İslam Əməkdaşlıq Təşkilatının
XII zirvə görüşü Azərbaycan üçün əhəmiyyətli
məqamlarla yadda qalmışdır
İslam
Əməkdaşlıq Təşkilatının (İƏT)
Qahirədə keçirilmiş 12-ci zirvə
görüşü uğurla başa çatmış və
qəbul olunmuş yekun sənəddə Azərbaycanın
milli maraqlarını əks etdirən müddəalar yer
almışdır.
Bu
sözləri fevralın 8-də mətbuat üçün
keçirdiyi brifinqdə Azərbaycanın Xarici İşlər
Nazirliyinin (XİN) mətbuat xidmətinin rəhbəri Elman
Abdullayev demişdir.
XİN
rəsmisi bildirmişdir ki, sammitdə iştirak edən dövlət
və hökumət başçılarının rəylərinə
əsasən qəbul edilmiş yekun sənəddə Azərbaycanın
Xocalı şəhərində Ermənistana məxsus
silahlı dəstələrin törətdikləri qətliamın
soyqırımı kimi tanınması haqqında beynəlxalq
birliyə çağırış öz əksini
tapmışdır.
Qeyd
olunmuşdur ki, İƏT-ə üzv olan 57 dövlət Azərbaycanın
ərazi bütövlüyü və suverenliyini
tanıyır.
E.Abdullayev
bildirmişdir ki, sammitdə iştirak edən Azərbaycanın
xarici işlər naziri Elmar Məmmədyarovun
çıxışı üzv dövlətlərin
başçılarına paylanmışdır.
Çıxışda Azərbaycanın Fələstində,
Suriyada, Malidə baş verən siyasi hadisələrə dair
mövqeyi açıqlanmışdır.
İƏT
ölkələri Azərbaycan Prezidentinin beynəlxalq
terrorçuluğun qarşısının alınmasında
dünya birliyinin səylərinin gücləndirilməsinə
dair konfransın cari ildə Bakıda mart ayının 18-19-da
keçirilməsi təklifini qəbul etmiş, onu yüksək
qiymətləndirmişlər.
Zirvə
görüşündə Azərbaycanın beynəlxalq
gücünün artması və bir çox siyasi məsələlərə
təsir etmək iqtidarına malik olması nəzərə
alınaraq İƏT çərçivəsində fəaliyyət
göstərən Cami-Kəşmir əlaqə qrupuna daxil
edilməsi təklif olunmuşdur. Bu təkliflə
Pakistanın xarici işlər naziri xanım Hina Rəbbani Xar
çıxış etmişdir.
Qeyd
etmək lazımdır ki, İƏT çərçivəsində
münaqişələrin həlli yollarının müzakirəsi
ilə məşğul olan bir neçə əlaqə qrupu
vardır. Bu qruplar ərazi, dini və başqa münaqişələri
müzakirə edərək tövsiyələrlə
çıxış edirlər.
Azərbaycan.-2013.- 9 fevral.- S.10.