Sosial-iqtisadi layihələrin icrası uğurla davam edir

Son illər Azərbaycanda gerçəkləşdirilən əhəmiyyətli layihələrdən biri də içməli su çəkilişi və kanalizasiya şəbəkəsinin qurulmasıdır. Nazirlər Kabinetinin 2012-ci ilin sosial-iqtisadi inkişafının yekunlarına və 2013-cü ildə qarşıda duran vəzifələrə həsr olunmuş iclasındakı çıxışında prioritet infrastruktur layihələrinin icrasına toxunan Prezident İlham Əliyev demişdir: "Biz ardıcıl olaraq bir neçə il bundan əvvəl içməli su və kanalizasiya layihələrinin icrasına çox ciddi şəkildə başlamışıq".

Bu, çox böyük layihədir. Ölkəmiz üçün bunun əhəmiyyəti çox böyükdür. Çünki bütün dövrlərdə Azərbaycanda, Bakıda və digər bölgələrdə içməli su problemi çox kəskin dayanmışdır. Bölgələrdə, ümumiyyətlə, kanalizasiya xətləri yox idi. Bakının da kanalizasiya sistemi köhnəlmişdir. Bu sahədə böyük quruculuq işləri aparılır və biz yenə də maksimum səviyyədə hədəf seçmişik ki, bu sahədə infrastruktur tamamilə yenilənsin. İndi həm Bakıda, həm də bütün bölgələrdə içməli su və kanalizasiya layihələri icra edilir... Bunlar investisiya proqramında nəzərdə tutulan əsas infrastruktur layihələridir. Bütün müvafiq qurumlar öz vəzifə borclarını yerinə yetirirlər. Bu layihələr keyfiyyətlə və vaxtında icra edilməlidir".

Onu da qeyd etmək lazımdır ki, ölkə üzrə 61 şəhər və rayon mərkəzində su təchizatı və kanalizasiya sistemlərinin yenidən qurulması layihələri icra olunur və bu layihələrdən biri də Ağsuda həyata keçirilir.

Mövcud layihəyə uyğun olaraq, Ağsu şəhərinin su təchizatını yaxşılaşdırmaq üçün 2010-cu ildə saniyədə 30 litr sərfi ilə Quzay kəndindən boru kəməri çəkilib. Bu, şəhərin suya olan tələbatının təxminən yarısının təminatı deməkdir. Şəhərin digər hissəsi isə Ağsuçayın səth suları vasitəsilə təmin olunur. Qərb anbarlarından təmizlənməyən su 4 boru kəməri ilə şimaldan cənuba doğru müxtəlif sahələrə verilir.

Ağsu şəhərinin şərqi paylanma şəbəkəsinin əsas boru kəməri Ağsuçayın şərq sahilində 2,85 kilometr uzunluğunda Heydər Əliyev prospektinin yenidən qurulması layihəsi çərçivəsində 2007-2008-ci illərdə təzələnib. Qalan paylanma boruları isə 1970-ci illərə məxsusdur və yeni sistem üçün istifadəyə yararsız sayılıb.

1985-ci ildə şəhərin cənubunda mərkəzi rayon xəstəxanası tərəfindən tullantı sularını açıq drenaj xəndəyinə ötürmək məqsədi ilə təxminən 1,5 kilometr uzunluğunda kanalizasiya xətti inşa olunub. Başqa bir kanalizasiya xətti isə şəhərin şimalında yerləşən şərab zavodundan başlayaraq bələdiyyə ərazisinin qərb hissəsindəki drenaj kanalına sənaye müəssisələrinin çirkli suyu axıtmaq üçün inşa edilib. Şəhərin əsas küçələrində belə yağış kanalizasiya sistemi mövcud olmayıb.

Yeni layihəyə əsasən kanalizasiya sistemi və çirkli sutəmizləyici qurğu üzrə əraziyə Ağsu şəhəri, Muradlı və Təklə kəndləri daxildir. Bu kəndlərin xətləri magistral kəmərə birləşdiriləcək.

Mütəxəssislərin bildirdiyinə görə, Ağsu şəhərində adambaşına düşən suyun miqdarı günə 180 litr hesablanıb. Bu isə 2030-cu il üçün 24 saat ərzində supaylayıcı şəbəkəyə saniyədə 52.23 litr şərti ilə su verməklə 1.650.000 kubmetr il su tələbatı deməkdir.

Ağsu RİH-in başçısı Ənvər Seyidəliyev söhbət zamanı bildirdi ki, su və kanalizasiya layihəsinin icrası davam edir və bu işlər başa çatandan sonra qazılmış şəhəriçi yolların hamısı yüksək səviyyədə bərpa olunacaq. Yoldan söz düşmüşkən, bu sahə ilə bağlı Ağsuda əhəmiyyətli işlər görülür. Ağsuda kənd yollarının tikintisi üçün Prezidentin Ehtiyat Fondundan Ağsu Rayon İcra Hakimiyyətinə 6 milyon manat vəsait ayrılıb. Həmin vəsaitlə Ağsu-Çaparlı-Göylər avtomobil yolu çəkilir. 14 min əhalisi olan 13 kəndi birləşdirən bu yolun uzunluğu 27 kilometrdir. Yaxın vaxtlarda istifadəyə veriləcək yolun üzərində 3 müasir körpünün tikintisi başa çatdırılıb.

Ağsuda olarkən digər tikinti işləri ilə də maraqlandıq. Dövlət başçısının başqa bir sərəncamı ilə Prezidentin Ehtiyat Fondundan ilkin olaraq ayrılan 6 milyon manat vəsait hesabına yeni mərkəzi xəstəxana inşa olunur. Hazırda 3,3 hektar ərazidə tikinti işləri davam edir. Bu möhtəşəm xəstəxana kompleksinin 2014-cü ildə istifadəyə verilməsi nəzərdə tutulub.

Səfərbərlik və Hərbi Xidmətə Çağırış üzrə Dövlət Xidməti Ağsu rayon şöbəsi üçün inzibati binanın, həmçinin Rayonlararası Miqrasiya İdarəsi və "Aqrolizinq" ASC-nin rayon filialı üçün yeni binaların da tikintisi davam edir.

Bunlardan əlavə, rayonun Rəhimli və Qəşəd kənd tam orta məktəbləri üçün 180 yerlik yeni məktəb binaları tikilir. Regionların sosial-iqtisadi inkişafına dair Dövlət Proqramına uyğun olaraq 2013-cü ildə Dilman, Muradlı (tam orta) və Keçdəməz əsas məktəbləri üçün 80 yerlik yeni binaların tikintisi də nəzərdə tutulub.

Digər tikintilərdən də söz açmaq olar. Ən əsası odur ki, dövlətin yüksək qayğısı sayəsində Ağsu daha da abadlaşır, müasir infrastruktura malik bir bölgəyə çevrilir. Bu isə həm də insanların daha rahat həyat tərzinin formalaşması deməkdir.

Telman NƏZƏRLİ

Azərbaycan.-2013.- 12 fevral.- S.10.