Xalqına xəyanət edən Əkrəm Naibovun Azərbaycanda yaşamağa mənəvi haqqı yoxdur

Ə.Naibovun bu yaxınlarda Moskvadakı "Drujba narodov" jurnalında dərc olunmuş "Daş yuxular" romanı bütün vətənpərvər soydaşlarımız kimi, mənim də təəssüf və dərin hiddətimə səbəb oldu. Yəqin ki, yaşadığı dövrü anlamayan, daşnakların azərbaycanlıların başına əsrlər boyu gətirdikləri bəlaları erməni qardaşları kimi qəbul edən bu nankor həmin üzdəniraq romanını yazanda heç olmasa Xocalıda qətlə yetirilən qocaları, qadınları, uşaqları, boruya salınıb qaynaqlanan körpələri göz önünə gətirəydi. Azərbaycanın çörəyini yeyib, suyundan içib, hörmətlə qarşılandığın halda məqam tapıb ona arxadan zərbə vurasan, - bunu sənə nə tarix, nə Xocalıda, Şuşada, Ağdamda, Kəlbəcərdə, Zəngilanda tökülən şəhid qanları, ruhları, nə də ki Azərbaycan xalqı bağışlayar.

Xalq yazıçısı fəxri adı, ali ordenlər almış bir Azərbaycan yazıçısının öz xalqına, millətinə qarşı hikkəli şəkildə böhtanlarla dolu belə bir roman yazması və tərcümə etdirərək başqa bir ölkənin jurnalında nəşr etdirməsi nankorluqdan, çörəyini yeyib, suyunu içdiyi, onu boya-başa çatdıran bir xalqa olan xəyanətindən başqa bir şey deyil. Torpaqlarımızın müdafiəsinə qalxmış Qarabağ şəhidlərinin axıdılan qanı qurumamış, ermənilərin Xocalıda törətdikləri dəhşətli vəhşiliklərin vurduğu yaralar qaysaqlanmamış Azərbaycan millətinə qarşı şantaj dolu belə bir "roman"ın yazılması əslində müəllifin kimliyindən xəbər verir.

Bu il Azərbaycanda prezident seçkiləri keçiriləcək. Azərbaycan xalqının seçimi isə indidən məlumdur. Xalqımız bu seçkidə də Heydər Əliyev siyasi kursunu və bu kursun ən layiqli davamçısı olan Prezident İlham Əliyevi dəstəkləyəcək. Çünki məhz Prezident İlham Əliyev son 10 ildə Azərbaycanın dinamik inkişafına nail olub. Bu gün Azərbaycan BMT Təhlükəsizlik Şurasında təmsil olunan, kosmosda özünün süni peyki olan dövlətdir. Bütün bu uğurlar həm də Azərbaycanın əsl müstəqil dövlət olduğunu nümayiş etdirən mühüm faktorlardır. Bu uğurlar isə antiazərbaycançı şəbəkənin planlarını alt-üst edib. Ona görə onlar müəyyən məkrli planlarla Azərbaycanın ictimai-siyasi həyatına müdaxilə etmək istəyirlər. Bu mənada Ə.Naibovun üzdəniraq əsəri də prezident seçkiləri ərəfəsində, düşmənlərimizin fəallaşdığı bir vaxtda xalqımıza qarşı sifarişlə yazılmış bir əsərdir, real tariximizə xəyanət nümunəsidir.

Ə.Naibovun Prezident İlham Əliyevin sərəncamları ilə fəxri addan və təqaüddən məhrum edilməsi bütün Azərbaycan xalqının ürəyindən xəbər verdi. Vətənə xəyanət etmiş bu adamın Azərbaycanda yaşamağa mənəvi haqqı yoxdur. Artıq ermənilər onu qəhrəman ediblər. Qoy gedib təəssübünü və xiffətini çəkdiyi ermənilərin yanında yaşasın.

Aydın HƏSƏNOV,

istefada olan polkovnik

Azərbaycan.-2013.- 12 fevral.- S.8.