Xaçmazda «Liderlik məktəbi
- qış parlamenti» layihəsinin açılış mərasimi
olmuşdur
Fevralın
12-də Xaçmazda Azərbaycan Tələbə Gənclər
Təşkilatları İttifaqının (ATGTİ) Gənclər
və İdman Nazirliyinin dəstəyi ilə
reallaşdırdığı "VI liderlik məktəbi -
qış parlamenti" layihəsinin açılış mərasimi
keçirilmişdir.
AzərTAc
xəbər verir ki, "Atlant" istirahət və əyləncə
mərkəzində keçirilən mərasimdə liderlik məktəbinin
iştirakçıları ilə yanaşı, Azərbaycan
Respublikasının Prezidenti Administrasiyasının, Gənclər
və İdman Nazirliyinin və Xaçmaz Rayon İcra Hakimiyyətinin
nümayəndələri də iştirak etmişlər.
Mərasimdə
ATGTİ-nin sədri Şahin İsmayılov layihə
haqqında geniş məlumat verərək bildirmişdir ki,
layihənin ilk seçim mərhələsində 1200-ə
yaxın tələbə gəncin elektron ərizəsi
qeydiyyata alınmış, iki mərhələdə
keçirilmiş seçimlərdən sonra onlardan 125 nəfəri
"VI liderlik məktəbi - qış parlamenti"nin
üzvü adını qazanmışdır.
Ş.İsmayılov
qeyd etmişdir ki, layihə öz formatına görə
ATGTİ-nin əvvəlki liderlik məktəblərindən fərqli
olacaqdır. Bu dəfə "Qış parlamenti"ndə
iştirakçılar komandalara deyil, müxtəlif komitələrə
bölünəcəklər.
"Qış
parlamenti" çərçivəsində gənc
parlamentarilər layihənin ümumi şüarını
seçərək hər biri öz komitəsinin baza prinsiplərinə
uyğun layihələr yazıb təqdim edəcəkdir.
Layihə ərzində tələbə gənclərin irəli
sürdükləri yeni ideyaların, təklif və yeni layihələrin
daha sonra ATGTİ-nin xətti ilə Milli Məclisin bu və ya
digər komitəsinə təqdim olunması nəzərdə
tutulmuşdur.
Mərasimdə
Azərbaycan Respublikasının Prezidenti
Administrasiyasının İctimai-siyasi məsələlər
şöbəsi müdirinin müavini Tahir Süleymanov
çıxış edərək ölkəmizdə gənclərin
böyük diqqət və qayğı ilə əhatə
olunduğunu bildirmişdir. T.Süleymanov demişdir ki, son 5
ildə dövlət qulluğunda çalışan gənclərin
sayı 2 dəfə artmış, bu istiqamətdə bir
sıra sərəncamlar verilmişdir.
Hazırda
ölkəmizdə 250-dən artıq gənclər təşkilatının
fəaliyyət göstərdiyini bildirən natiq, respublika
üzrə 35 olimpiya idman kompleksinin istismara verilməsini gənclərin
sağlamlığının qorunmasına xidmət edən
amil kimi qiymətləndirmişdir.
Gənclər
və İdman Nazirliyinin gənclərlə iş şöbəsinin
müdiri İndira Hacıyeva da Azərbaycanda aparılan
uğurlu gənclər siyasətindən
danışmış, bunun sayəsində ölkəmizdə
gənc nəslin nümayəndələrinin intellektual səviyyəsinin
yüksək olduğunu qeyd etmişdir. Bildirmişdir ki,
hazırda ölkənin bütün regionlarında gənclər
evləri tikilir, yeni nəslin daha savadlı düşüncə
tərzinə malik olması üçün müxtəlif tədbirlər
həyata keçirilir.
Mərasimin
sonunda "Qış parlamenti"nin 6 komitəsi təqdim
olunmuş, onlara rəmzi bayraqlar təhvil verilmişdir.
Fevralın
17-dək davam edəcək layihə çərçivəsində
gənc parlamentarilər öz komitələrinin baza prinsiplərinə
uyğun qanun layihələri yazacaq, komitələrarası
debatlar aparacaq, bu və ya digər qanun layihəsinin qəbulu
üçün səsvermələr keçirəcəklər.
Azərbaycan.-2013.- 13 fevral.- S.7.