Ənənəvi
yubiley konserti
Niyazinin mənzil-muzeyində Üzeyir
Hacıbəyli adına Bakı Musiqi
Akademiyasının tədris işləri üzrə prorektoru, professor, əməkdar
incəsənət xadimi Oqtay
Abasquliyevin pedaqoji fəaliyyətinin
50 illiyi münasibəti ilə
keçirilməsi nəzərdə tutulan
silsilə konsertlərin açılışı olub. Azərbaycan
Musiqi Mədəniyyəti Muzeyinin
direktoru, sənətşünaslıq
namizədi, əməkdar mədəniyyət işçisi
Alla Bayramova konserti giriş sözü ilə açaraq
bildirib ki, burada Klassik Musiqi Həvəskarları Klubunda
musiqisevərlərin bir araya
toplanması artıq ənənə halını alıb.
2013-cü ilin ilk tədbiri
olan Oqtay Abasquliyevin sinfinin konserti də musiqi həvəskarlarını
xüsusilə sevindirir.
İtaliya və Malayziyada keçirilən
müsabiqələrdə birinci yerə layiq
görülmüş Bakı Musiqi Akademiyasının tələbəsi
Səmra Əmiraslanovanın, Nilufər Cəfərlinin, Fəridə
Məmmədovanın, Tofiq Şıxıyevin və digərlərinin
ruhoxşayan musiqi nömrələri konsert proqramına rəngarənglik
bəxş edib.
Onu da deyək ki, görkəmli incəsənət
xadiminin Azərbaycan fortepiano ifaçılığı mədəniyyətindəki
yaradıcılıq yolu böyük əhəmiyyətə
malikdir. Onun istər ifaçılıq, istərsə də
pedaqoji fəaliyyəti Azərbaycan fortepiano mədəniyyətinin
ayrılmaz qolunu təşkil edir. Oqtay Abasquliyev öz müəllimlərinin
- görkəmli pianoçu-pedaqoqların - əməkdar
müəllim R.Siroviç, sənətşünaslıq
doktoru, professor Y.Milşteyn və əlbəttə, bu sənətin
inkişafında müstəsna rol oynamış xalq artisti, əməkdar
incəsənət xadimi, professor M.Brennerin ənənələrini,
pedaqoji üslubunu özünəməxsus dəst-xətlə
yaşadır. Üzeyir Hacibəylinin bizə miras qoyduğu
Bakı Musiqi Akademiyasında mükəmməl kadrlar
yetişdirən Oqtay Abasquliyevin pedaqoji fəaliyyətinin bəhrəsi
ilə yüzlərlə pianoçu sənət aləminə
vəsiqə qazanıb. Onların sırasında Nərminə
Quliyeva, Gülnarə Səfərova, Xədicə Rzayeva, Samir
Mirzəyev, Mədinə Tuayeva, Mehriban Ağayeva, Ayan Salahova,
Nigar Məcidova, Züleyxa Bayramova, Günay Qasımova, Lalə
Musayeva kimi peşəkar musiqiçilər var. Tələbələrinin əksəriyyəti
respublika və beynəlxalq müsabiqələrin
laureatlarıdır. Onlar təhsillərini dünyanın
müxtəlif ölkələrində, o cümlədən
Türkiyə, Almaniya, İngiltərə və başqa yerlərdə
davam etdirirlər. Ölkəmizdə və onun
hüdudlarından kənarda
çoxsaylı konsertlərlə çıxış edən
pianoçular öz müəllimlərinin yoluna, ənənələrinə
sədaqətlərini daim təsdiqləyirlər. Onun
yaradıcılıq məktəbinin nümayəndəsi olan
Gülnarə Səfərova Azərbaycan Respublikasının
müstəqilliyinin bərpasından sonra beynəlxalq
müsabiqənin ilk laureatı kimi ifaçılıq fəaliyyətini
Yaponiyada davam etdirirsə, Tutu Məmmədova İstanbul
Konservatoriyasında təhsil alır. Beynəlxalq müsabiqələr
laureatı Fidan Ağayeva hazırda təhsilini Qriq adına
Norveç Konservatoriyasında başa çatdırmaqda, Ayan
Salahova isə Avropa-Asiya Beynəlxalq
müsabiqələr laureatı, London Kral Musiqi Akademiyasının
doktorantıdır.
Azərbaycan musiqi mədəniyyətində,
təhsilində böyük xidməti olan Oqtay Abasquliyev səmərəli
fəaliyyəti ilə adını tarixə böyük hərflərlə
yazmaqdadır. Bu gün Oqtay müəllim böyük əzm
və fəallıqla çalışaraq sənətin
kamillik zirvəsinə ucalacaq kadrlar yetişdirir. Oqtay müəllimə
belə şərəfli yolda bundan sonra da uğurlar
arzulayırıq!
Şanə
VƏLİZADƏ,
Bakı
Musiqi Akademiyasının III
kurs tələbəsi,
musiqişünas
Azərbaycan.-
2013.- 15 fevral.- S.7.