Lənkəranlılar cari ildə də uğurlarını artırmaq əzmindədirlər

Ölkəmizin cənub bölgəsinin qeyri-rəsmi mərkəzi sayılan Lənkəranı gəzdikcə, abadlıq-quruculuq işləri və insanların sosial şəraiti ilə yaxından tanış olduqca görürsən ki, rayon özünün inkişaf dövrünün yeni mərhələsini yaşayır. Hər kənddə, hər qəsəbədə qarşıya çıxan yenilik, müasirlik insanların xoş əhval-ruhiyyəsindən xəbər verir. Lənkəranlıların özlərinin dediyi kimi, Prezident İlham Əliyevin Lənkərana hər gəlişindən, şəhər rəhbərliyi və ictimaiyyətlə görüşündən sonra yeniliklərin sayı artır, aparılan tikinti-quruculuq işlərinin miqyası daha da genişlənir.

Ötən il iyul ayının son günü ölkə başçısı Lənkəranda olarkən Heydər Əliyev mərkəzinin, bayraq meydanının, Lənkəran sərhəd dəstəsinin inzibati binasının açılış mərasimlərində iştirak etmiş, daha sonra gənclər mərkəzinin və müasir standartlara cavab verən 5 ulduzlu turizm hotel kompleksinin təməlqoyma mərasimində öz xeyir-duasını vermişdir.

Ölkə başçısının 1 avqust 2012-ci il tarixli sərəncamına əsasən Lənkəran Şəhər İcra Hakimiyyətinə ayrılmış 5 milyon manat vəsait hesabına şəhərdəki Şəhidlər xiyabanı küçəsi yenidən qurulub. Göyşaban dairəsindən Ləvəngi dairəsinə və Heydər Əliyev prospektinə qədər olan yolda, eləcə də prospektin özündə yenidənqurma və bərpa, Olimpiya idman kompleksinə və Sutamurdov kəndinə gedən yolda abadlıq işləri aparılıb.

Ötən ilin ən uğurlu layihələrindən hesab olunan dövlət Bayrağı meydanı rayona xüsusi gözəllik verir. Meydanın ətrafı mərmər üzlüklərlə örtülüb, müasir işıqlandırma sistemi quraşdırılıb, milli üslublu oturacaqlar qoyulub, yaşıllıq zolağı genişləndirilib. Heydər Əliyev xatirə parkında da əsaslı yenidənqurma işləri aparılıb. Parkda mövsümlə əlaqədar əlavə gül kolları və dekorativ ağaclar əkilib. Layihənin davamı olaraq akademik Zərifə Əliyeva küçəsinin yenidən qurulmasına başlanılıb. Küçə boyu hasarlar ağ daşlarla üzlənir, səkilərə bordürlər düzülür, küçədə müasir işıqlandırma sistemi qurulur.

Dörd il əvvəl icrasına başlanılan "Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı" çərçivəsində həyata keçirilən tədbirlər nəticəsində rayonda iqtisadi və sosial tərəqqiyə nail olunub. Yeni yaşayış massivləri salınıb, biri-birindən yaraşıqli, yerli memarlıq nümunələrini özündə əks etdirən mülklər tikilib, yollar çəkilib. Yeni sosial obyektlər, müasir standartlara uyğun tikilmiş məktəb və xəstəxanalar, idman və sağlamlıq mərkəzləri, rabitə və nəqliyyat bu gün əhaliyə nümunəvi xidmət göstərir. Lənkəran şəhərində olduğu kimi, qəsəbə və kəndlərdə də əhali elektrik enerjisi və mavi yanacaqla fasiləsiz təmin olunur.

Əhalinin yaxşı güzəranı sağlamlığa, səmərəli işə, bolluğa və əmin-amanlığa səbəb olan əsas amillərdəndir. Bunu əvvəlki illərdən dəfələrlə fərqli və üstün olan göstəricilərdən də müəyyən etmək olur. Məsələn, rayonda ümumu məhsul istehsalının həcmi ilbəil artır. Təkcə ötən il fəaliyyətdə olan 32 sənaye müəssisəsində 19,2 milyon manatlıqdan çox məhsul istehsal edilib. Daha konkret desək, keçən il sənaye müəssisələrində 860 ton meyvə-tərəvəz konservi, 238,3 ton qablaşdırılmış çay, 38,8 ton kərə yağı, 632,7 ton pendir və kəsmik, 341,6 ton üzlü süd məhsulu istehsal olunub, 6640 kubmetr kərpic buraxılıb. Bunlardan əlavə, Lənkəran-çay" MMC-də, "Lənkəran-çay-5" ASC-də, "Sun-tea" MMC-də 137 ton çay yarpağı emal edilib. Çayçılığın inkişafı ilə əlaqədar Lənkəran çay filialında, Hirkan, İstisu qəsəbələrində və Girdəni kəndi ərazisində yeni çay plantasiyaları salınıb. Cari ildə isə rayonda daha 150 hektar yeni çay plantasiyasının və 50 hektar müxtəlif növ meyvə bağının salınması nəzərdə tutulur.

İş adamlarının, sahibkarların, yeni sex və kiçik müəssisələrin sayı artdıqca işsizlərin sayı azalır. Rəqəmlərin dili ilə desək, il ərzində rayonda 1938 yeni iş yeri açılıb ki, bunun da 1340-ı daimidir. Təsadüfi deyil ki, ötən il Sahibkarlığa Kömək Milli Fondu tərəfindən yerli sahibkarlara 650 min manat güzəştli kredit verilib. Lənkəranlılar minnətdarlıq hissilə bildirirlər ki, bütün bunlar dövlət başçısının diqqət və qayğısının əyani təzahürüdür.

Prezident İlham Əliyev "Azərbaycan Respublikası regionlarının 2009-2013-cu illərdə sosial-iqtisadi inkişafı Dövlət Proqramı"nin icrasının dördüncü ilinin yekunlarına həsr olunmuş iclasında demişdir: "Regionların sosial-iqtisadi inkişafı dövlət proqramı artıq 9 ildir ki, icra edilir. Hesab edirəm ki, proqramın qəbul olunması ölkə iqtisadiyyatı, sosial məsələlərin həlli üçün çox əhəmiyyətli idi. Proqramın icrası onu göstərir ki, 2004-cü ildə bəyan etdiyimiz artıq reallığa çevrilir". Bu, reallığı, sosial-iqtisadi tərəqqini respublikamızın digər rayonlarında olduğu kimi, Lənkəranda da müşahidə etmək mümkündür.

Ötən ildən Lənkəranda quruculuq işlərinin coğrafiyası daha da genişlənmiş, yeni infrastruktur layihələrin icrasına başlanıb. Proqramda nəzərdə tutulan tədbirlərə əsasən, Lənkəran şəhərinin su-kanalizasiya sistemi tamamilə yenidən qurulur. Rayon mərkəzində və Bürcəli kəndində içməli su xəttinin, Şilavar, Digah, Velədi və Sutamurdov kəndlərində su-kanalizasıya xətlərinin çəkilişi, Göyşaban kəndində isə çirkab sutəmizləyici qurğunun tikintisi davam etdirilir. Ötən il Yaponiya səfirliyinin rayonun Xırxatan kəndində içməli su problemi ilə bağlı həyata keçirdiyi tədbir çərçivəsində kənddə artezian quyusu qazılıb, məhəllələrə və evlərə içməli su xətti çəkilib. Bir neçə ay öncə isə Azərbaycan Qızıl Xaç və Qızıl Aypara Cəmiyyətləri Federasiyası tərəfindən rayonun Günəbir kəndinə 500 metr məsafədən su xətti çəkilişinə başlanılıb.

Eyni zamanda, Lənkəranda sovet dönəmindən qalmış yollarda təmir və bərpa işləri aparılıb, dünya standartlarına uyğun yeni yollar çəkilib, körpülər, keçidlər qurulub. Tükəvilə-Diyan-Gəgiran avtomobil yolunun 7-ci, Hirkan-Daşdatürk-Biləsər yolunun 14-cü, Vilvan-Osaküçə-Türkəcil yolunun 12-13-cü kilometrlərində yeni körpülər salınıb. Ümumiyyətlə, son 3 ildə Vilvan-Osakücə-Türkəcil yolunda 7 körpü tikilib. Əhalinin rahatlığını və nəqliyyatın təhlükəsiz hərərəkətini təmin etmək məqsədilə bu il Hirkan-Daşdatük-Biləsər yolunda daha bir körpünün tikintisinə start veriləcək.

Bunlardan savayı, Prezident İlham Əliyevin "Lənkəran şəhərinin sosial-iqtisadi inkişafının sürətləndirilməsinə dair əlavə tədbirlər haqqında" 8 iyun 2012-ci il tarixli sərəncamına əsasən, 20 yaşayış məntəqəsini birləşdirən və 40 min əhalinin istifadə etdiyi Lənkəran-Vilvan-Osaküçə-Türkəcil avtomobil yolunun əsaslı təmiri üçün ilkin olaraq ayrılmış 4 milyon vəsait hesabına yolun 16,5 kilometrlik hissəsinin yatağı standartlara uyğun hamarlanıb, bərkidilib və keyfiyyətli asfalt örtüyü çəkilib. Prezidentin digər sərəncamına əsasən 16 yaşayış məntəqəsini birləşdirən Şürük-Vel-Qamışovka avtomobil yolu genişləndirilib, yeraltı suötürücü borular quraşdırılıb və 72 kilometr yola asfalt döşənib. Nazirlər Kabinetinin 30 dekabr 2012-ci il tarixli qərarına əsasən ayrılmış 4 milyon vəsait hesabına cari ildən yolun qalan hissəsinin əsaslı təmirinə başlanılacaq. Həmçinin ölkə başçısının Pezidentin Ehtiyat Fondundan ayırdığı 5,2 milyon vəsait hesabına 2013-cü ildə rayonun Vilvn-Zövlə-Boladı-Liman yolunun əsaslı təmirinə başlanılacaq.

Lənkəran bu gün həm də turizm məkanıdır. Hər il bu diyara minlərlə turist gəlir. Təsadüfi deyil ki, ötən il rayona gəzməyə və dincəlməyə gələnlərin sayı 15 min nəfərdən çox olub. Yeri gəlmişkən qeyd edək ki, hazırda rayonda xüsusi lisenziya almış 11 mehmanxana və mehmanxana tipli obyekt fəaliyyət göstərir.

Lənkəran Şəhər İcra Hakimiyyətinin ötən ilin yekunlarına həsr olunmuş iclasında ŞİH-nin başçısı Taleh Qaraşov bütün bunlardan və qarşıda duran məsələlərdən ətraflı danışaraq demişdir ki, 2013-cü ilin də uğurla başlaması göstərir ki, şəhərimizin, kənd və qəsəbələrimizin inkişafı ilə bağlı yeni layihələrin icrasını daha keyfiyyətlə və vaxtında həyata keçirəcəyik. Yeni sənaye və emal müəssisələri yaradılacaq, iş yerləri açılacaq, müasir məktəblər, səhiyyə ocaqları, xidmət obyektləri tikiləcək, yollar asfaltlanacaq, rayonda su-kanalizasiya sisteminin quraşdırılması başa çatacaq, aqrar sahənin inkişafına diqqət daha da artırılacaqdır.

Seyran CAVADOV

Azərbaycan.- 2013.- 15 fevral.- S.4.