Azərbaycan parlament nümayəndə heyəti
Pakistanda səfərdə olmuşdur
Xəbər
verdiyimiz kimi, Milli Məclisin Sədri Oqtay Əsədovun
başçılığı ilə parlament nümayəndə
heyəti fevralın 11-12-də İqtisadi Əməkdaşlıq
Təşkilatı Parlament Assambleyasının birinci iclasında
iştirak etmək üçün Pakistanda səfərdə
olmuşdur.
Nümayəndə heyətinin tərkibinə
deputatlardan Əliağa Hüseynov, İlham Məmmədov,
Milli Məclis Aparatının rəhbəri Səfa Mirzəyev
və digər rəsmi şəxslər daxil idilər.
Əvvəlcə toplantıda iştirak
edən ölkələrin nümayəndə heyətlərinin
rəhbərləri İqtisadi Əməkdaşlıq Təşkilatı
Parlament Assambleyasının təsis sənədini
imzaladılar. Sonra təsis konfransında İqtisadi Əməkdaşlıq
Təşkilatına üzv olan altı ölkənin Parlament
rəhbərləri və İqtisadi Əməkdaşlıq
Təşkilatının baş katibi Şamil Ələsgərov
çıxış etdilər. Çıxışlarda
qarşılıqlı münasibətlərin
inkişafı, ölkələrimizin üzləşdiyi
problemlər, regional münaqişələrin birlikdə həlli
məsələləri diqqət mərkəzində oldu.
Türkiyə Böyük Millət Məclisinin Sədri Cəmil
Çiçək çıxışında Azərbaycanın
ən ağrılı problemi olan Dağlıq Qarabağ məsələsinin
həllində Azərbaycana daim dəstək olmağın
vacibliyini qeyd etdi. Milli Məclisin Sədri Oqtay Əsədov
İqtisadi Əməkdaşlıq Təşkilatı Parlament
Assambleyasının təsis edilməsini yüksək qiymətləndirdi
və əmin olduğunu bildirdi ki, əsası qoyulan yeni beynəlxalq
qurum ölkələrimizin parlamentləri arasında əməkdaşlığın
inkişafına, dövlətlərimiz arasında siyasi və
iqtisadi əlaqələrin dərinləşməsinə,
bölgəmizin zəngin potensialının gerçəkləşməsinə
kömək göstərəcəkdir. Milli Məclisin Sədri
Oqtay Əsədov qeyd etdi ki, bu gün bəşəriyyət
böyük sınaqlar və problemlər
qarşısındadır. Bunlar elə problemlərdir ki,
onları yalnız dövlətlərin birgə səyləri
ilə aradan qaldırmaq mümkündür. Başqa sözlə
desək, dövlətlər arasında əməkdaşlığın
zəruriliyi tarix boyu heç zaman bu qədər dərindən
hiss olunmamışdır. Müasir dünyanın dinamik
inkişafı həyatın bir çox sahələrində
hərtərəfli inteqrasiya ilə sıx
bağlıdır.
Bütün bunlar beynəlxalq əməkdaşlığın
mühüm bir formatını təşkil edən parlament
diplomatiyasının roluna yeni məzmun verir. Ənənəvi
diplomatiya mexanizmlərini tamamlayıb zənginləşdirən
parlament diplomatiyası dövlətlər və xalqlar
arasında dialoqun demokratik forumu və əməkdaşlığın
səmərəli vasitəsi olduğunu artıq sübuta yetirmişdir.
Bu baxımdan 10 dövləti birləşdirən İqtisadi
Əməkdaşlıq Təşkilatının fəaliyyətinin
parlament ölçüsünün yaradılması çox
böyük əhəmiyyətə malik olan siyasi hadisədir.
Azərbaycan tərəfi olaraq biz
İqtisadi əməkdaşlıq Təşkilatı Parlament
Assambleyasının fəaliyyətinə böyük
ümidlər bəsləyirik. Əminik ki, yeni Parlament
Assambleyası açıq və konstruktiv dialoq və
müzakirələr üçün faydalı və əhəmiyyətli
bir forum rolunu oynayacaq, sülh, sabitlik və sosial-iqtisadi rifah
kimi ümumi maraqlarımızın təşviq və təmin
edilməsinə xidmət göstərəcəkdir.
Oqtay Əsədov vurğuladı ki, yeni
yaradılan Parlament Assambleyası bölgəmizdə
mövcud olan dondurulmuş münaqişələrdən
çıxış yollarının axtarılmasına da səmərəli
surətdə xidmət etməlidir. Bu mənada 20 ildən
çox davam edən Ermənistan-Azərbaycan, Dağlıq
Qarabağ münaqişəsinin beynəlxalq hüquq prinsipləri
və normaları əsasında tezliklə nizama
salınması, yəni Ermənistan tərəfindən
işğal olunmuş Azərbaycan ərazilərinin azad edilməsi,
daimi yaşayış yerlərindən zorla qovulmuş 1 milyon
azərbaycanlının doğma yurdlarına
qaytarılması son dərəcə böyük əhəmiyyət
kəsb edir. Ölkəmizə qarşı təcavüzün
nəticələrinin aradan qaldırılması, Azərbaycanın
ərazi bütövlüyünün bərpa edilməsi
regional əməkdaşlığın inkişafı
üçün tamamilə yeni perspektivlər açacaqdır.
Sonra İslamabad şəhərində
keçirilən İƏT PA-nın birinci ümumi
yığıncağında tövsiyə xarakterli qərarlar
qəbul edildi və bir sıra təşkilati məsələlərə
baxıldı.
Səfər çərçivəsində
Milli Məclisin Sədri Oqtay Əsədov toplantıda
iştirak edən bir sıra parlament rəhbərləri ilə
görüşlər keçirdi. Pakistan Senatının sədri Seyid Nəyyar
Hüseyn Buxari, Pakistan Milli Assambleyasının sədri
xanım Fehmida Mirzə, İran parlamentinin sədri Əli
Laricani və Pakistan Milli Assambleyasının sədr
müavini Feysəl Kərim Kundi ilə görüşlərdə yeni təsis olunan İqtisadi Əməkdaşlıq
Təşkilatı Parlament Assambleyasının fəaliyyəti
və perspektivləri, ölkələrimiz arasında o
cümlədən parlamentlərimiz arasında münasibətlərin və əlaqələrin
daha da genişləndirilməsi və inkişaf etdirilməsi,
eləcə də qarşılıqlı maraq doğuran digər
məsələlər ətrafında müzakirələr
aparıldı. Bununla da Azərbaycan parlament nümayəndə
heyətinin Pakistana səfəri başa çatdı.
Milli
Məclisin Mətbuat xidməti
Azərbaycan.-
2013.- 14 fevral.- S.2.