövlət proqramları, habelə tapşırıq və tövsiyələri rayonda daim rəhbər tutulur. Qarşıda duran vəzifələr dəqiq müəyyənləşdirilərək onların vaxtında və düzgün icrası istiqamətində tədbirlər görülür. Kəndlər qazlaşdırılır, su, kanalizasiya sistemi yenidən qurulur.

Müasir Qəbələdəki yeni inzibati binaları, turizm obyektlərini, istehsal müəssisələrini saymaqla qurtarmaz. Son illərdə rayonda xeyli zavod və fabrik, yüngül sənaye müəssisələri açılaraq istifadəyə verilib, çoxlu sayda yeni iş yerləri yaradılıb. Prezidentin rayona əvəzsiz töhfələrindən biri də budur ki, əgər 20 il öncə Qəbələdən Bakıya və digər ölkələrə kütləvi axın vardısa, son illərdə bu axın geriyə doğru yönəlib. Qəbələlilər öz yurdlarına kütləvi şəkildə qayıdırlar. Təsadüfi deyil ki, son 15 ildə Qəbələ sakinlərinin sayı təxminən 20 faiz artıb. İnsanlar üçün Qəbələdə iş yeri tapmaq problem deyil. Amma sahibkar üçün işçi tapmaq artıq problemə çevrilir. Buna görə də Qəbələ indi ətraf bölgələrdən olan vətəndaşlarımızın da ruzi qapısına çevrilib".

Qafqazın İsveçrəsi

Ölkəmizdə ən uzun uçuş xəttinə - 3600 metrilik zolağa malik olan Qəbələ Beynəlxalq Hava Limanının istifadəyə verilməsi rayonun həqiqətən də, artıq Azərbaycan üçün vacib strateji əhəmiyyət daşıdığını nümayiş etdirir. Bu hadisə Qəbələnin beynəlxalq turizm məkanına çevrilməsinə də geniş perspektivlər açıb. 4 beşulduzlu möhtəşəm hotelə, eləcə də yüzlərlə mehmanxanaya malik olan rayonun turizm potensialı il ərzində yüz minlərlə insana xidmət etmək imkanındadır və bunu edir də. Qəbələnin özünəməxsus gözəl təbiəti sanki Ulu Tanrının xalqımıza böyük ərməğanıdır. Burada ilin hər fəsli insanda xoş ovqat yaradır. Yayın qaynarlığını, qışın qar-boranını, payızın həzinliyini, baharın təravətini daha yaxşı duyan daxili və xarici turistlər Qəbələyə dönə-dönə gəlmək istəyirlər. "Qafqazın İçveçrəsi" adlandırılan rayonda ilin bütün dövrlərində turist qələbəliyi hiss olunur.

Həmsöhbətimizin fikrincə, rayonun dünya miqyasında şöhrətinin artmasının bir ümdə səbəbi də var - Qəbələ son illər beynəlxalq tədbirlər mərkəzinə çevrilib: "Xüsusən də, yay aylarında Heydər Əliyev Fondunun prezidenti, YUNESKO və İSESKO-nun xoşməramlı səfiri, Milli Məclisin deputatı Mehriban xanım Əliyevanın şəxsi təşəbbüsü ilə keçirilən beynəlxalq musiqi festivalları rayonun şöhrətini bütün dünyaya yayıb. Ötən ilin avqust ayında keçirilmiş IV Qəbələ musiqi festivalı təkcə rayonun böyük potensialını deyil, ümumən Azərbaycan musiqisinin zənginliyini bütün dünyaya nümayiş etdirdi. Bu və digər tədbirlər sayəsində dünya müstəqil Azərbaycanın uğurlarını daha yaxından tanımaq imkanı əldə edib. Bir rayonun timsalında dünya Azərbaycanın möhtəşəmliyini, müasirliyini, quruculuğunu, abadlığını, yüksək zövqə malikliyini görür.

Qəlbimi qürur hissi ilə dolduran faktlardan biri də rayonda piano fabrikinin açılmasıdır. Postsovet məkanında yalnız Rusiya və Ukraynada olan bu müəssisə həm də Azərbaycanın mədəniyyət, incəsənət, o cümlədən müsiqi potensialının müasirliyini, insanlarımızın bəşəri musiqi dəyərlərinə olan sıx bağlılığını aydın nümayiş etdirir.

Prezidentimiz həmişə deyib ki, əsl siyasət real iş və konkret fəaliyyətdən ibarətdir. Bu gün Qəbələdə Prezidentin əsl siyasətini daha aydın görmək olar: ortada saysız-hesabsız real işlər və minlərlə konkret fəaliyyət nümunəsi var".

Uğurlu Prezidentliyin Azərbaycan modeli

Fəttah Heydərov iqtisadiyyatdan sosial sahəyə, aqrar sektordan turizmə, mədəniyyətdən təhsilədək bütün sahələrdə əldə edilən nailiyyətləri Prezident siyasətinin nəticəsi kimi dəyərləndirir. Millət vəkilinin fikrincə, məhz vətəndaşlarla hakimiyyət arasında çox güclü mənəvi birliyin, həmrəyliyin mövcudluğu qazanılan uğurların zəmini, perspektiv müvəffəqiyyətlərin isə təməlidir.

Həmsöhbətimizin qənaətincə, Azərbaycanın mövcud və perspektiv siyasətini təmin edən yalnız bir amil var: "Xalq-İlham Əliyev vəhdəti uzun onilliklər boyu Azərbaycanın müqəddəratını müəyyənləşdirəcək ən başlıca siyasi faktordur. Əhalinin hakim siyasi kursa, Prezidentin siyasətinə dəstəyi birmənalıdır. Həm də nəzərə alaq ki, xalqımız İlham Əliyev xəttini yalnız siyasi kurs kimi yox, həm də Heydər Əliyevin mükəmməl dövlətçilik konsepsiyasının məntiqi davamı tək qəbul edir. Prezidentin xarizması ölkədə fövqəlgücdür, nüfuzu isə alternativsizdir. Dövlət başçısının sözü xalq üçün müəyyənləşdirici vasitədir. Ötən 9 ildə bu ümummilli etimadı qazanmaq heç də siyasi şans deyil, bu, xalqa layiqli xidmət missiyasının nəticəsidir.

Bu gün artıq dünya səviyyəsində çoxsaylı ekspertlər Prezidentin müəllifi olduğu İnkişafın Azərbaycan modelini öyrənir və təhlil edirlər. Mən - Azərbaycanı qarış-qarış, kəndbəkənd gəzən, minlərlə insanla, zəhmətkeşlə, fəhləylə, alimlə, gənclə... sıx təmasda olan bir şəxs kimi, bu adamların qənaətini bölüşərək tam məsuliyyətimlə deyirəm ki, möhtərəm İlham Əliyev İnkişafın Azərbaycan modeli ilə bahəm, həm də xalqa vicdanlı, layiqli, təmənnasız xidmətin, həmçinin yaxşı Prezidentliyin uğurlu modelini yaradıb. Buna görə də dünyada siyasi fəaliyyətdə aparıcı element olan "piar" və digər təşviqat vasitələri Azərbaycanda səmərə vermir. Çünki ən böyük təbliğat və "piar" məhz Azərbaycan Prezidentinin özü, sözü və fəaliyyətidir!"

Böyük türk siyasətçilərinin görüşü

Fəttah Heydərovun fikrincə, Azərbaycan Prezidentinin ötən il Qəbələyə səfəri tək bölgənin sosial-iqtisadi mənzərəsi baxımından deyil, ümumiyyətlə, beynəlxalq konteksdə də əhəmiyyətli idi. Dövlət başçısının bir sıra mühüm obyektlərin açılış mərasimində iştirak etməsi qəbələlilər üçün böyük tarixi hadisə oldu. Rayonun iqtisadi, sosial və turizm potensialının möhkəmləndirilməsinə daim xüsusi diqqətlə yanaşan Prezident "Tufan" dağ-xizək yay-qış istirahət kompleksində, stend və ox atıcılığı kompleksində, Karvansaray hotelində aparılan tikinti işləri ilə, Qəbələ şəhər məscidində və mədəniyyət evinin yeni tikilmiş binasında son tamamlama işlərinin gedişi ilə tanış oldu, müvafiq tapşırıq və tövsiyələrini verdi.

"Bütün bunlar, şübhəsiz, Qəbələnin inkişafı baxımından çox mühüm, strateji əhəmiyyətli layihələrdir" - deyir millət vəkili və əlavə edir: "Bu səfər müddətində Qəbələ daha bir möhtəşəm siyasi hadisəyə şahidlik etdi: Azərbaycan-Türkiyə Yüksək Səviyyəli Strateji Əməkdaşlıq Şurasının iclası rayonumuzda keçirildi. Türk dünyasının iki böyük xadiminin - İlham Əliyevlə Rəcəb Tayyib Ərdoğanın Qəbələdəki görüşü mənə 90-cı illərin əvvəllərini xatırlatdı. Naxçıvanın ağır günlərində doğma yurduna yüksək əzm və qətiyyətlə rəhbərlik edən Heydər Əliyevin Türkiyənin o zamankı rəhbəri Süleyman Dəmirəllə tarixi görüşü gözlərim önündə canlandı. Məhz bu görüşün nəticəsi kimi Türkiyə blokada şəraitində yaşayan Naxçıvan Muxtar Respublikasına əsl qardaş dəstəyini göstərdi. Naxçıvanın, eləcə də Azərbaycanın o ağır günlərində Türkiyə daim yanımızda oldu.

Şükürlər olsun ki, o dövrlər çoxdan geridə qalıb: Azərbaycan xüsusilə, son illərdə sürətlə inkişaf edərək Türkiyə ilə bərabər regionun lider dövlətinə çevrilib. Artıq biz Türkiyəyə dəstəyik, Azərbaycan Türkiyənin gücünü birə beş artırır. Bu gün məmləkətimiz Türkiyəyə ən çox investisiya yatıran ölkədir. Azərbaycan Türkiyənin büdcəsinə milyardlarla dollar əlavə vəsait, vətəndaşlarına isə iş yerləri, çörək verir. Respublikamız ümumilikdə, Avropanın enerji təhlükəsizliyinin, deməli, həm də gələcək müqəddəratının təminatında əsas söz sahiblərindən biridir. Strateji müttəfiq olan Azərbaycan və Türkiyə regiondakı siyasi proseslərə fəal müdaxilə və təsir imkanları ilə seçilirlər. Yüksək Səviyyəli Strateji Əməkdaşlıq Şurasının iclası bütövlükdə beynəlxalq diqqəti bir daha Qəbələyə yönəltdi. Dünya siyasi kahkəşanında yeni parlayan iki ulduzun - Azərbaycan və Türkiyənin dövlət rəhbərlərinin müzakirə etdiyi strateji əhəmiyyətli məsələlər bütün türkdilli dövlətlərin maraqlarını özündə ehtiva edirdi".

Gündəmi artıq Azərbaycan müəyyənləşdirir

Fəttah Heydərov Azərbaycanı yalnız türkdilli ölkələr üçün deyil, bütünlüklə islam dünyası və Yaxın Şərq bölgəsi üçün aparıcı qüvvə sayır. Hesab edir ki, güclü iqtisadi resursları, beynəlxalq nüfuzu, demokratikləşmə və hüquqi, dünyəvi dövlət quruculuğunda qazandıqları mühüm nailiyyətlər ölkəmizi məlum bölgədə söz sahibinə çevirir və model dövlət kimi təsbit edir.

Millət vəkilinin bu qənaəti çox dolğun və dəqiqdir: "Bu gün müsəlman aləmi və qan içində boğulan Şərq bölgəsi məhz Azərbaycan dövlətçilik modelini öyrənir. Dünya xəritəsində bir zərrə nöqtə ilə əks olunan Azərbaycan dünyanın real siyasi mənzərəsində böyük geosiyasi ərazini tutur. Bu bizim nailiyyətimizdir. Bu kimi qələbələr eyni zamanda, dövlətimizin əleyhinə yönələn beynəlxalq nifaq və iftira hərəkatının daha güclü hücuma keçməsinə də əsas verir. Azərbaycanın artan nüfuzundan, qüdrətindən rəncidə olanlar dünya erməniliyi ilə birlikdə artıq 20 ildir şər kampaniyası aparırlar. Etiraf edək ki, mütəşəkkil və güclü antiazərbaycan şəbəkəsi formalaşıb. Hər sahədə bizə maneə və əngəl yaratmağa çalışırlar. "Sapı özümüzdən olan baltalar"la birlikdə Prezident İlham Əliyevin şəxsində Azərbaycanı hədəf seçiblər.

Ötən il Azərbaycan üçün böyük nailiyyətlər ili oldu. Ölkəmiz BMT Təhlükəsizlik Şurasının üzvü kimi fəaliyyətə başladı və bu quruma sədrlik etdi. Ardınca "Eurovision" mahnı müsabiqəsinə layiqincə ev sahibliyi edərək, Azərbaycanın dünyanın mədəniyyət paytaxtlarından biri olduğunu tam əsaslarla sübut etdik. Ən nəhayət, London olimpiadasında şərəfli 30-cu yeri tutmaqla Avropa, MDB məkanında, islam dünyasında ən öncül idman ölkələrindən biri olduğumuzu göstərdik. Ən mühüm məqamlardan biri isə ilk dəfə təşkil olunacaq I Avropa Olimpiya Oyunlarının məhz Bakıda keçirilməsi ilə bağlı tarixi qərarın qəbulu oldu. Həmçinin ölkəmizdə ötən il ərzində mühüm beynəlxalq tədbirlər, müxtəlif xarici təşkilatların sammitləri də keçirildi. Bu hadisələrin fonunda Azərbaycanın adı aylarla beynəlxalq ictimaiyyətdə uğurun, inkişafın, müasirliyin tərənnümçüsü kimi çəkildi və hazırda da bu qənaət bölüşülür. Onilliklər boyu bizə qarşı yaradılmış informasiya blokadasını yarmışıq və Azərbaycana yönəlmiş hücum kampaniyasının qarşısını alaraq, artıq özümüz hücumçu diplomatiya ilə dünya erməniliyinə meydan oxuyuruq. Diqqətlə nəzər yetirin: bir ildən artıqdır ki, dünya erməniliyi müdafiə mövqeyinə keçib, biz bütün situasiyalarda, bütün proseslərdə onlardan bir addım öndəyik. Artıq gündəmi Azərbaycan müəyyənləşdirir".

Prezidentin qələbəni təmin edəcək fəaliyyətinin manifesti

Fəttah Heydərov söhbəti ötən ilin mühüm strateji hadisələrindən birinə - Prezidentin Azərbaycan diplomatları qarşısındakı tarixi çıxışına yönəldir. Deyir ki, bu çıxışı həm böyük həyəcan, həm də qürur hissi ilə izləyib. "Prezident Azərbaycan dövlətinə və xalqına qənim kəsilən qüvvələrin mütəşəkkil şəbəkəsinin fəaliyyət miqyasını bir daha bizlərə anlatdı. Dünya erməniliyinin ən rəzil, ləyaqətsiz mübarizə metodu seçdiyini ifşa etdi. Tək mən yox, hər bir vətəndaşımız məmləkətimizin məlum fövqəlgüclərin hədəfinə çevrilməyinin detallarını, nəticələrini həyəcanla dinləyirdik. Amma Prezident "İyirmi ildir təkbaşına mübarizə aparırıq. Bizdən qat-qat böyük qüvvələr qarşısında öz maraqlarımızı təmin edirik, heç kimin qarşısından geri çəkilmirik. Biz bölgədə söz sahibiyik" - deyə gücümüzü, əzəmətimizi Azərbaycan adından dünyaya var səsilə car çəkəndə qəlbim iftixar duyğusu ilə coşdu. Fəxr etdim liderimizlə! Budur qətiyyət, prinsipiallıq! Bu çıxışı mən Prezidentimizin qələbəyə doğru yönələn, qələbəni təmin edəcək fəaliyyətinin manifesti kimi qəbul etdim".

Həmsöhbətimiz daha bir mühüm hadisəyə - Prezidentin ötən il Qəbələyə səfəri müddətində ATƏT-ə üzv ölkələrin səfirlərini qəbul etməsinə də toxunur. Cənab İlham Əliyevin aktual məsələlər ətrafında prinsipial və qətiyyətli mövqeyini açıqladığı bu tədbiri həmsöhbətimiz Prezidentlə diplomatların görüşündən daha çox, beynəlxalq miqyaslı gedişləri ölkəsinin maraqlarına uyğunlaşdırmağı bacaran peşəkar diplomatla öz geosiyasi səhvlərinin girovuna çevrilmiş diplomatıların görüşü kimi səciyyələndirir. Və belə izah verir ki, bu tədbirdə dövlət başçımız danılmaz arqumentlərlə, inkaredilməz faktlarla, ən əsası isə şəxsi keyfiyyətləri - siyasi qətiyyəti, diplomatik manevrləri, fərdi xarizması və ilk dəqiqələrdən auditoriyada psixoloji-mənəvi üstünlüyü ələ ala bilmək qabiliyyəti sayəsində avropalı diplomatlara onların "ikili standartlar" yürütdüklərini qəbul etdirdi.

Fəttah Heydərovun qənaətincə, səfirlərin konkret faktlar qarşısında nümayiş etdirdikləri susqunluq əslində, ədalət və həqiqət qarşısında dərin sükut idi: "Mən bu görüşün Qəbələdə keçirilməsində də bir rəmzi məna görürəm. Bu mənanın açarı qəbələlilərdir. Camaatımız çox qədirbiləndir, həm də müdrikdir. Zərrə qədər də şişirtmirəm: nəinki rayon mərkəzində, hətta dağ kəndlərində rastlaşdığım insanlarda müşahidə etdiyim müdrikliyi, təmizliyi, saflığı, ən əsası isə ədalət hissini, inanın, artıq 10 ildən çoxdur üzvü olduğum ATƏT-in Parlament Assambleyasının təmsilçilərinin çoxunda görmürəm. Bu insanlar "ikili standartlar", "ütülü sözlər" nə olduğunu bilməzlər. Bir standartları var - ədalət və hallallıq, bir sözləri var - haqq və düzlük! Ulu öndər Heydər Əliyev də, Prezident İlham Əliyev də qəbələlilərin bu xüsusiyyətlərini gözəl bilirlər və məhz bu keyfiyyətlərinə görə də - ədalətli və düz olduqlarına görə də onları sevirlər.

Azərbaycan Prezidentinin də bu gün ən böyük silahı ədalət və haqdır. Möhtərəm İlham Əliyev Qəbələdə dünyaya bir daha bəyan etdi ki, heç bir beynəlxalq təsir və təzyiq ölkəmizi yolundan döndərə bilməz. Heç bir əsassız çağırışlar Azərbaycanı güzəştə sövq edə bilməz. Beynəlxalq təşkilatlar antiazərbaycançı şəbəkənin marionet oyuncağı olmamalıdır, dünya erməniliyinin sözçüsünə çevrilməməlidir. Bəli, Prezidentimiz Qəbələdə bütün beynəlxalq təşkilatlara ədalət və obyektivlik dərsi verdi!"

Fəttah müəllim Prezidentin əcnəbi diplomatlarla görüşdə son dövrlərin ən həssas mövzusuna - Azərbaycan zabiti Ramil Səfərovun əfv olunmasına prinsipial və açıq şəkildə münasibət bildirməsini də xüsusi qeyd edir və bir haşiyə çıxır: "50 ildən çoxdur ki, həyatım siyasətlə bağlıdır. Rayon miqyasından başlamış - ATƏT çərçivəsində - Avropa səviyyəsində siyasi proseslərdə yaxından iştirak etmişəm. ATƏT Parlament Assambleyasında Azərbaycan nümayəndə heyətinin üzvü kimi əcnəbi deputatlarla çoxsaylı görüşlərimdə daim ölkəmizə qarşı "ikili standart" yanaşmaların səbəblərini öyrənməyə çalışıram. Lakin onlar hər dəfə "Biz həqiqəti bilirik, amma nə edək ki, dövlətimizin maraqlarından çıxış edirik" - deyə qərəzli mövqelərini gizlətmir, utanmadan çiyinlərini çəkirlər. Belə olan halda, Avropanın həddindən artıq ağır cəza almış Azərbaycan zabitinin əfvi məsələsinə obyektiv münasibət göstərəcəyini, əlbəttə ki, qətiyyən gözləmirdim. Amma dövlətimizin rəhbərinin sırf beynəlxalq hüquq normalarından çıxış edərək bu məsələdə qətiyyət, siyasi iradə, əzm, yenilməzlik nümayiş etdirməsi məndə böyük qürur və fəxarət hissi doğurdu. Prezident bir daha sübuta yetirdi ki, onun üçün Azərbaycanın, eləcə də onun hər bir vətəndaşının mənayefi öndədir!

Hesab edirəm ki, Ramil Səfərov bütövlükdə xalqının təhqir olunmasına dözməyərək affekt vəziyyətində cinayət törətmiş və cəzasını çəkmiş hərbçidir. Ramil Səfərov qəhrəman da deyil... Bütün bu proseslərdə qəhrəman Azərbaycan zabitinin əfvi üçün böyük səy və qətiyyət, siyasi iradə nümayiş etdirmiş Prezident İlham Əliyevdir! Ölkə rəhbəri bu qətiyyətli addımı ilə bir daha hər bir azərbaycanlının layiqli Prezidenti olduğunu, hər addımda ölkəmizin maraqlarını uca tutduğunu sübuta yetirdi! Ulu öndərimiz daim Azərbaycanın maraqları ilə bağlı məsələlərdə yüksək qətiyyət nümayiş etdirir, heç bir təzyiqdən, təhdiddən çəkinmirdi. Mən bu keyfiyyətləri bu gün onun layiqli siyasi davamçısı - Prezident İlham Əliyevdə tam aydınlığı ilə görürəm!"

Heydər Əliyevin həyatı İlham Əliyevin tərcümeyi-halında davam edir

Fəttah Heydərov çağımızın narahat dövr, zamanımızın təlatümlü olduğunu, açıq və gizli düşmənlərimizin yeni məkrli ssenarilər hazırladığını ürək ağrısı ilə danışır. Amma bu günümüzdən necə ki narahat deyil, eynilə də sabahamızdan əsla, nigaran qalmır. Prezidentə, onun bacarığına, xalqa layiqli xidmət missiyasına güvənir və əmindir ki, cənab İlham Əliyev "qurdlar süfrəsindəki" Azərbaycanın qüdrətli, möhtəşəm və söz sahibi mövqeyini hər zaman qoruyacaq.

Söhbətimizin məntiqi yekununu da bu fikirlərlə müəyyənləşdirir Fəttah müəllim: "9 il əvvəli xatırlayıram... Ulu öndər Heydər Əliyevin xalqa ünvanladığı 2003-cü il 1 oktyabr tarixli müraciətini televiziya qarşısında həyəcanla dinləyərək təsirlənmişdim, kövrəlmişdim. Prezident seçkilərində layiqli davamçısı İlham Əliyevin iştirakını lazım bilən ulu öndər Heydər Əliyev özünəməxsus müdrikliklə, uzaqgörənliklə deyirdi: MƏN ONA ÖZÜM QƏDƏR İNANIRAM VƏ GƏLƏCƏYİNƏ BÖYÜK ÜMİDLƏR BƏSLƏYİRƏM. Dahi şəxsiyyət qətiyyən yanılmadı. Heydər Əliyevin siyasi kursunu davam etdirə biləcək yeganə şəxs məhz İlham Əliyev idi və ötən 10 illik zaman məsafəsində bu həqiqət hər məqamda təsdiqini tapdı. Bu gün Heydər Əliyevin bütün həyatı, fəaliyyəti, siyasəti, təcrmeyi-halı Prezident İlham Əliyevin həyatında, siyasətində, tərcümeyi-halında davam edir!

Prezident İlham Əliyev Heydər Əliyevin və milyonlarla azərbaycanlının inamını doğrultmağı bacardı. 10 il əvvəl ulu öndər Heydər Əliyevin söylədiyi bu fikirləri indi biz - dünyada özünə azərbaycanlı deyən 60 milyonluq toplum iftixarla deyirik: biz Sizə özümüz qədər inanırıq, cənab Prezident! Sizin rəhbərliyiniz altında Azərbaycanın daha böyük uğurla imza atacağına da əminik!"

Əgər bu sözləri müdrik ağsaqqal söyləyirsə, əlavə şərhə nə hacət?!.

İxtiyar HÜSEYNLİ

Azərbaycan.-2013.- 3 fevral.- S.6.