Strasburqda Xocalı faciəsinin 21-ci ildönümü ilə bağlı mitinq keçirilmişdir

Strasburqda fəaliyyət göstərən "Azərbaycan evi"nin təşkilatçılığı, Azərbaycan Mədəni Əlaqələr və Azərbaycan Kültür cəmiyyətlərinin, Fransadakı Azərbaycanlı Tələbələr Assosiasiyasının dəstəyi ilə şəhərin Kleber meydanında Xocalı faciəsinin 21-ci ildönümü ilə bağlı mitinq keçirilmişdir. Türk Ailələri Birliyi hər il olduğu kimi, yenə mitinqdə həmrəylik nümayiş etdirmişlər.

Xocalı qurbanlarının xatirəsi bir dəqiqəlik sükutla anılmışdır.

Əllərində Azərbaycan və Türkiyə bayraqlarını, "Xocalıya ədalət", "Xocalı uşaqlarına ədalət", "Sarkisyan canidir", "Koçaryan Qarabağ canisidir", "Balayan qatildir", "Ermənilər terrorçudurlar, Qarabağı azad edin!" sözlərinin yazıldığı transparantların nümayiş etdirildiyi mitinqi açan "Azərbaycan evi"nin sədri Mustafa Alınca fevralın 25-dən 26-na keçən gecə sovet ordusunun 336-cı motoatıcı alayının köməyi ilə Azərbaycanın kiçik şəhəri Xocalıya soxulan erməni hərbi birləşmələrinin günahsız və dinc əhaliyə qarşı törətdiyi vəhşilikləri, hətta qadınlara, uşaqlara və yaşlı insanlara belə aman verməyərək qətlə yetirdiklərini xatırlatmışdır.

Xocalı faciəsi barədə Qərb mətbuatında, o cümlədən Fransanın "Le Monde", "Humanite" və digər mətbu orqanlarında məlumat verildiyini diqqətə çəkən M.Alınca bəşəriyyətə və insanlığa qarşı törədilmiş bu cinayətə dünya ictimaiyyətinin seyrçi münasibət bəsləməsindən xalqımızın təəssüf hissi keçirdiyini bildirmişdir. Əlləri minlərlə günahsız insanın qanına bulaşan Serj Sarkisyan, Robert Koçaryan, Zori Balayan və digər canilərin öz tutduqları əməllərə görə beynəlxalq cinayət məhkəməsi qarşısında cavab vermək əvəzinə, bu gün azadlıqda gəzmələri bağışlanılmaz haldır. Xaricdə yaşayan azərbaycanlılar və onlara həmişə dəstək olan qardaş türklər XX əsrin görünməmiş faciəsi zamanı həlak olan xocalılıları heç vaxt unutmayacaqlar.

Əsgər ƏLİYEV,

AzərTAc-ın xüsusi müxbiri

Paris

Azərbaycan.-2013.- 27 fevral.- S.4.