Britaniyanın Exeter Universitetində Xocalı soyqırımının 21-ci ildönümü ilə bağlı tədbir keçirilmişdir

Britaniyanın Exeter Universitetində Azərbaycan cəmiyyətinin təşkilatçılığı və Azərbaycanın bu ölkədəki səfirliyinin dəstəyi ilə "Xocalıya ədalət" adlı tədbir keçirilmişdir. Tədbirdə səfirliyin əməkdaşları, universitetin Azərbaycan və türk cəmiyyətlərinin təmsilçiləri, müxtəlif ölkələrdən tələbələr iştirak etmişlər.

Əvvəlcə Azərbaycan Respublikasının dövlət himni səsləndirilmişdir.

Tədbiri açan universitetin Azərbaycan Cəmiyyətinin sədri Ülvi Qasımov Xocalı faciəsi haqqında iştirakçılara məlumat vermiş, bu soyqırımının dünya ictimaiyyətinə çatdırılmasının əhəmiyyətini vurğulamışdır.

Universitetin türk cəmiyyətinin təmsilçisi Atakan Kərküklü Xocalı qətliamının tarixindən danışmış, hadisəni bütün türk dünyasına qarşı ədalətsizlik adlandırmış, pozulmuş hüququn beynəlxalq səviyyədə hələ də bərpa olunmamasının böyük təəssüf hissi doğurduğunu vurğulamışdır.

Daha sonra CNN və Fransanın nüfuzlu "France-24" televiziya kanallarında yayımlanmış Dağlıq Qarabağ münaqişəsindən bəhs edən videomateriallar və Heydər Əliyev Fondunun hazırladığı "Xocalı soyqırımı" sənədli filmi təqdim edilmişdir.

Universitetin azərbaycanlı tələbələri Ağa Babayev və Nazlı Quliyeva təqdimatla çıxış edərək XX əsrin ən dəhşətli cinayətlərindən biri olan Xocalı qətliamının tarixi haqqında iştirakçılara məlumat vermiş, ermənilərin bu vandallığının ifşa olunmasının humanizm və ədalət prinsiplərinin bərqərar olunmasına və gələcəkdə belə hadisələrin təkrarlanmamasına xidmət edəcəyini vurğulamışlar. Xocalı soyqırımının beynəlxalq cinayət adlandırılması üçün kifayət qədər hüquqi əsasın olduğunu diqqətə çatdırmışlar.

Səfirliyin əməkdaşı Ceyhun Novruzov Ermənistan-Azərbaycan, Dağlıq Qarabağ münaqişəsi və Xocalı soyqırımı haqqında ətraflı məlumat vermişdir. Diplomat Xocalıda törədilmiş qırğının beynəlxalq hüququn normalarına və prinsiplərinə əsasən məhz soyqırımı olduğunu bildirmiş, bir çox ölkənin və beynəlxalq təşkilatların Xocalı soyqırımını tanıdıqlarını vurğulamışdır. Heydər Əliyev Fondunun vitse-prezidenti Leyla Əliyevanın təşəbbüskarı olduğu "Xocalıya ədalət!" beynəlxalq kampaniyası haqqında da məlumat verən C.Novruozov xalqımıza qarşı törədilən cinayəti və edilən ədalətsizliyi dünya ictimaiyyətinə çatdırmağın kampaniyanın əsas məqsədlərindən olduğunu diqqətə çəkmişdir. Kampaniya çərçivəsində ötən il 25 ölkədə soyqırımı ilə bağlı tədbirlərin keçirildiyini, bu il isə 40-a yaxın ölkədə planlaşdırıldığını qeyd etmişdir.

Sonda diplomat iştirakçıların suallarını cavablandırmışdır.

Orxan İSMAYILOV,

AzərTAc-ın xüsusi müxbiri

London

Azərbaycan.-2013.- 23 fevral.- S.6.