Abadlıq-quruculuq işləri geniş miqyas alır

"Düşünülmüş siyasət, siyasi və iqtisadi islahatlar, xalqla iqtidar arasında olan birlik, vəhdət, xalq tərəfindən ölkədə aparılan iqtisadi islahatlara dəstəyin verilməsi, liberal iqtisadiyyat, eyni zamanda, güclü hakimiyyət, sabitlik - budur, bizim uğurlarımızı şərtləndirən əsas amillər".

İlham ƏLİYEV

Mədəniyyət evinin geniş foyesində maraqlı məzmunlu sərgi diqqəti cəlb edir. Burada həm rayonda istehsal olunan məhsulların nümunələri nümayiş etdirilir, həm də il ərzində görülən işlər barədə ətraflı məlumat verilir. Sərginin bu hissəsi "Əlvida, uğurlu keçən 2012" adlanır, digər lövhədə isə cari ilin vəzifələri əks olunur: "Salam, arzular məkanı 2013"!

Prezident İlham Əliyevin səfərindən sonra dağlar diyarının yeni həyatı başlandı. Dövlət başçısının tapşırığı ilə Şəmkir-Gədəbəy yolu yenidən qurulur. Bütün qəsəbə və kəndlərin, ilk öncə isə sərhəd bölgələrindəki yaşayış məntəqələrinin kütləvi surətdə qazlaşdırılmasına başlandı. Bir sıra sosial obyektlərin, səhiyyə, mədəniyyət müəssisələrinin, bölgədə yeganə olan aşıq musiqi məktəbinin təməli qoyuldu. Dağlar diyarında ahəngdar tərəqqinin nəcib ənənəsi yarandı. Bir zaman nəzər diqqətdən kənar qalan Gədəbəy rayonu hər ayı, hər ili yeni-yeni uğurlarla yola salır.

2012-ci il bir sıra nəcib işlərlə əlamətdar oldu. Bu barədə ötən ilin yekunları və cari ilin vəzifələri müzakirə edilərkən geniş danışıldı. İl ərzində görülən işlər barədə isə rayon icra hakimiyyətinin başçısı Ramiz Yedigarov hesabat məruzəsi ilə çıxış etdi. Sonra ayrı-ayrı idarə və müəssisə rəhbərlərinin çıxışları dinlənildi. Yekdilliklə qeyd olundu ki, regionların sosial-iqtisadi inkişafı dövlət proqramı hər sahədə uğurla yerinə yetirilir. İl ərzində 54.7 milyon manatlıq məhsul istehsal olunub ki, bu da ötən ildəkinə nisbətən xeyli çoxdur. Rayonda ənənəvi istehsal sahəsi olan kartofçuluq sürətlə inkişaf edir. Keçən il sahələrdən 202 min ton kartof götürülüb. Nəzərdə tutulduğundan xeyli çox maldarlıq məhsulları istehsal olunub.

Özəl sektorun, sahibkarlığın inkişafına xüsusi qayğı göstərilir. Son bir ildə dörd min istehsalçıya büdcə vəsaiti hesabına təqribən 114 min manat yardım və müxtəlif banklar tərəfindən iş adamlarına 1.2 milyon manat kredit verilib. Sahibkarlara kömək məqsədilə rayonda kartof çeşidləmə anbarı, maldarlıq məhsullarının emalı üçün müasir texnologiyalı süd-pendir müəssisəsi tikilib. Adambaşına məhsul istehsalını həcmi xeyli artır, əldə olunan xalis gəlir çoxalır.

Toplantıda qeyd olundu ki, gəlir, qazanc artdıqca sosial problemlər uğurla həll olunur, abadlıq-quruculuq işləri geniş miqyas alır.

Bəzi təbii hadisələr nəzərə alınmazsa, bütün qəsəbə və kəndlərə gecə- gündüz fasiləsiz elektrik enerjisi verilir. Rayon mərkəzi, 24 kənd mavi yanacaqla təmin olunub. Söyüdlü, Muruğlu, Papaqcı, Qoşabulaq, Samanlıq, Pərizamanlı, Totuxlu kəndlərinə və digər yerlərə qaz kəməri çəkilişi davam edir.

Gədəbəy kəndlərinin əsas problemi yolla bağlıdır. Toplantıda minnətdarlıqla qeyd olundu ki, dövlət başçısının qayğı və köməyi ilə son vaxtlarda bu sahələrdə xeyli işlər görülüb. Prezidentin müvafiq sərəncamı ilə ayrılan vəsait hesabına Gədəbəy-Novosaratovka-Qaravəlilər yolu çəkilir. Fındıqlı çayı üzərində 84 metr uzunluğunda körpü istifadəyə verilib. Ərəbli kəndindəki körpü, Düzyurd-Dərəqarabulaq, Misginli, Kərkər, İsabəyli yolları əsaslı təmir edilib. Şəhərin giriş hissəsi, xüsusən, yarıtmaz vəziyyətdə olan mərkəzi bazar tamamilə yenidən qurulur. Küçələr genişləndirilir, yararsız obyektlər müasir üslubda sahmana salınır, asfalt döşənir, işıqlandırma sistemi təzələnir, səkilər düzəldilir.

Toplantıda böyük inamla vurğulandı ki, bunlar böyük işlərin başlanğıcıdır. Dövlət başçısının Nazirlər Kabinetinin yığıncağında dediyi sözlər hamının ürəyincə olmuşdur: "Biz artıq neçə ildir ki, kənd yollarının çəkilişi ilə çox ciddi məşğul olmağa başlamışıq. Bütün rayonlarda bu layihələr icra edilir. Bu layihələrin icrası rayonlardan gəlmiş sifarişlər, əhalidən gələn müraciətlər əsasında təşkil edilibdir. İlk növbədə, biz çalışmışıq ki, əhalinin ən çox məskunlaşdığı kəndlərimizi yeni yollarla təmin edək".

Respublika Prezidentinin bu fikirləri Gədəbəyin də daha abad, daha gözəl sabahından xəbər verir. Dağlar diyarı yeni ilə bu böyük inamla qurub-yaratmaq arzusu ilə qədəm qoydu.

Bu il 56 kilometr uzunluğunda olan Qaravəlilər yolunun çəkilişi başa çatdırılacaq, bir sıra yollarda təmir-bərpa işləri aparılacaq, körpülər, keçidlər sahmana salınacaqdır. İlin ən əsas vəzifələrindən biri mərkəzi bazarın şəhər kənarına köçürülməsi ilə bağlıdır. Bu sahədə artıq ilkin işlərə başlanılmışdır.

Cari ildə Heydər Əliyev parkı əsaslı təmir ediləcək, Heydər Əliyev mərkəzi və gənclər evi tikiləcək, Bayraq meydanı yaradılacaq. İqtisadiyyatın inkişafına xüsusi fikir veriləcək, sosial problemlər yenə də diqqət mərkəzində olacaqdır. Samanlıq, Arıqıran kənd tam orta məktəblərinin binaları istifadəyə veriləcək, İsalı, Moruqlu kəndlərində 180 şagirdlik yeni binaların təməli qoyulacaq, peşə liseyi təzə binaya köçəcəkdir. Sərhəd bölgəsində on bir kəndə mavi yanacaq veriləcək, elektrik enerjisi və su təchizatının problemləri sistemli surətdə həll ediləcəkdir.

Toplantıda Milli Məclisin deputatları - Rafiq Məmmədhəsənov, Sevinc Hüseynova və Prezident Administrasiyasının məsul işçisi Habil Əzəmmətov çıxış etmişlər.

Əhməd İSAYEV

Azərbaycan.- 2013.- 15 fevral.- S.4.