«Erməni soyqırımı» avantürasına ən böyük dəstək Əkrəm Naibovdan gəldi

"İstiqlal" ordenli "yazıçı" Azərbaycan xalqının və dövlətinin istiqlalına balta vurub

Əkrəm Naibovun "Daş yuxular" "əsəri" milli mənliyimizi, mənəviyyatımızı təhqir edən, tariximizi saxtalaşdıran, Ermənistan-Azərbaycan, Dağlıq Qarabağ münaqişəsində erməni işğalına bəraət qazandıran, bütövlükdə millətə və dövlətə xəyanəti əks etdirən bir yazıdır. Bu şəxsin Rusiyanın "Drujba narodov" jurnalında dərc etdirdiyi cızmaqarası onun nəinki vətən, dövlət, millət hissindən, hətta kosmopolit insana da xas ali insani keyfiyyətdən - vicdan və ədalət hissindən məhrum olduğunu üzə çıxardı. İnsanın nəyinsə xatirinə həqiqətə, haqqa qarşı çıxması, hətta vicdanının səsinə qulaq asmaması ən sonuncu vasitədir.

Ə.Naibovun son illərdəki hərəkətlərini kənardan müşahidə etdikdə onun qeyri-ciddi, öz mənafeyini hər şeydən üstün tutan, həqiqəti danmaq yolu ilə fərqlənən xəstə təxəyyülün daşıyıcısı olduğu üzə çıxır. Bəllidir ki, erməni təcavüzkarları 2015-ci ildə qondarma erməni soyqırımının 100 illiyinə ciddi hazırlaşırlar. Ə.Naibov isə onlara ən "dəyərli" sənəd hazırlayıb. Bəllidir ki, Nobel mükafatı almağa can atan yazıçılar guya bəşəri dəyərlər naminə milli mentaliteti, milli dəyərləri, ənənələri öldürən, əvəzində manqurtluğu, smitizmi təbliğ edən əsərlər yazmağa meyil edirlər! Belə yazıçılar adətən qaranlıq nikahlardan doğulan, qanı qarışıq adamlar içərisindən çıxır! Xəyanət, iftira onlar üçün qorxunc ifadələr deyildir. İstənilən zaman həmin şəxslər xəyanətə, yalana əl ata bilir və sifariş əsasında mənliyini, şərəfini də bir yazı üçün hədər etməkdən belə çəkinmir. Məhz Ə.Naibov da həmin üzdəniraq "əsərində" bütün azərbaycanlıların prototiplərini qəddar, şikəst və qeyri-etik sözlərlə təsvir edir, erməniləri isə mədəni, qəhrəmanlaşdırılmış formada göstərir. Belə insanlara Azərbaycan xalqı olaraq ictimai nifrətimizi bildirməliyik, milli mənsubiyyəti olmayan bir şəxsin bəşəri hisslərdən danışmağa heç haqqı yoxdur. Əkrəm Naibov xalqımıza iftira atmaqla və həqarət etməklə təkcə azərbaycanlılara deyil, bütün insanlığa, bəşəri dəyərlərə xəyanət edib. O bu xəyanətin cəzasını çəkməlidir.

Kiminsə millət, vətən təəssübkeşliyi, milli qürur hissi olmaya bilər. Amma vicdansızlıq elə bir keyfiyyətdir ki, həqiqəti həyasızcasına danmaq, milyonlarla insanın haqq bildiyini nahaq kimi qələmə vermək formasında təzahür edir. Əkrəm Naibov həmin cızmaqarada azərbaycanlılar haqqında hansısa həqiqəti açıq və özünütənqid ruhunda desəydi, buna bəlkə də dözümlü yanaşmaq, onu qınamamaq, bağışlamaq olardı. Fəqət, Azərbaycan xalqını məyus edən, sarsıdan budur ki, yazıçı saydığımız, şan-şöhrət sahibi etdiyimiz adam hətta adi vicdan hissindən belə məhrum imiş. Fəaliyyəti Azərbaycan dövləti tərəfindən kifayət qədər yüksək dəyərləndirilən Əkrəm Naibovun "Daş yuxular" cızmaqarası ilə uzaqlarda daha nələrəsə iddia etməsinin nəticəsi isə xalqın inam və etimadını itirməsi, nifrətini qazanması ilə nəticələndi.

Xalqın iradəsinə söykənən Prezident İlham Əliyevin Əkrəm Naibovun xalq yazıcısı adından və Prezidentin fərdi təqaüdündən məhrum olunması barədə imzaladığı sərəncam cəmiyyətdə xalq-hakimiyyət birliyinin təntənəsi kimi qiymətləndirilir. Bu şəxs xalqına iftira atmaqla və həqarət etməklə təkcə azərbaycanlılara deyil, bütün insanlığa, bəşəri dəyərlərə xəyanət etdi. O, vətəndaşlıq hissini, duyğusunu itirib. O, dərk etmir ki, verdiyimiz şəhidlər, torpaqlarımızın işğal altında olması və digər faciələrimiz erməni vəhşiliyinin nəticələridir. Bunu başa düşməyən Əkrəm Naibov Azərbaycan xalqını aşağılamağa, erməniləri isə "ucaltmağa" cəhd göstərir. Bu da onun ermənilərdən sifariş aldığını göstərir. Əsl cəza isə xalqın ona olan nifrətidir. Əkrəm Naibovun əsəri bədii təxəyyülün məhsulundan daha çox siyasi bəyanata bənzəyir. Dünyada haqsızlıqların, ədalətsizliyin olduğu təqdirdə Əkrəm Naibovun belə bir əsər yazması Azərbaycan xalqına arxadan zərbə vurmaq deməkdir. Azərbaycana qarşı istər hərbi, istərsə də siyasi diplomatik hücuma keçənlərə bu əsərlə yardım edilməsi deməkdir. Bununla Əkrəm Naibov özünü Balayan və Kaputikyanla bir cərgəyə qoyub. Erməni yazıçıları hər zaman böhtan, yalan yazıblar. Əkrəm Naibov ermənilərin Dağlıq Qarabağda, Xocalıda törətdikləri qırğını unudub, Sumqayıtdakı hadisələri isə xatırlamaq istəmir. Mənim fikrimcə, müəyyən dairələr tərəfindən Əkrəm Naibova əsərin süjeti verilib və yazmaq tapşırılıb. "İstiqlal" ordenli bir yazıçı bu əsəri ilə Azərbaycan xalqının və dövlətinin istiqlalına balta vurub.

Əkrəm Naibovun bu romanına Azərbaycan ictimaiyyəti etiraz etməyəcəksə, bu ləkə bütün Azərbaycan ədəbiyyatının, ictimaiyyətinin üstündə qalacaq. Kim Əkrəm Naibovu müdafiə edirsə, bu ləkəni onunla paylaşır. Millətə atılan bu ləkə Azərbaycan xalqının üstündə deyil, Əkrəm Naibovun və onu müdafiə edənlərin üstündə qalmalıdır. Çünki öz xalqı ilə bir yerdə olmayan, onun mübarizəsinə dəstək verməyən, onun tapdalanmış hüquqlarının bərpasına çalışmayan, əksinə, bəşərilik pərdəsi altında, başqa xalqı böyük göstərmək naminə, öz xalqını aşağılayan, ona rişxənd edən bir qələm sahibinin o xalqın yazıçısı adını daşımağa mənəvi haqqı yox idi: "Daş yuxular" Azərbaycan xalqına, millətimizə qarşı yönəlmiş mənəvi terror, antimilli cinayətdir. Azərbaycan yazıçısının adını batıran Ə.Naibov eyni zamanda gələcək nəsillərin əsl vətəndaş kimi yetişməsinə də böyük zərbə vurub. Ümumiyyətlə, onun bu "əsəri" qaranlıq gələcəyə hesablanmış, gələcəyi dağıtmağa yönəlmiş təhlükə mənbəyidir.

Əlican BABAYEV,

Dövlət İqtisad Universitetinin "İqtisadi

nəzəriyyə-1" kafedrasının müdiri,

iqtisad elmləri doktoru, professor

Azərbaycan.- 2013.- 14 fevral.- S.5.