Azərbaycan XX Minsk Beynəlxalq kitab sərgi-yarmarkasında layiqincə təmsil olunmuşdur

Belarus paytaxtındakı "BelEkspo" Milli Sərgi Mərkəzində XX Minsk Beynəlxalq kitab sərgi-yarmarkası açılmışdır. 24 ölkənin, o cümlədən Belarus, Azərbaycan, Almaniya, İtaliya, Çin, Polşa, ABŞ, Türkiyə, Fransa, MDB üzvü olan bəzi başqa dövlətlərin iştirak etdiyi yubiley sərgisində Belarusda Kitab İli elan edilmiş 2012-ci ilə yekun vurmaq nəzərdə tutulur.

Sərgi-yarmarkanın Azərbaycana aid stendində nadir miniatür nəşrlər təmsil olunmuşdur. 1994-cü il sentyabrın 20-də "Gülüstan" sarayında "Əsrin müqaviləsi"nin imzalanması mərasimində Azərbaycan xalqının ümummilli lideri Heydər Əliyevin nitqinin daxil edildiyi "Heydər Əliyev. Neft strategiyası" kitabı da bu ekspozisiyada nümayiş etdirilir.

Sərgiyə gələnlər Bakıda nəşr olunmuş miniatür nəşrlərlə - akademik Zərifə Əliyeva, akademik Ziya Bünyadov, rejissor Hüseyn Seyidzadə, Azərbaycanın digər görkəmli adamlarına həsr edilmiş nəfis kitablarla da tanış olacaqlar. Ekspozisiyada Belarus ədəbiyyatının klassiki Yanka Kupalanın 1908-ci ildə çapdan çıxmış "Yanka Kupalanın tütəyi" adlı ilk şeirlər məcmuəsinin reprint nəşri də təqdim olunur.

Xatırladaq ki, Azərbaycan stendindəki nəşrləri Bakı Miniatür Kitab Muzeyinin banisi, Azərbaycan Respublikası "Kitab" Cəmiyyəti İdarə Heyətinin sədri Zərifə Salahova təqdim edəcəkdir. Minsk Beynəlxalq kitab sərgi-yarmarkasının təntənəli açılış mərasimində Azərbaycanın Belarusdakı səfirliyinin əməkdaşları iştirak etmişlər.

XX Minsk Beynəlxalq kitab sərgi-yarmarkası fevralın 10-dək davam edəcəkdir.

Zeynal AĞAZADƏ,

AzərTAc-ın xüsusi müxbiri

Minsk

Azərbaycan.-2013.- 7 fevral.- S.11.