Xocalı aeroportunun yenidən açılması ATƏT-in Minsk qrupunun həmsədrliyi ilə aparılan sülh danışıqlarına mənfi təsir göstərəcəkdir

Azərbaycanın ərazisi olan və 1990-cı ildən Ermənistan silahlı qüvvələri tərəfindən işğal edilmiş Dağlıq Qarabağda Xocalı aeroportunun yenidən açılmasına dair atılan hər bir addımı qəti surətdə pisləyirəm. Bu sözləri Avropa Parlamentinin üzvü Kristiina Ojuland Ermənistanın Xocalı aeroportu barədə planlarına dair Avropa Azərbaycan Cəmiyyətinin sualına cavab verərək demişdir.

Avropa Parlamentinin üzvü bildirmişdir ki, bu hərəkət, Ermənistan-Azərbaycan, Dağlıq Qarabağ münaqişəsinin sülh yolu ilə həllinə ciddi ziyan vurmaqla bərabər, beynəlxalq hüququ, yəni BMT Təhlükəsizlik Şurasının dörd qətnaməsini və Çikaqo Konvensiyasını pozacaqdır. K.Ojuland vurğulamışdır ki, Xocalı aeroportunun yenidən açılması ATƏT-in Minsk qrupunun vasitəçiliyi ilə aparılan sülh danışıqlarına mənfi təsir göstərəcəkdir. Bundan əlavə, Ermənistan rəhbərliyinin məsuliyyətsiz təşəbbüsü Avropa İttifaqının sülh prosesinə verdiyi töhfələrə hörmətsizlik kimi qəbul edilə bilər. Bu planın 1992-ci ildə törədilmiş Xocalı faciəsi ilə bağlılığını nəzərə alsaq, bu cür hərəkət bütün regionda gərginliyin artmasına səbəb olacaqdır.

AzərTAc

Azərbaycan.-2013.- 5 fevral.- S.4.