Xarici işlər nazirlərinin Romada «BMT Təhlükəsizlik Şurası islahatına yeni yanaşmalar»
mövzusunda konfransı keçirilmişdir
Romada
İtaliyanın və İspaniyanın birgə sədrliyi ilə
"BMT Təhlükəsizlik Şurası islahatına yeni
yanaşmalar" mövzusunda xarici işlər nazirlərinin
konfransı keçirilmişdir.
Xarici
İşlər Nazirliyinin mətbuat xidmətindən AzərTAc-a
bildirmişlər ki, dünyanın 70 ölkəsindən
nümayəndələrin iştirakı ilə
keçirilmiş konfransda Azərbaycanı xarici işlər
naziri Elmar Məmmədyarov təmsil etmişdir.
İtaliya
hökumətinin təşəbbüsü ilə artıq
üçüncü dəfə keçirilən
konfransın məqsədi BMT-nin Təhlükəsizlik
Şurasının islahatı mövzusunda dünyanın
müxtəlif bölgələrindən olan təşkilata
üzv dövlətlər arasında siyasi dialoqu
yaratmaqdır. Təşkilatın mövcud strukturu artıq
müasir dövrün reallığını əks etdirmir.
Bununla yanaşı, yeni üzvlərin sayı, onların
coğrafi bölgüsü və "veto" hüququ barədə
kifayət qədər ziddiyyətli fikirlər vardır.
Konfransda
İtaliyanın xarici işlər naziri Culio Tertsi və
İspaniyanın xarici əlaqələr üzrə dövlət
katibi Gonzalo de Benito Secades çıxış etmişlər.
Nazir
E.Məmmədyarov konfransda çıxış edərək
bildirmişdir ki, BMT-nin Nizamnaməsinə əsasən, qurumun
Təhlükəsizlik Şurası beynəlxalq sülhün
və təhlükəsizliyin qorunub saxlanması
üçün məsuliyyət daşıyan başlıca
orqandır və bu istiqamətdə mühüm töhfələr
vermişdir. Vurğulanmışdır ki, müasir
dövrün çoxtərəfli
çağırışlarına və təhlükələrinə
cavab vermək üçün BMT-nin bütöv sisteminin,
xüsusilə Təhlükəsizlik Şurasının
islahatlara ehtiyacı vardır. Təhlükəsizlik
Şurasının səmərəliliyinin
artırılması üçün onun qəbul etdiyi qərarlara,
xüsusilə beynəlxalq sülhün və təhlükəsizliyin
qorunub saxlanmasına yönəlmiş qətnamələrə
BMT-nin üzvü olan dövlətlər tərəfindən
qeyd-şərtsiz əməl olunması vacibdir.
Konfrans
çərçivəsində E.Məmmədyarov
albaniyalı həmkarı Edmond Panariti ilə
görüşmüşdür. Görüşdə ölkələrimiz
arasında münasibətlər və
qarşılıqlı maraq doğuran məsələlərə
dair fikir mübadiləsi aparılmışdır.
E.Panariti
azərbaycanlı həmkarını Albaniyaya səfərə
dəvət etmişdir.
Konfransdan
sonra E.Məmmədyarov Romanın Villa Borqeze parkında dahi Azərbaycan
şairi Nizami Gəncəvinin abidəsini ziyarət etmiş və
önünə əklil qoymuşdur.
Azərbaycan.-2013.- 7 fevral.- S.3.