Amerika nəşrləri Azərbaycanın birinci telekommunikasiya peykinin kosmosa buraxılması barədə yazmışlar

Xəbər verdiyimiz kimi, Azərbaycanın birinci telekommunikasiya peyki "Azərspace-1" fevralın 8-də Fransa Qvianasındakı Kuru kosmodromundan kosmosa buraxılmışdır. Dünyanın müxtəlif ölkələrində yaşayan azərbaycanlılar www.arianespace.tv saytı ilə birbaşa yayımlanan peykin buraxılması prosesini müşahidə etmiş və onun funksional imkanları barədə ətraflı məlumat əldə etmişlər. Azərbaycanın ABŞ-dakı səfiri Elin Süleymanov bu tarixi hadisəni Azərbaycan xalqının qürur günü adlandırmışdır. Səfir bildirmişdir ki, "Azərbaycanın birinci telekommunikasiya peykinin müvəffəqiyyətlə buraxılması ABŞ sənayesinin və Azərbaycan hökumətinin uğurlu tərəfdaşlığının mühüm mərhələsinin ifadəsidir. Bu peyk Azərbaycanın, Qafqaz regionunun, Mərkəzi Asiya, Avropa və Afrika ölkələrinin kommunikasiyaya olan tələbatını indinin özündə və gələcəkdə təmin edəcəkdir".

Azərbaycan peykinin buraxılması və onun istər Azərbaycan-Amerika münasibətləri, istərsə də peykin xidmətlərindən istifadə edəcək ölkələr üçün əhəmiyyəti Amerikada çıxan qəzet və jurnallarda, xüsusən, "Pittsburgh Business Times", "International Business Times", "Houston Business Journal", "Chicago Business Journal", "California Chronicle", "Boston Business Journal", "Baltimore Business Journal", "Atlanta Business Chronicle" kimi iqtisadi nəşrlərdə və "Röyter" agentliyinin informasiyalarında əksini tapmışdır.

"Orbital Sciences Corporation" şirkəti "Azərkosmos" ASC və Azərbaycan Respublikasının Rabitə və İnformasiya Texnologiyaları Nazirliyi ilə imzalanmış müqavilənin şərtlərinə görə, 205 milyon dollar məbləğində qabaqcıl telekommunikasiya peyki layihələndirmiş, istehsal etmiş və təyinat yerinə çatdırmışdır. 1500 iş yerinin açılmasına zəmanət verən peykin istehsalı ABŞ ilə Azərbaycan arasında uğurlu ikitərəfli münasibətlərin bariz nümunəsidir. ABŞ-da çıxan "Bloomberg" jurnalının yazdığına görə, iki il ərzində Azərbaycanın ikinci peyki üçün sifariş gözlənilir.

Azərbaycanın birinci telekommunikasiya peyki 15 il ərzində Mərkəzi Asiya, Avropa və Afrika ölkələrinə sürətli internet, teleradio yayımı ilə bağlı xidmətlər göstərəcəkdir. "Orbital" şirkəti peykin son sınaq yoxlamalarını apardıqdan sonra o, "Azərkosmos" ASC tərəfindən Bakı və Naxçıvandakı nəzarət mərkəzlərindən idarə ediləcəkdir.

Yusif BABANLI,

AzərTAc

Vaşinqton

Azərbaycan.-2013.- 10 fevral.- S.6.