Bakıətrafı qəsəbələr yaşayış üçün rahat məkana çevrilir

Bununla bağlı qəbul edilmiş Dövlət Proqramının icra müddəti cari il başa çatır

2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramında qarşıya qoyulan vəzifələrin icrası nəticəsində ötən il paytaxtın və onun qəsəbələrinin sosial-iqtsadi siması xeyli dəyişib. Əhalinin qaza, suya, elektrik enerjisinə olan tələbatının ödənilməsi, küçə və məhəllədaxili yolların yenidən qurulması, sosial təyinatlı obyektlərin yaradılması və bərpası ilə yanaşı, qəsəbələrin inkişafını sürətləndirən sənaye istehsalı yönümlü zavod və fabriklərin tikintisi və onların müasir avadanlıqla təchiz edilməsi ilə bağlı mühüm tədbirlər həyata keçirilib.

Nazirlər Kabinetinin 2012-ci ilin sosial-iqtisadi inkişafının yekunlarına və 2013-cü ildə qarşıda düran vəzifələrə həsr olunmuş iclasında Prezident İlham Əliyev bu sahədə həyata keçirilən tədbirlərdən danışarkən demişdir: "2012-ci ildə Bakı və onun qəsəbələrinin inkişafı proqramı da uğurla icra edilmişdir, böyük işlər görülmüşdür. Bu il bu proqram başa çatmalıdır. Bütün qəsəbələrdə infrastruktur layihələri icra edilir, yollar salınır, müasir şərait yaradılır. Bu proqramın icrası daim nəzarət altındadır və əminəm ki, bu ilin sonuna qədər qəsəbələrin əsas infrastruktur və sosial proqramları öz həllini tapacaqdır. Biz bu məsələlərə kompleks şəkildə yanaşmışıq. Proqram çox müfəssəldir, genişdir, dəqiqdir. Hər bir məsələ orada nəzərdə tutulub - su, qaz, işıq, yollar, məktəblər, tibb məntəqələri və digər məsələlər. Bu proqramın icra edilməsində biz qəsəbələrdə mövcud problemlərin böyük əksəriyyətini, demək olar ki, aradan götürəcəyik".

Qeyd edək ki, həyata keçirilmiş tədbirlər nəticəsində ötən il sözügedən proqramın icrası çərçivəsində Qaradağda müasir texnologiyaya əsaslanan Sement zavodu, Bərk məişət tullantılarının çeşidlənməsi və yandırılması zavodları da daxil olmaqla bir neçə sənaye müəssisəsi istifadəyə verilib, qalan hissəsinin isə inşası davam etdirilir. Təkcə Azərbaycan İnvestisiya Şirkətinin (AİŞ) iştirakı ilə ötən il Hövsanda Süd emalı və "Holcim-Azərbaycan" yeni Sement zavodları fəaliyyətə başlayıb. Səngəçal Neft və Qaz Terminalının, eləcə də Duz istehsalı zavodunun uğurlu fəaliyyətləri nəzərə alınaraq AİŞ öz sərmayə payını digər tərəfdaşlarına satmaqla bu layihələrdə missiyasını başa çatdırıb. Ümumiyyətlə, "2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı"nın icrası ilə ilə əlaqədar ötən dövr ərzində 400 investisiya layihəsinin maliyyələşdirilməsinə 72 milyon manat güzəştli kredit verilib.

Bunlarla yanaşı, paytaxtın və onun qəsəbələrinin sosial-iqtisadi inkişafına dair Dövlət Proqramı çərçivəsində Bakıətrafı kənd və qəsəbələrdə əhalinin rahatlığını, həyat səviyyəsini daha da yaxşılaşdırmaq məqsədilə digər tədbirlər də həyata keçirilib. İlk növbədə, qəsəbələrin qaz, su, kanalizasiya və fasiləsiz enerji ilə təminatı diqqətdə olub, bu sahədə mühüm işlər görülüb. Eyni zamanda, təzə yaşayış binaları istifadəyə verilib, bir çox sosial obyektlərin istilik sistemi yenidən qurulub, qəsəbələrarası yollar təmir olunub, qəsəbədaxili yollara asfalt örtüyü salınıb, eləcə də 134 məktəb və 71 uşaq bağçası, 27 səhiyyə, 9 mədəniyyət və idman obyektlərində tikinti və əsaslı təmir işləri başa çatdırılıb. Hazırda isə 85 sosial obyektdə təmir-tikinti işləri davam edir.

Ötən il Bakı və onun kənd və qəsəbələrində müvəqqəti məskunlaşmış məcburu köçkünlərin həyat və mənzil şəraitinin yaxşılaşdırılmasında da xeyli irəliləyiş olub. Belə ki, son 20 ildə həcminə görə ən böyük - 1300 şagirdlik məktəb ötən il məhz məcburi köçkünlər üçün Qaradağ rayonunun Müşfiqabad qəsəbəsində tikilib. Həmçinin paytaxtın müxtəlif ali məktəblərinin yataqxanalarında müvəqqəti məskunlaşmış məcburi köçkünlər üçün Bakıətrafı qəsəbələrdə müasir standartlara cavab verən yaşayış binaları inşa olunub, zəruri infrastruktur yaradılıb. Cari ildə Bakı Dövlət Universitetinin və Bakı Dövlət Neft Akademiyasının yataqxanalarında müvəqqəti məskunlaşdırılmış məcburi köçkünlər yeni yaşayış binalarına köçürüləcək. Bundan başqa, Bakıdakı yataqxanalardan 90 min nəfər köçkünün müvəqqəti məskunlaşdırılması və onlar üçün iş yerlərinin yaradılması məqsədi ilə Abşeron rayonunun Qobu bələdiyyəsinin ərazisindən 380 hektar torpaq sahəsi ayrılıb və əlavə olaraq daha 120 hektar torpaq sahəsinin ayrılması gözlənilir. Hazırda Qobu şəhər məcburi köçkün yaşayış massivinin layihələndirilməsi və onun idarəetmə strukturunun yaradılması istiqamətində müvafiq işlər görülür. Bakıdakı digər obyektlərdə - hərbi hissələrdə, məktəb, bağça, sanatoriya, pansionat, tikintisi yarımçıq qalmış binalarda, zəbt olunmuş mənzillərdə yaşayan 110 min məcburi köçkünün müvəqqəti məskunlaşdırılması üçün əlavə 500 hektar torpaq sahəsinin ayrılması da gündəmdədir.

Yeri gəlmişkən qeyd edək ki, həmişə olduğu kimi, Heydər Əliyev Fondunun Bakıətrafı qəsəbələrdə təhsil, səhiyyə, mədəniyyət və digər sosial layihələrin reallaşmasında rolu və qayğısı böyükdür.

Nazirlər Kabinetinin 2012-ci ilin sosial-iqtisadi inkişafının yekunlarına və 2013-cü ildə qarşıda düran vəzifələrə həsr olunmuş iclasında ölkə başçısı demişdir: "Bakı və onun qəsəbələrinin inkişafı proqramı bu il başa çatmalıdır. Bu da çox ciddi, böyük, qısamüddətli, eyni zamanda, çox təsirli proqramdır və bu il biz bu proqramı başa çatdıracağıq". Və indiyəcən həyata keçirilən tədbirlər, işlərin sürəti bu qənaətin reallığını əks etdirir.

Rəhman SALMANLI

Azərbaycan.-2013.- 5 fevral.- S.6.