Azərbaycan dünya miqyasında dinamik inkişaf edən müasir, güclü ölkə kimi tanınır

Bu fikirləri Prezident İlham Əliyev 2015-ci ildə Bakıda keçiriləcək Birinci Avropa Oyunları Təşkilat Komitəsinin ilk iclasında bildirib

Müstəqil Azərbaycan aparıcı beynəlxalq təşkilatlar çərçivəsində özünün maraq və mənafeyini maksimum dərəcədə təmin etmişdir. Prezident İlham Əliyev ulu öndərin böyük uzaqgörənliklə irəli sürdüyü xarici siyasət kursunu yeni dövrün tələblərinə uyğun zənginləşdirmiş, Azərbaycanın beynəlxalq arenada nüfuzunun daha da yüksəlməsinə, müstəqil siyasət yeritməklə milli maraqlarını maksimum səviyyədə təmin etməyə nail olmuşdur. Dünya siyasətini istiqamətləndirən böyük dövlətlərlə qarşılıqlı faydalı əməkdaşlığı genişləndirmək, beynəlxalq ictimaiyyətdə respublikamızda həyata keçirilən mütərəqqi iqtisadi, siyasi, hüquqi islahatlar barədə dolğun təsəvvür yaratmaq dövlət başçısı İlham Əliyevin xarici siyasətinin prioritet məqsədləri sırasında xüsusi vurğulana bilər.

Azərbaycanın nəinki qonşu, ümumən dünya siyasətində əsas söz sahibi olan bütün ölkələrlə əlaqələrini son illərdə daha da inkişaf etdirməyə nail olması, regionda sülh, sabitlik və iqtisadi əməkdaşlıq təşəbbüslərini fəal şəkildə dəstəkləməsi fonunda BMT-dəki tarixi qələbəmiz də məntiqəuyğun idi. Erməni lobbisinin, təcavüzkar Ermənistanın Azərbaycana qarşı apardığı məkrli informasiya siyasəti şəraitində 193 BMT üzvündən 155-nin birbaşa dəstəyinə nail olmaq respublikamızın xarici siyasətinin ümumi mahiyyəti barədə tamamilə dolğun təəssürat yaradır.

Azərbaycanın sivil dünyanın hüquqi-siyasi atmosferinin müəyyənləşməsində mühüm rolu olan Birləşmiş Millətlər Təşkilatının Təhlükəsizlik Şurasının qeyri-daimi üzvü seçilməsi bütövlükdə müasir tariximizin ən əlamətdar, qürur doğuran hadisələrindən biri kimi yadda qalmışdır. Bu möhtəşəm hadisə ilk növbədə rəsmi Bakının son dərəcə sabit və uğurlu, eyni zamanda sivil beynəlxalq dinc yanaşı yaşam normalarına əsaslanan tarazlı siyasət yürütdüyünü bir daha təsdiqləməklə yanaşı, müstəqil Azərbaycanın beynəlxalq miqyasda artan nüfuzunun parlaq təcəssümü kimi dəyərləndirilə bilər.

BMT-dəki parlaq qələbəmiz son illərdə müstəqil respublikamızın beynəlxalq aləmdə əldə etdiyi ilk diplomatik nailiyyət deyildir. Cənab İlham Əliyevin xarici siyasəti "Ən yaxşı müdafiə hücumdur!" taktikası üzərində qurması nəticəsində Azərbaycan Avropa Şurası, ATƏT, Avropa Birliyi, İslam Əməkdaşlıq Təşkilatı, NATO Parlament Assambleyası və digər mötəbər beynəlxalq təşkilatlarda Ermənistanın təcavüzkar dövlət kimi tanınmasına və ifşasına nail olmuşdur.

Ölkədə aparlan məqsədyönlü tədbirlər nəticəsində Azərbaycan həm də dünya miqyaslı mədəni kütləvi tədbirlərə ev sahibliyi edən mərkəzlərdən birinə çevrilib. 2009-cu ildə Bakının İslam Mədəniyyətinin paytaxtı elan olunması, Mədəniyyətlərarası dialoq forumunun keçirilməsi, dünya dini liderlərinin toplantılarının, eləcə də beynəlxalq miqyaslı idman tədbirlərinin keçirilməsi ölkəmizin bu cür tədbirlərə tam hazır olduğunu göstərdi. 2009-cu ildən başlayaraq Qəbələ şəhərində beynəlxalq musiqi festivallarının keçirilməsi və həmin mötəbər tədbirdə dünyanın ən məşhur musiqiçilərinin iştirakı da Azərbaycanın beynəlxalq aləmdə nüfuzunun ildən-ilə artdığını sübuta yetirdi. Son illər ölkəmizdə mötəbər idman yarışları - sərbəst güləş üzrə Avrora çemrionatı, şahmat üzrə dünya və qitə çemrionatları, habelə boks, cüdo, həndbol, voleybol və digər idman növləri üzrə beynəlxalq turnirlər, yunan-Roma və sərbəst güləş üzrə dünya çemrionatları da keçirilmişdir. "Eurovision" mahnı müsabiqəsinin 2012-ci ilin mayında Azərbaycanda yüksək səviyyədə keçirilməsi bir daha ölkəmizin nüfuzunu göstərdi. Tədbirin ən yüksək səviyyədə keçirilməsini müsabiqə zamanı Azərbaycana gəlmiş əcnəbi qonaqlar və jurnalistlər də təsdiqlədi.

2012-ci il dekabrın 8-də Avropa Olimpiya Komitəsinin Baş Assambleyasında 2015-ci ildə ilk Avropa Olimpiya Oyunlarının Azərbaycanda keçirilməsi haqqında qərarın qəbul edilməsi də böyük uğurdur. Bu günlərdə Prezident İlham Əliyevin sədrliyi ilə 2015-ci ildə Bakıda keçiriləcək Birinci Avropa Oyunları Təşkilat Komitəsinin ilk iclası olmuşdur. Ölkə başçısı, Milli Olimpiya Komitəsinin prezidenti İlham Əliyev mərasimdə bildirib: "Bu tarixi qərarın qəbul edilməsində, əlbəttə ki, ölkəmizin beynəlxalq nüfuzu həlledici rol oynamışdır. Son illər ərzində Azərbaycan dünya miqyasında özünü dinamik inkişaf edən müasir güclü ölkə kimi təqdim edə bilmişdir. Baxmayaraq ki, biz cəmi 21 ildir müstəqil dövlət kimi yaşayırıq, bu gün Azərbaycan dünya miqyasında çox etibarlı tərəfdaş və etibarlı dost kimi tanınır. Bizim beynəlxalq nüfuzumuzun yüksək səviyyədə olmasını eyni zamanda BMT Təhlükəsizlik Şurasına üzv seçilməyimiz də təsdiqləyir. Bu da tarixi bir qərar idi. Müstəqilliyimizin 20-ci ildönümünə təsadüf edən bu tarixi qərar əslində 20 il ərzində görülən işlərin təzahürü idi. Bu gün Azərbaycan dünya birliyinin bir nömrəli qurumunun üzvüdür və keçən ilin may ayında BMT Təhlükəsizlik Şurasına sədrlik etmişdir".

Birinci Avropa Oyunları 2015-ci ilin iyun-iyul aylarında paytaxtımızda keçiriləcəkdir. Bu oyunlarda Avropa Olimpiya Komitəsinin üzv ölkələrinin iştirakı gözlənilir. Bakıda keçiriləcək yarışlarda 5 min nəfərədək idmançının iştirakı nəzərdə tutulub. Rəsmi nümayəndə heyətinin sayının təxminən min olması gözlənilir. Tədbirin işıqlandırılması üçün Bakıya kütləvi informasiya vasitələrinin 2 min nəfərədək nümayəndəsi də gələcəkdir. Son illər Bakıda təşkil edilən beynəlxalq idman tədbirlərinin ən yüksək səviyyədə keçirilməsi iştirakçı ölkələrin nümayəndələri tərəfindən də müsbət dəyərləndirilir. Azərbaycanın iqtisadi, siyasi, mədəni və digər sahələrdə əldə etdiyi nailiyyətlər daha böyük uğurların əldə olunacağına əminlik yaradır.

Bakıda keçiriləcək Birinci Avropa Oyunları Təşkilat Komitəsinin sədri Mehriban xanım Əliyeva bildirib: "2012-ci il dekabrın 8-də Romada Avropa Olimpiya Komitəsinin 41-ci Baş Assambleyasında 2015-ci ildə Birinci Avropa Oyunlarının Azərbaycanda keçirilməsi barədə qərar qəbul edilmişdir. Avropa Olimpiya Komitəsinin üzvü olan 49 milli olimpiya komitəsindən 48-nin iştirakı ilə keçirilmiş gizli səsvermədə 38 ölkə lehinə, 8 ölkə əleyhinə, 2 ölkə bitərəf olmaqla Birinci Avropa Oyunlarının Bakıda keçirilməsi təsdiqlənmişdir. Birinci Avropa Oyunlarının Bakıda keçirilməsi ölkəmiz üçün, ümumiyyətlə, bütün Avropa Olimpiya hərəkatı üçün tarixi hadisədir. Regionun lider dövlətinə çevrilən Azərbaycanın sürətli inkişafı, dünya birliyində tutduğu mövqe, mövcud ictimai-siyasi sabitlik beynəlxalq ictimaiyyətdə əminlik yaradıb ki, ölkəmiz bu mötəbər tədbirə uğurla ev sahibliyi edə biləcəkdir. Bu qərarın qəbul edilməsi respublikamızda çoxsaylı idman yarışlarının, Avropa və dünya çempionatlarının yüksək səviyyədə keçirilməsinə, idmançılarımızın beynəlxalq yarışlarda əldə etdikləri nailiyyətlərə, ümumilikdə Azərbaycanda idman sahəsində görülmüş işlərə beynəlxalq və Avropa Olimpiya Komitəsi tərəfindən verilən yüksək qiymətdir".

Prezident İlham Əliyevin apardığı uğurlu siyasət nəticəsində Azərbaycan bütün sahələr üzrə regionun ən güclü və qüdrətli dövlətinə çevrilib. Bütün bunların nəticəsi olaraq Azərbaycan hazırda daha geniş geosiyasi arealda sülh, tərəqqi və sabitlik, iqtisadi əməkdaşlıq mərkəzi kimi tanınır. Azərbaycanın xarici siyasət kursu milli maraqların prioritetliyi şərti ilə respublikamızın beynəlxalq miqyasda özünü təsdiqləməsinə, iqtisadi-siyasi potensialını effektiv surətdə reallaşdırmasına və təhlükəsizliyini hərtərəfli təmin etməsinə təminat yaradır.

Elnur HACALIYEV

Azərbaycan.-2013.- 7 fevral.- S.7.