Heydər Əliyev Mərkəzi Xocalı soyqırımı

ilə bağlı tədbirlər keçirir

Heydər Əliyev Mərkəzi (HƏM) Azərbaycan tarixi və Ermənistan-Azərbaycan, Dağlıq Qarabağ münaqişəsi ilə bağlı həqiqətlərin beynəlxalq aləmdə daha geniş yayılması istiqamətində bir sıra tədbirlərin həyata keçirilməsinə başlamışdır.

Heydər Əliyev Mərkəzindən AzərTAc-a bildirmişlər ki, bu məqsədlə Xocalı soyqırımının 21-ci ildönümü ərəfəsində mərkəzin təşəbbüsü ilə faciə qurbanlarının xatirəsinə həsr olunmuş bukletlər nəşr edilmişdir. Azərbaycanın xaricdəki diplomatik nümayəndəlikləri vasitəsilə yayılacaq "Xocalı soyqırımı" adlı nəşrdə ermənilərin Xocalıda azərbaycanlılara qarşı həyata keçirdikləri insanlıq əleyhinə cinayət - soyqırımı, eləcə də Dağlıq Qarabağ münaqişəsi barədə faktlar öz əksini tapmışdır.

Bununla yanaşı, Xocalı soyqırımına dair həqiqətlərin dünya ictimaiyyətinə çatdırılması məqsədilə Azərbaycanın xarici ölkələrdəki 15-dək diplomatik nümayəndəliyində fotosərgilərin təşkili nəzərdə tutulur. Bu sərgilərdə 1992-ci il fevralın 26-da Ermənistan silahlı qüvvələri tərəfindən Xocalı şəhərinin işğalı zamanı törədilmiş soyqırımını əks etdirən fotolar, bu barədə dünya mətbuatında yayımlanmış materiallar təqdim olunacaqdır.

Heydər Əliyev Mərkəzinin təşəbbüsü ilə ölkəmizdən kənarda təşkil olunan sərgi və "dəyirmi masa"larda Ermənistan silahlı qüvvələrinin Xocalıda uşaqları, qadınları və qocaları işgəncələrlə qətlə yetirməsinə dair fotolarla yanaşı, faciəyə həsr olunan film də nümayiş etdiriləcəkdir.

Azərbaycan.-2013.- 19 fevral.- S.6.