Xocalı soyqırımı
qurbanlarının xatirəsinə həsr olunmuş
silsilə tədbirlər keçirilmişdir
Monteneqro
Monteneqronun
paytaxtı Podqoritsa şəhərində fəaliyyət
göstərən və ölkənin müxtəlif bölgələrindən
tələbələrin təhsil aldığı Mehmet Fateh
ali təhsil müəssisəsində Azərbaycanın
Monteneqrodakı diplomatik nümayəndəliyi tərəfindən
Xocalı soyqırımı qurbanlarının xatirəsinə
həsr olunmuş geniş tədbir keçirilmişdir.
Diplomatik
nümayəndəlikdən AzərTAc-a bildirmişlər ki, tədbirdə
1992-ci ilin fevralın 25-dən 26-na keçən gecə
Xocalı şəhərinin yerlə-yeksan edildiyi, dinc əhalinin
- uşaqların, qadınların, qocaların kütləvi qətliama
məruz qaldığı, xüsusi amansızlıqla və vəhşiliklə
qətlə yetirildiyi haqqında ətraflı məlumat
verilmişdir. Dünyanın gözü qarşısında
baş vermiş bu soyqırımına - Azərbaycan
xalqına və bəşəriyyətə qarşı
törədilmiş cinayətə beynəlxalq təşkilatların
və digər xalqların biganə qalmamasına
çağırış edilmiş və erməni millətçilərinin
vəhşilikləri və Ermənistanın təcavüzkar
siyasəti birmənalı şəkildə pislənilmişdir.
"Xocalıya
ədalət" kampaniyası çərçivəsində
həyata keçirilən petisiya haqqında geniş məlumat
verilmişdir.
Sonra
Heydər Əliyev Fondu tərəfindən
hazırlanmış "Xocalı soyqırımı" sənədli
filmi nümayiş etdirilmişdir.
"İRS"
jurnalının Xocalı soyqırımına həsr
olunmuş xüsusi buraxılışının nüsxələri
və Monteneqro dilinə tərcümə edilmiş
"Xocalı soyqırımının 21-ci
ildönümü münasibətilə Xocalı əhalisinin
dünya xalqlarına, Birləşmiş Millətlər Təşkilatına,
Avropa Şurasına, Avropada Təhlükəsizlik və Əməkdaşlıq
Təşkilatına müraciəti" tədbir
iştirakçılarına paylanmışdır.
Tədbir
Monteneqronun "Atlas" televiziyasının xəbərlər
proqramında və "Pobjeda" qəzetində
işıqlandırılmışdır.
Rumıniya
Fevralın
26-da Xocalı faciəsinin 21-ci ildönümü ilə
bağlı Azərbaycanın Rumıniyadakı səfirliyində
anma mərasimi keçirilmişdir.
Mərasimdə
Heydər Əliyev Fondunun Rumıniyadakı nümayəndəliyi,
Azərbaycan Respublikası Dövlət Neft Şirkətinin
Rumıniya nümayəndəliyinin əməkdaşları,
Rumıniya-Azərbaycan Dostluq Cəmiyyətinin sədri və
idarə heyətinin, Azərbaycan-Rumıniya Mədəniyyət
və Gənclər Assosiasiyasının və Rumıniya-Azərbaycan
Sənaye və Ticarət Palatasının üzvləri,
Rumıniyada yaşayan və təhsil alan azərbaycanlılar,
İran azərbaycanlıları, azərbaycansevər
rumınlar, türk-tatar icmalarının nümayəndələri
iştirak etmişlər. Tədbir
iştirakçıları Xocalıda qətlə
yetirilmiş insanların xatirəsini bir dəqiqəlik
sükutla yad etmiş, çıxış edənlər Azərbaycan
xalqının tarix boyu erməni millətçilərinin
davamlı olaraq etnik təmizləmə, soyqırımı
siyasətinə məruz qalmasından, öz tarixi
torpaqlarından qovulmasından, qaçqın və məcburi
köçkünə çevrilməsindən və
bütün bunların ermənilər tərəfindən
kütləvi qırğınlarla müşayiət
olunmasından danışmışlar. Xocalı faciəsinin
Azərbaycanın unudulmaz, dəhşətli və qanlı
günlərindən olduğu vurğulanmış,
soyqırımı qurbanlarının xatirəsinin bir sıra
dünya ölkələrində anıldığı
bildirilmişdir.
Daha
sonra tədbir iştirakçılarına İslam Əməkdaşlığı
Təşkilatının Gənclər Forumunun Mədəniyyətlərarası
Dialoq üzrə baş əlaqələndiricisi Leyla xanım
Əliyeva tərəfindən irəli sürülən
"Xocalıya ədalət" beynəlxalq kampaniyası
haqqında məlumat verilmişdir. Vurğulanmışdır
ki, beynəlxalq miqyasda, o cümlədən Rumıniyada
Xocalı soyqırımı ilə bağlı həqiqətlərin
təbliğ edilməsində diaspor üzvləri bundan sonra da aktiv fəaliyyət
göstərəcəklər.
Xocalı
soyqırımının, eləcə də işğal
olunmuş Azərbaycan torpaqlarında törədilmiş erməni
vəhşiliklərinin beynəlxalq aləmdə
tanıdılması istiqamətində Azərbaycan Prezidenti
İlham Əliyevin qətiyyətli siyasətinin davamı kimi
bu il Rumıniya parlamentində Xocalının insanlıq əleyhinə
cinayət kimi qiymətləndirilməsinin vacib hadisə
olduğu diqqətə çatdırılmışdır.
Qeyd
etmək lazımdır ki, Rumıniya Avropa İttifaqı və
NATO-nun üzvü olan ölkələri arasında Xocalı
qırğınına qarşı parlament səviyyəsində
dürüst mövqe nümayiş etdirən ilk ölkə
olmuşdur. Belə ki, qanunvericilik orqanında etnik
ayrı-seçkilik zəminində erməni silahlı
qüvvələrinin Xocalıda törətdikləri
amansız qətlin nəticələri
açıqlanmış, münaqişənin həllində
Azərbaycanın ərazi bütövlüyü, beynəlxalq
səviyyədə tanınmış sərhədlərinin
toxunulmazlığı və suverenliliyinə birmənalı
dəstək bildirilmişdir. Avropada erməni diasporunun
köklü və mütəşəkkil şəkildə fəaliyyət
göstərdiyi ikinci ölkə olan Rumıniyada parlamentin bu
mövqeyi qanunvericilik orqanında, eləcə də hökumətdə
təmsil olunan erməni bürokratlara ən böyük zərbə
olmuşdur.
Xocalı
soyqırımı ilə bağlı səfirlik tərəfindən
hazırlanmış məlumat Rumıniya parlamentinə, rəsmi
dövlət orqanlarına, qeyri-hökumət təşkilatlarına,
Rumıniyada fəaliyyət göstərən səfirlik və
beynəlxalq təşkilatların nümayəndəliklərinə
də göndərilmişdir.
Böyük
Britaniya
Böyük
Britaniyanın Şeffild şəhərində fəaliyyət
göstərən Şeffild Azərbaycan Cəmiyyəti (SAS)
Xocalı soyqırımı ilə bağlı tədbirlər
keçirmişdir.
Təşkilatdan
AzərTAc-a bildirmişlər ki, qurumun rəhbəri Cavid Məmmədzadənin
təşəbbüsü ilə üç gün ərzində
aksiyalar şəklində təşkil edilmiş tədbirlərdə
müxtəlif ölkələrdən olan tələbələr
iştirak etmişlər.
Tədbirlər
çərçivəsində ümumilikdə 500-dən
çox insana Xocalı haqqında maarifləndirici səciyyə
daşıyan müvafiq materiallar, vəsaitlər təqdim
edilmiş, əcnəbi iştirakçıların hər
birinə Ermənistan-Azərbaycan, Dağlıq Qarabağ
münaqişəsi haqqında geniş şifahi məlumatlar
verilmişdir. Mövcud təşəbbüs çərçivəsində
eyni zamanda, SAS-in Xocalı faciəsi
ilə bağlı video-çarxı nümayiş
etdirilmişdir. Həmin çarxda müxtəlif ölkələrdən
olan tələbələr "Justice for Khojaly"
(Xocalıya ədalət) şüarına dəstək
olduqlarını göstərmişlər.
SAS
Xocalı faciəsi ilə bağlı
hazırladığı məqaləni Şeffild Universitetinin
iki min nəfərdən çox oxucusu olan qəzetinə təqdim
etmişdir.
Şeffild
Azərbaycan Cəmiyyətinin uğurla həyata keçirdiyi
missiya nəticəsində yüzlərlə xarici tələbə
Xocalı faciəsi zamanı törədilən vəhşiliklərdən
xəbərdar olmuşlar.
Qurum
rəhbərliyi bu işdə göstərdiyi dəstəyə
görə Böyük Britaniyadakı "Odlar yurdu" cəmiyyətinə
və Avropa-Azərbaycan Cəmiyyətinə təşəkkürünü
bildirmişdir.
Serbiya
Azərbaycanın
Serbiyadakı səfirliyində Xocalı
soyqırımının 21-ci ildönümü ilə
bağlı tədbir keçirilmişdir.
Səfirlikdən
AzərTAc-a bildirmişlər ki, tədbirdə Belqradda fəaliyyət
göstərən Azərbaycan Mədəniyyət Mərkəzinin,
Serbiya-Azərbaycan Ticarət-İqtisadi Palatasının, bu
ölkədə yaşayan Azərbaycan icmasının
üzvləri və təhsil alan tələbələrimiz,
ictimaiyyətin nümayəndələri iştirak etmişlər.
Səfirliyin
müşaviri Qabil Köçərli erməni millətçilərinin
vaxtaşırı dövlətimizə və xalqımıza
qarşı ərazi iddiaları irəli sürərək həyata
keçirdikləri cinayətlərindən
danışmış, ermənilərin 1918-ci ildə
Bakıda, Salyanda, Lənkəranda, Xaçmazda, Qubada,
Şamaxıda və digər bölgələrdə törətdikləri
qırğınlar, 1988-ci ildə Ermənistanda yaşayan
soydaşlarımızın zorla ata-baba yurdlarından didərgin
salınması, Dağlıq Qarabağ və ona bitişik
yeddi rayonumuzun işğalı, Xocalı soyqırımı
barədə ətraflı məlumat vermişdir. Qeyd
edilmişdir ki, bu cinayətlər, eləcə də
xalqımıza qarşı etnik təmizləmə siyasəti
artıq Ermənistanın dövlət siyasətinə
çevrilmişdir. Xocalı faciəsi Azərbaycan tarixində
ən qanlı hadisələrdən biridir. Erməni
silahlı dəstələri tərəfindən dinc əhali
xüsusi qəddarlıqla qətlə yetirilmiş və əsir
götürülən insanlar isə dəhşətli
işgəncələrə, zülm və təhqirlərə
məruz qalmışlar.
Tədbirdə
həmçinin 2013-cü il fevralın 25-də Serbiya
Parlamentinin Konstitusiya və Hüquq Məsələləri
üzrə Komitəsinin sədri, Azərbaycan ilə Parlament
dostluq qrupunun rəhbəri Vladimir Tsvianın təklif etdiyi və
bu ölkənin parlamentinin gündəliyinə daxil
edilmiş "Beynəlxalq hüquqa riayət olunması və
Ermənistan-Azərbaycan Dağlıq Qarabağ münaqişəsinin
sülh yolu ilə həllinə dair qətnamə" layihəsi
barədə məlumat verilmiş, onun mətninin Serbiya
parlamentinin saytında yerləşdirildiyi bildirilmişdir. Qeyd
edilmişdir ki, bu təşəbbüs Azərbaycan və
Serbiya arasında təşəkkül tapmış dostluq və
strateji tərəfdaşlıq münasibətlərinin bariz
nümunəsidir.
Sonra
Heydər Əliyev Fondu tərəfindən
hazırlanmış "Xocalı soyqırımı" sənədli
filmi nümayiş etdirilmişdir.
Tədbir
iştirakçıları Xocalı
soyqırımının 21-ci ildönümü ilə əlaqədar
Xocalı əhalisinin dünya xalqlarına, BMT, AŞ və ATƏT-ə
müraciətinin mətni ilə tanış olmuşlar.
İran
Azərbaycanın
İrandakı səfirliyində "Xocalıya ədalət"
kampaniyası çərçivəsində anma mərasimi
keçirilmişdir. Bununla əlaqədar səfirliyin
qarşısında fəxri qarovul dəstəsi
düzülmüş, faciə qurbanlarının xatirəsinə
ehtiram olaraq müəssisə və təşkilatlardan əklillər
gətirilmişdir.
İran
ictimaiyyətinin nümayəndələrinin, ölkə rəsmilərinin,
Tehran Universitetində təhsil alan yerli və Türkiyə,
İran, Yaponiya, Pakistan, Suriya, İndoneziya, Seneqal və s. yerlərdən
olan tələbələrin, paytaxtdakı beynəlxalq təşkilatların
təmsilçilərinin iştirak etdikləri mərasim faciə
qurbanlarının ruhuna "Qurani-Kərim"dən ayələrin
oxunması ilə başlanmışdır.
Xocalı
soyqırımı ilə bağlı sənədli filim
nümayiş etdiriləndən sonra çıxışlar
olmuşdur.
Səfirliyin
ikinci katibi Tariyel İsmayılov, Tehran Universitetində təhsil
alan pakistanlı tələbə Nasir İjaz, İran Avrasiya
İnstitutunun Yazıçılar Birliyinin şura
üzvü İlyas Vahidi, paytaxt sakinləri Əkbər Salehi və Həsən
Rəşidi çıxışlarında Xocalı
soyqırımının təkcə Azərbaycana deyil,
bütün bəşəri dəyərlə və humanizm
prinsiplərinə qarşı törədilmiş vandalizm
aktı kimi qiymətləndirilmişdir. Qeyd olunmuşdur ki, bu
cinayətə bütün dövlətlər və beynəlxalq
təşkilatlar siyasi-hüquqi qiymət verməli, qanlı qətliamı
törədənlər məsuliyyətə cəlb
olunmalıdırlar.
İştirakçılara
və çıxış edənlərə minnətdarlığını
bildirən səfir Cavanşir Axundov qeyd etmişdir ki, Ermənistan
silahlı qüvvələri tərəfindən Xocalı
soyqırımının törədilməsi erməni millətçilərinin
Azərbaycan xalqına qarşı həyata keçirdikləri
iki yüz illik təcavüzkar əməllərin
davamıdır. Bu soyqırımı Ermənistan dövlətinin əsl
simasını, onun terrorçu və təcavüzkar siyasətinin
mahiyyətini ortaya qoymuşdur. Səfir əminliklə
bildirmişdir ki, "Xocalıya ədalət"
kampaniyası bu hərbi cinayətin beynəlxalq məhkəmələrdə
öz həllini tapması ilə nəticələnəcəkdir.
İştirakçılara
Xocalı soyqırımı, təcavüzkar Ermənistanın
işğalçılıq siyasətinin Azərbaycanda
törətdiyi ağır nəticələr, ölkəmizin
tarixi və müasir inkişaf istiqamətləri barədə
kitab, jurnal, DVD, CD və digər əyani vəsaitlər
paylanmışdır.
Liviya
Azərbaycanın
Liviyadakı səfirliyinin göstərdiyi səylərin və
apardığı danışıqların nəticəsi
olaraq fevralın 25-də Liviya İnsan Hüquqları Fondu
Xocalı qətliamı ilə bağlı bəyanat
yaymışdır.
Səfirlikdən
AzərTAc-a bildirmişlər ki, bəyanatda deyilir: "Liviya
İnsan Hüquqları Fondu bəyanat verərək bəşəriyyət
tarixində ən dəhşətli hadisələrdən biri
olan, 106-sı qadın, 63-ü uşaq, 70-i qoca olmaqla 613 nəfər
dinc azərbaycanlının qətlə yetirilməsi, 1275 nəfərin
girov götürülməsi, 150 nəfərin taleyinin bu
günə qədər bilinməməsi ilə nəticələnən
1992-ci ilin fevralın 26-da Azərbaycanın Xocalı şəhərində
erməni qüvvələri tərəfindən
insanlığa qarşı törədilmiş amansız, təcavüzkar,
qeyri-əxlaqi cinayət əməlini qınayır və kəskin
şəkildə pisləyir".
Bəyanatda
həmçinin onun surətlərinin Liviya Ümummilli
Konqresinə və Birləşmiş Millətlər Təşkilatına
göndəriləcəyi qeyd olunmuşdur.
Qeyri-hökumət
təşkilatı olan Liviya İnsan Hüquqları Fondu
2011-ci il noyabrın 11-də
Tripoli şəhərində təsis edilmişdir.
AzərTAc
Azərbaycan.-2013.- 27 fevral.- S.3.