«Azərbaycanda Olimpiya Hərəkatı: daim yüksəlişdə» ikicildliyinin təqdimatı keçirilmişdir

Fevralın 23-də "Gülüstan" sarayında "Azərbaycanda Olimpiya Hərəkatı: daim yüksəlişdə" adlı ikicildlik kitabın təqdimatı keçirilmişdir.

AzərTAc xəbər verir ki, "Azərbaycan" qəzetinin redaksiyası tərəfindən hazırlanmış bu kitab müasir Azərbaycan dövlətinin banisi, ulu öndər Heydər Əliyevin əbədiyaşar xatirəsinə və Milli Olimpiya Komitəsinin yaranmasının 20-ci, Azərbaycan Olimpiya Hərəkatının inkişaf mərhələsinə qədəm qoymasının 15-ci ildönümünə ithaf edilmişdir.

Bu sanballı nəşrin ideya rəhbəri və "Ön söz"ün müəllifi Azərbaycan Respublikası Prezidenti Administrasiyasının rəhbəri, akademik Ramiz Mehdiyev, nəşrin redaktoru Prezident Administrasiyasının ictimai-siyasi məsələlər şöbəsinin müdiri, tarix elmləri doktoru, professor Əli Həsənovdur. Kitabın buraxılışına məsul Milli Olimpiya Komitəsinin vitse-prezidenti Çingiz Hüseynzadə və Milli Məclisin deputatı Bəxtiyar Sadıqov və "Azərbaycan" qəzeti redaksiyasının kollektividir.

Tədbiri giriş sözü ilə açan "Azərbaycan" qəzetinin baş redaktoru, Milli Məclisin deputatı Bəxtiyar Sadıqov ölkəmizdə idmana dövlət tərəfindən böyük diqqət və qayğı göstərildiyindən danışmış və müstəqillik dövründə bu sahədə əldə olunan uğurların kitabda öz əksini tapdığını qeyd etmişdir.

Natiq bildirmişdir ki, ötən illər ərzində ulu öndər Heydər Əliyev və Azərbaycan Prezidenti İlham Əliyev tərəfindən idmana həsr olunmuş çoxsaylı görüşlər keçirilmiş, mühüm sənədlər imzalanmış, müxtəlif layihələr reallaşdırılmışdır. Görülmüş işlərin həcmcə böyüklüyü bizi kitabı iki cilddə hazırlamağa sövq etmişdir. Əgər kitabın birinci cildi Olimpiya oyunları, idmanın inkişafı ilə bağlı sırf faktoloji materiallar, ayrı-ayrı oçerklərdən ibarətdirsə, ikinci cild Prezident İlham Əliyevin idmanla bağlı fəaliyyətini əks etdirən və bu sahənin inkişafını əhatə edən fərman və sərəncamları və digər sənədləri özündə ehtiva edir. Dövlət əhəmiyyətli sənədlər ikinci cilddə birinci cilddən çoxdur. Bu da onu göstərir ki, Azərbaycan Prezidenti İlham Əliyev Milli Olimpiya Komitəsinə rəhbərlik etdiyi on beş il ərzində bu sahəni daim diqqətdə saxlamışdır.

Azərbaycanda Olimpiya Hərəkatının tarixini, əldə edilmiş uğurları, Prezident İlham Əliyevin beynəlxalq tədbir və görüşlərdəki iştirak və çıxışlarını toplum halında oxucuya çatdıran, qazanılmış uğurları fotoşəkillərin "dili" ilə geniş auditoriya ilə bölüşən bu kitabı tam məsuliyyətlə idman tariximizin əvəzsiz salnaməsi adlandırmaq olar.

Kitabda müstəqillik dövründə Azərbaycan idmanının inkişafı, ölkəmizdə Olimpiya oyunlarına hazırlığın təhlili, bu sahədə görülən işlər və son beş Olimpiya oyunlarında iştirakımızla bağlı bütün məsələlər geniş şərh olunmuşdur.

Baş redaktor demişdir ki, biz artıq Azərbaycanın bütün sahələr üzrə inkişafının faizlərlə deyil, dəfələrlə artmasına şahidik. Əgər Atlanta Yay Olimpiya Oyunlarında bir medal qazanmışdıqsa, London Yay Olimpiya Oyunlarında 10, Paralimpiya oyunlarında isə daha çox medal əldə etdik. Bu, idman sahəsində də artımın dəfələrlə olduğunun bariz göstəricisidir.

B.Sadıqov vurğulamışdır ki, əsas məqsədlərimizdən biri müstəqillik dövründən bəhs edən Azərbaycanın idman tarixini dolğun və geniş şəkildə yazmaqdan ibarət olmuşdur. Biz bununla, ölkəmizdə idmanın inkişafı ilə bağlı görülən işləri geniş auditoriyaya təqdim etməyə çalışmışıq. İnanırıq ki, çəkdiyimiz zəhmət idman mütəxəssislərinin, idmançıların, xüsusilə də, jurnalistlərin hər zaman köməyinə çatacaq, onlar üçün ən yaxşı istinad mənbəyi olacaqdır.

Tədbirdə çıxış edən gənclər və idman naziri Azad Rəhimov bildirmişdir ki, Azərbaycanda bədən tərbiyəsi və idmanın inkişafı xalqımızın ümummilli lideri Heydər Əliyev şəxsiyyəti, onun əvəzedilməz quruculuq fəaliyyəti ilə sıx bağlıdır. Ulu öndərin yorulmaz fəaliyyətinin, xalqın fiziki sağlamlığına yetirdiyi diqqətin nəticəsidir ki, bu gün Azərbaycanda idmana maraq və həvəs kütləvi hal almışdır.

Nazir xüsusilə qeyd etmişdir ki, respublikamızda Olimpiya Hərəkatının inkişafı Prezident İlham Əliyevin adı ilə bağlıdır. Son illərdə ölkəmizdə 40-dək yeni Olimpiya idman kompleksinin, bir sıra müxtəlif idman növləri üçün xüsusi idman mərkəzlərinin istifadəyə verildiyini söyləyən A.Rəhimov hazırda bu istiqamətdə işlərin davam etdirildiyini bildirmişdir. Diqqətə çatdırılmışdır ki, bütün bunlar bizə bundan sonra da mühüm beynəlxalq idman tədbirlərini Azərbaycanda keçirməyə imkan verəcəkdir.

Qarşıdakı illərdə ölkəmizin bir sıra mötəbər yarışlara ev sahibliyi edəcəyini söyləyən nazir xüsusi vurğulamışdır ki, 2015-ci ildə Dünya kuboku və 2016-cı ildə Beynəlxalq Şahmat Olimpiadası Bakıda keçiriləcəkdir. Ölkəmiz gələn il Dünya İdman Mətbuatı Assosiasiyası olan AİPS-in növbəti konqresinə də ev sahibliyi edəcəkdir. Hazırda Bakı şəhərinin 2017-ci ildə IV İslam Həmrəyliyi Oyunlarını keçirmək üçün namizədliyi irəli sürülmüşdür. Bununla bağlı müvafiq texniki kitab hazırlanaraq İslam Həmrəyliyi İdman Federasiyasına təqdim olunmuşdur. Ən əsası isə Avropa Olimpiya Komitəsinin Baş Assambleyasının qərarı ilə 2015-ci ildə birinci Avropa Oyunlarını təşkil etmək hüququ Bakıya verilmişdir.

İlk dəfə reallaşacaq bu mötəbər idman bayramının ölkəmizdə keçirilməsi ilə bağlı qərarın verilməsi də bir daha sübut edir ki, bu gün Azərbaycan, həqiqətən, Avropanın və dünyanın idman mərkəzlərindən biridir.

Bildirilmişdir ki, Azərbaycanda idmanın, Olimpiya Hərəkatının daim yüksələn uğurları istər elektron, istərsə də yazılı mətbuatda dərc olunaraq oxuculara, idman həvəskarlarına çatdırılır. Lakin bu möhtəşəm uğurların salnamə şəklində tariximizə həkk olunması üçün kitabların böyük əhəmiyyəti vardır. Qazanılan uğurların nəticəsidir ki, son illərdə ölkəmizdə bədən tərbiyəsi və idman sahəsindəki uğurları əks etdirən 20-dən çox kitab nəşr olunmuşdur.

Azad Rəhimov demidir: "Bu gün təqdimatına toplaşdığımız "Azərbaycanda Olimpiya Hərəkatı: daim yüksəlişdə" kitabının mühüm əhəmiyyəti vardır. Kitabda yer alan bölmələrə diqqət yetirəndə hiss olunur ki, müəlliflər ölkəmizdə Olimpiya Hərəkatının ən incə detallarına belə diqqət yetirmiş və heç bir faktı nəzərdən qaçırmamışlar. Bu kitabı ölkəmizdə idman və bədən tərbiyəsinin, xüsusən də Olimpiya sahəsinin mükəmməl salnaməsi hesab etmək olar".

Azərbaycan idman tarixinin öyrənilməsi baxımından kitabı həm bugünkü, həm də gələcək nəsillər üçün sanballı vəsait hesab edən gənclər və idman naziri nəşrin araya-ərsəyə gəlməsində əməyi olan hər kəsə təşəkkür etmişdir.

Müstəqillik illərində başqa sahələrlə yanaşı, idman sahəsində də ciddi nailiyyətlərə imza atıldığını söyləyən Yeni Azərbaycan Partiyası icra katibinin müavini, Milli Məclisin deputatı Mübariz Qurbanlı demişdir ki, Olimpiya Hərəkatında əldə etdiyimiz uğurların tarixə çevrilməsi baxımından bu gün təqdimatına toplaşdığımız bu ikicildliyin çox böyük siyasi-ideoloji əhəmiyyəti vardır. Bizim qazandığımız hər bir uğur düşmən üzərində mənəvi qələbə deməkdir. İdman sahəsində də əldə etdiyimiz uğurlar ciddi nailiyyətlərimizdən hesab edilməlidir. Kitabın əsas məziyyəti ondan ibarətdir ki, ötən illər ərzində Azərbaycanın Olimpiya Hərəkatının bütün nailiyyətləri burada faktoloji materiallar əsasında, sistemli şəkildə verilmişdir.

İdeya müəllifi Prezident Administrasiyasının rəhbəri, akademik Ramiz Mehdiyev olan bu kitab böyük əhəmiyyət kəsb edir. Çünki kitabda Azərbaycanda idman və Olimpiya Hərəkatındakı irəliləyişlər, qələbələr öz əksini tapmışdır. Ulu öndər Heydər Əliyevin idmanın inkişafı üçün verdiyi sərəncamlar, etdiyi çıxışlar burada öz əksini tapmışdır. Bu kitablar gələcəkdə idman tariximizi tədqiq etmək istəyənlər üçün dəyərli mənbədir. Eini zamanda, Prezident İlham Əliyevin Azərbaycan Milli Olimpiya Komitəsinə rəhbər gəlməsindən sonra ölkəmizdə Olimpiya Hərəkatının genişlənməsi istiqamətində görülən tədbirlər, o cümlədən dövlət başçısının Olimpiya yarışlarında şəxsən iştirakı və medal alan idmançılarımızla keçirdiyi görüşlərdəki nitqləri də burada cəmlənmişdir.

Azərbaycanda idmanın inkişafının ölkə rəhbərliyinin daim diqqət mərkəzində olduğunu söyləyən M.Qurbanlı demişdir ki, bunun bariz göstəricisi son illər bölgələrdə müasir tələblərə cavab verən Olimpiya idman komplekslərinin istifadəyə verilməsidir. İdmana diqqət siyasi əhəmiyyət kəsb edən bir məsələdir. İdman və siyasət bu gün həddindən artıq bir-birinə bağlıdır. Bu kitabda da bu məqamları görürük.

"Azərbaycanda Olimpiya Hərəkatı: daim yüksəlişdə" adlı ikicildlikdə Azərbaycan idmanındakı irəliləyişi, dinamikanı, uğurları görməmək mümkünsüzdür. İnanıram ki, bu uğurlar gələcəkdə daha da artacaqdır.

Azərbaycanda Olimpiya Hərəkatının tarixindən danışan Milli Olimpiya Komitəsinin vitse-prezidenti Çingiz Hüseynzadə demişdir ki, Dünya Olimpiya Hərəkatının başlamasından 100 il sonra Azərbaycan müstəqil dövlət kimi bu hərəkata qoşulmuşdur.

Ulu öndər Heydər Əliyevin bu sahəyə diqqət və qayğısını qeyd edən natiq vurğulamışdır ki, ümummilli liderimizin xeyir-duası, tapşırıq və tövsiyələri əsasında yaradılan Gənclər və İdman Nazirliyi ölkəmizin tanınması, yeni idmançılar nəslinin formalaşması, gənclərin fiziki cəhətdən sağlam böyüməsi naminə böyük işlər görməkdədir.

Bildirilmişdir ki, dövlət başçısı İlham Əliyevin Milli Olimpiya Komitəsinin prezidenti seçilməsi ilə Azərbaycanda Olimpiya Hərəkatının yeni inkişaf dövrü başlamışdır. İnkişaf təkcə Olimpiya Oyunlarında hər dəfə medalların sayının artması ilə deyil, həm də ölkəmizdə idman infrastrukturunun yenilənməsi, olimpizmin inkişafı, o cümlədən bu sahəyə aid nəşrlərin çoxalması, gənclərin idmana həvəsinin əhatə dairəsinin genişlənməsi ilə müqayisə olunmalıdır.

Ç.Hüseynzadə demişdir ki, bu gün dünyanın ən mötəbər idman yarışları Bakıda keçirilir. Belə bir yüksək inkişaf şəraitində məhz bu kitabın ərsəyə gəlməsi deməyə əsas verir ki, bizi qarşıda çox böyük uğurlar gözləyir.

Kitabın işıq üzü görməsində əməyi olanlara təşəkkürünü bildirən Milli Olimpiya Komitəsinin vitse-prezidenti bu istiqamətdə işlərin davamlı olacağına əminliyini bildirmişdir.

Kitabı məzmunca gənc tədqiqatçılar, eləcə də Azərbaycanın idman tarixini araşdıranlar üçün dəyərli mənbə adlandıran Yeni Azərbaycan Partiyası Gənclər Birliyinin sədri Seymur Orucov ikicildliyin yaradıcı heyətini belə bir nəşrin işıq üzü görməsi münasibətilə təbrik etmişdir.

Bildirilmişdir ki, ölkədə idman artıq özünün yüksəliş mərhələsinə qədəm qoymuşdur. Əldə olunan uğurlar Azərbaycan Prezidenti İlham Əliyevin bu sahəyə göstərdiyi böyük diqqət və qayğının göstəricisidir.

Kitabın əhəmiyyətindən danışan Olimpiya çempionu Fərid Mansurov bildirmişdir ki, ümummilli lider Heydər Əliyevin dərin və uzaqgörən siyasətində Azərbaycanda idmanın və Olimpiya Hərəkatının inkişaf etdirilməsi xüsusi yer tutmuşdur.

Olimpiya çempionu bütün idmançılara göstərdiyi böyük diqqət və qayğıya görə Prezident İlham Əliyevə minnətdarlığını bildirmişdir.

Diqqətə çatdırmışdır ki, bu böyük diqqət və qayğının tarixin səhifələrinə çevrilməsi üçün Azərbaycan Olimpiya Hərəkatına dair bütün sənədlər, məlumatlar, faktlar toplanmalıdır. Sənədlər, faktlar əsasında yazılan kitablarda qazanılmış uğurlar hərtərəfli ifadəsini tapır ki, nəticədə hər kəsin zəhməti yaddaşlara həkk olur. Olimpiya Hərəkatımızın tarixi yüksəlişinin qələmə alınması təqdirəlayiqdir.

Sonda "Azərbaycan" qəzetinin baş redaktoru, Milli Məclisin deputatı Bəxtiyar Sadıqov demişdir ki, Azərbaycanın idman sahəsində uğur qazanması təsadüfi deyildir. Ölkəmizdə əlverişli idman mühiti yaranmış, bu sahə dövlət siyasətinin tərkib hissələrindən birinə çevrilmişdir. Bütün bunlar deməyə əsas verir ki, ölkəmiz gələcəkdə daha böyük uğurlara imza atacaqdır.

Mərasimin iştirakçılarına minnətdarlığını bildirən Bəxtiyar Sadıqov demişdir ki, kitab qarşıdan gələn prezident seçkilərinə növbəti töhfələrdən biridir.

AzərTAc

Azərbaycan.-2013.- 24 fevral.- S.1;3.