Əylisin havası, suyu
sənə haram olsun!
Neçə
gündür ki, əsəblərim tarıma çəkilib.
80-nə yaxın yaşım var. Ordubad rayonunda anadan
olmuşam. Heç bilmirəm ki, ömrümün bu
çağında mən niyə bu cür iyrənc bir hadisə
ilə üz-üzə dayandım? Yazıçı Əkrəm
Əylislinin millətimizin əleyhinə yazdığı
"Daş yuxular" kitabı barədə
aldığım məlumat məni bərk sarsıtdı.
Hiddət və qəzəbimi bilmirəm ki, necə ifadə
edim? Vallah, bu, adi iş deyil. Görünür, Əkrəm Əylisli
ağlını itirib. Görən, xəbəri varmı ki,
Ordubadda ona qarşı insanlar necə nifrət hissi ilə
aşıb-daşırlar.
Əylis
kəndi Ordubadın ən səfalı, ən dilbər,
gözəl ab-havası olan bir guşəsidir. Qədim
zamanlardan məscidi, kəhrizi, gözəl evləri olan Əylisi
əvvəllər "bala İstanbul"
adlandırardılar. Bunun da səbəbi var idi. Əylisin
gözəlliyində İstanbula bir oxşarlıq
tapılmışdı. Ermənilər bu kəndə sonradan
gəlmişdilər. Bu yaşayış məskəni dədə-babadan
türklərə məxsus olub. Mənim rəhmətlik
qayınanam Mədinə xanım Əylisdə
doğulmuşdu. O, mənə danışardı ki,
1905-1906-cı illərdə ermənilər Əylisə
hücum edərək yaşlı qadınları, kişiləri,
azyaşlı uşaqları, hamilə gəlinləri
süngülərə keçirərək vəhşicəsinə
qətlə yetirmiş, sonra da onları bir-birinin üstünə
qalaqlayaraq yandırmışlar. Kənd sakini, dini təhsilini
Məkkədə almış Molla Həsən Qurani-Kərimi
əlinə alaraq erməni daşnaklarının
qarşısına çıxıb. Onlara yalvarıb ki,
günahsız insanları öldürməyin. Bu saf insana elə
gəlib ki, ermənilər müqəddəs Qurandan keçməzlər.
Erməni quldurları onu kitabı ilə birgə
süngüyə taxıb diri-diri yandırmışdılar.
Qayınanam deyərdi ki, birtəhər canımızı
xilas edib Ordubada qaçdıq. Əgər türkiyəli
qardaşlarımız köməyə gəlməsəydilər,
kim bilir, ordubadlıların, xüsusilə də əylislilərin
aqibəti necə olacaqdı? Məhz onların gəlişindən
sonra qırğın dayandırılmışdı. Bu barədə
yazıçı-jurnalist Həsən Valeh "Bir tarixdir
Ordubad" adlı kitabında hər şeyi olduğu kimi
yazıb. Onu indi də oxuyanda rəhmətlik qayınanamı
xatırlayıram. Çünki onun söylədikləri ilə
kitabdakılar eyniyyət təşkil edir. Başımız nələr
çəkmədi. Son dövrlərdə mənim şahidi
olduğum hadisələr səhhətimdə problem
yaratdı, həyat yoldaşımın ürəyi
dayandı. Əkrəm Əylisli isə naxələflik edərək
millətin başına gələn faciələrə
göz yumur, haqsız ermənilərə haqq
qazandırmağa çalışır.
Sumqayıt
hadisələri, 20 Yanvar, vertolyotda qətlə yetirilən
ziyalılarımız, Xocalı faciəsi, müxtəlif
terrorlar və indiyədək davam edən məkrli
alçaqlıqlar. Niyə bunlardan yazmadın, Əkrəm Əylisli?
Özüm şahidəm ki, indiki Ermənistandan,
xalqımızın tarixi torpaqlarından vəhşiliklə
qovulan soydaşlarımız Bakıya hansı vəziyyətdə
gəlmişdilər. Döyülmüş,
söyülmüş, müxtəlif xəsarətlər
almış bu binəsiblərin nə qalmağa yerləri, nə
geyinməyə paltarları, nə də
sığınmağa kimsələri var idi. Bakıdan gedən
ermənilər isə hadisələrdən çox-çox əvvəl
banklarda olan pullarını da almışdılar, əşyalarını
da çıxarmışdılar, özləri də
yumşaq vaqonlarda, təyyarələrdə başqa yerlərə
uçmuşdular. Heç onlar Ermənistanı bəyənmədilər.
Bu barədə dəfələrlə deyilib. Qansız Əkrəm,
necə vicdanına sığışdıra bilirsən ki,
bu qədər şər, böhtan yazmısan?!
"Yeraz"lar Bakıda ermənini qırdı" - deyirsən.
Niyə bəs bu məsələnin dərinliyinə
varmırsan ki, "yeraz" bu şəhərə niyə gəlmişdi?
Başına at təpmişdi. Varını, dövlətini,
ev-eşiyini, bağını, mülkünü qoyub
ac-yalavac, pay-piyada qaçqına çevrilsin? Hələ Əylislə
əlaqədar yazdığın fikir. Vallah, oxucular məni
qınamasın. Mən anayam, nənəyəm, indiyə qədər
dilimə turş söz gətirməmişəm. Bu
ağbirçək vaxtımda Əkrəm Əylisli
görün məni necə qəzəbləndirib, hansı
hala gətirib ki, əsəblərimi cilovlaya bilmirəm. Əylisin
çörəyi burnundan gəlsin! Sən əylisli
qadınların - müsəlmanların ünvanına
ağzıgöyçəklik edir, təhqirli ifadələr
işlədir, erməni "harsın"larını isə
göyə qaldırırsan. Bilirmisən ki, sən öz
qohumlarını, həmvətənlərini, həmyerlilərini
pis vəziyyətdə qoymusan? Onlar xəcalətdən bilmirlər
ki, neyləsinlər? Bəri başdan səni xəbərdarlıq
edirik. Birdən yolunu Əylisə salarsan, ha? Sənin daha o kəndə
gəlməyə haqqın yoxdur! Əylis səndən imtina
edir! Bir adam yaza ki, Əylisdə türklər tərəfindən
öldürülən hər bir erməninin qəbri
üstündə bir şam yandırılsa, Ayın
işığından parlaq olar, belə bir adamın
ömür-billah Əylisdə bir saat qalması mümkün
deyil! Bu, hədə deyil, hədəf də deyilsən! Sadəcə,
xəyanətinin nəticəsidir!
Eşitdiyimə
görə, ermənilər sənə özlərinə məxsus
ad və soyad da veriblər. Bizim adımız, soyadımız
sənə hayıfdır! Get layiq olduğun ad və
soyadını qəbul et! Bu yaşda
azğınlaşmağın axırı belə də
olmalıdır! Sən çörəyi dizində olan,
yaxşılığı bilməyən, söhrət
azarına tutulmuş, erməni xislətindən ömür
boyu bir addım da uzaqlaşmayan naqissən!
Utanıb-qızarmadan da özünü Mirzə Cəlillə,
Mirzə Fətəli Axundzadə ilə müqayisə edirsən.
Hər iki şərəfli insan öz
yaradıcılığında nadanlığa, cahilliyə
qarşı mübarizə aparıblar! Sən neyləmisən?
Öz xalqına, millətinə qara yaxaraq xəyanət etmisən.
Bu sözləri də deyəndə bir ağrı
keçirirəm. Çünki indi əylislilər sənin
haqqında maraqlı şeylər danışırlar.
Uşaqlığından, erməni qadının sinəsindən
süd əmməyindən, ömrün boyu nala-mıxa
vurmağından, içinin kin-küdurətlə dolu
olmağından, paxıllığından, heç kəsi
sevməməyindən, özündən başqa bir kimsəni
bəyənməməyindən. Keçmişləri
xatırlayanda yadıma çox şey düşür. Sən
həmişə belə naxələf olmusan! Heydər Əliyevlə
üz-üzə gələndə mədhiyyə demisən,
arxada isə deyinmisən, mükafat verəndə sevinmisən,
təltifdən kənarda qalanda sifətini dəyişmisən,
gah mələk donuna bürünmüsən, gah da şeytan
libasını geymisən. Ümumiyyətlə, bilmirəm, səni
necə adlandırım? İndi əylislilər
üçün Z.Balayan, S.Xanzadyan, S.Kaputikyan, ya da sən! Fərq
etmir! Məni yandırıb-yaxan odur ki, qaytar mənim kəndimin
adını soyadından! Sən ömrü boyu suyunu
içib, çörəyini yediyin vətəninə xəyanət
etdin! Bütün bunlardan sonra isə sən yenə də
özünə haqq qazandırmağa
çalışırsan. Artıq sənin bütün iyrənc
niyyətlərin bəllidir!
Səriyyə ƏBÜLHƏSƏNOVA,
Naxçıvan
Azərbaycan.-2013.- 7 fevral.- S.8.