Avropanın nüfuzlu «New Europe» qəzetində «Azərbaycan «Cənub qaz dəhlizi» layihəsini dəstəkləyir» sərlövhəli məqalə dərc olunmuşdur

Avropanın nüfuzlu "New Europe" qəzetində Azərbaycan Respublikası Dövlət Neft Fondunun (ARDNF) icraçı direktoru Şahmar Mövsümovun "Azərbaycan "Cənub qaz dəhlizi" layihəsini dəstəkləyir" sərlövhəli məqaləsi verilmişdir.

Məqalədə deyilir: "Azərbaycan Respublikası Dövlət Neft Fondu Trans-Anadolu təbii qaz boru kəmərinin (TANAP) Azərbaycan hissəsini maliyyələşdirməyə başlayacaqdır. Azərbaycan, eyni zamanda, TANAP-a birləşəcək və Azərbaycan qazını Avropaya ötürəcək "Nabukko Qərb" və ya Transadriatik boru kəməri layihələrini (TAP) də maliyyələşdirməyə qadirdir".

Yazıda bildirilmişdir: "Biz TANAP layihəsinin Azərbaycana düşən hissəsini maliyyələşdirməyə hazırlaşırıq. İndi prosesin ilkin mərhələsi gedir. Lakin hələ layihədəki payımızı, ümumi xərci və digər detalları müəyyənləşdirməmişik".

Məqalədə qeyd edilmişdir ki, TAP və "Nabukko Qərb" layihələrinin 50 faizi Azərbaycanın əsas neft şirkəti olan ARDNŞ və Avropanın mühüm enerji şirkətlərindən ibarət "Şahdəniz" konsorsiumuna təklif edilə bilər. ARDNF-in TAP və ya "Nabukko Qərb" layihələrinin maliyyələşdirilməsinə cəlb olunma ehtimalı barədə sualı ARDNF-in icraçı direktoru belə cavablandırmışdır: "Buna bizim imkanımız vardır. Amma hələ danışıqlar mərhələsindəyik. Tam dəqiqləşdirilmiş bir şey yoxdur. Hazırda biz inkişafa əsaslı təsir edəcək layihələr axtarırıq. TANAP buna misal ola bilər. Biz TANAP-la bağlı məsələlər üzərində sürətlə çalışırıq. ARDNŞ TANAP layihəsi ilə məşğul olan çoxlu sayda insanı işə cəlb etmişdir. Amma məlumdur ki, TANAP yolun sonu deyildir. Biz onu hazırda müzakirə olunan TAP və ya "Nabukko Qərb" layihələri ilə davam etdirəcəyik. Əvvəlcə, TAP, yaxud "Nabukko Qərb" layihələrindən hansını seçəcəyimizi müəyyənləşdirməliyik".

Yazıda Rusiyanın "Cənub axını" layihəsinin Avropa İttifaqının dəstəklədiyi "Cənub qaz dəhlizi"nə rəqib olub-olmaması ilə bağlı sualı Ş.Mövsümov belə cavablandırmışdır: "Avropa həm Rusiyadan, həm də bizim regionumuzun ehtiyatlarını alacaq qədər böyük bir bazardır. Burada hər hansı bir rəqabət mümkün deyildir".

Ş.Mövsümov qeyd etmişdir ki, təbii qaz digər enerji mənbələri ilə müqayisədə və nüvə enerjisinin təhlükəsizliyi məsələləri baxımından ekoloji cəhətdən ən təhlükəsiz vasitədir. Hər iki layihə təbii qaz ehtiyacının ödənilməsinə yönələcəkdir. Xəzərin qaz potensialı böyükdür. Amma bu potensialdan istifadə etmək üçün onu üzə çıxarmaq lazımdır.

Buna görə də ARDNF bu il yeni layihəyə başlayacaqdır. Biz yeni qazma qurğusunun tikintisini maliyyələşdirmək istəyirik. Bununla bağlı beynəlxalq şirkətlərlə razılığa gəlmişik.

AzərTAc

Azərbaycan.-2013.- 26 fevral.- S.11.