Türkiyə Prezidenti Abdullah Gülün Sarkisyanı təbrik etməsi Azərbaycanda acı təəssüf doğurdu

Ermənistanda əli qana batmış Serj Sarkisyan saxta prezident seçkilərinin qalibi hesab olunur. Seçkinin rəsmi nəticələri açıqlanmamışdan, əvvəl qurulmuş ssenari üzrə hərəkət edən terrorçu komanda artıq rəhbərinin ünvanına təbrikləri qəbul edirdi. İlk təbrik Rusiya Prezidenti Vladimir Putindən gəldi. Bu, Azərbaycan ictimaiyyəti üçün başadüşüləndir və burada elə bir qəribəlik axtarmağa, heyrətlənməyə dəyməz. Ancaq böyük qardaş saydığımız Türkiyə Respublikasının Prezidenti Abdullah Gülün terrorçunu, qondarma soyqırımından hər fürsətdə istifadə edən, Türkiyəyə torpaq iddiasını açıq-aşkar bildirən Serj Sarkisyanı təbrik etməsi Azərbaycanda acı təəssüf doğurdu. Hətta buna Milli Məclis səviyyəsində də etiraz olundu.

Qəzetimizə açıqlamasında Milli Məclisin deputatı, Bütöv Azərbaycan Xalq Cəbhəsi Partiyasının (BAXCP) sədri Qüdrət Həsənquliyev bildirdi ki, Türkiyə prezidentinin bu hərəkəti təəssüf hissi yaradır. BAXCP sədrinin qənaətinə görə, on minlərlə insanın Ermənistanda keçirilən prezident seçkilərinin nəticələrinə etiraz əlaməti olaraq müddətsiz və oturaq etiraz aksiyasına başladıqları bir zamanda demokratik dəyərlərə sadiq olduğunu bəyan edən bir ölkənin prezidentinin Serj Sarkisyanı təbrik etməsi demokratiyaya, insan hüquq və azadlıqlarına hayqırıq kimi qiymətləndirilməlidir: "Bəlli olduğu kimi Türkiyə ilə Ermənistan arasında rəsmi diplomatik münasibətlər mövcud deyil. Belə bir vəziyyətdə Abdullah Gülün Sarkisyanı təbrik etməsi başa düşülən deyil. Əgər kimlərsə belə addımların müqabilində Ermənistanın və ermənilərin qondarma soyqırımı və Türkiyəyə qarşı ərazi iddialarından əl çəkəcəklərini düşünürlərsə, yanılırlar. "Futbol diplomatiyası", Sürix protokolları, Ermənistan vətəndaşları olan qanunsuz miqrantlara Türkiyədə yaşamaq və işləmək üçün yaradılan şərait nəticə vermədiyi kimi, telefon zəngləri, təbriklər və bu kimi digər addımlar da heç bir nəticə verməyəcək. Çünki qondarma soyqırımı iddiaları ermənilərin, erməni diasporunun mövcudluğunu, Ermənistanın daxili və xarici siyasətinin təməl sütunlarını təşkil edir".

BAXCP sədri qardaş Türkiyənin rəsmiləri tərəfindən sərgilənən bu davranışın Azərbaycanda ürək ağrısı ilə qarşılandığını, insanların hisslərinə toxunduğunu vurğuladı: "Bu qəbildən olan addımlar iki qardaş dövlət arasında olan münasibətlərin səmimiliyini şübhə altına alır, Azərbaycan-Türkiyə münasibətlərinin daha da inkişaf etməsini arzulayan insanların mövqelərinə və ictimai rəyə olduqca ciddi və neqativ təsir göstərir. Xüsusilə də Xocalı soyqırımının 21-ci ildönümü ərəfəsində bu soyqırımı aktının əsas ideoloqlarından və təşkilatçılarından biri olan Sarkisyanın təbrik edilməsi heç bir şəkildə anlaşıla və qəbul edilə bilməz".

Deputatın fikrincə, bu qərarı Türkiyə xalqının qərarı kimi qəbul etmək yanlışlıqdır. Çünki Azərbaycan və Türkiyə qardaş ölkələrdir və bu qardaşlıq sona qədər də davam edəcək.

Milli Məclisin deputatı, Ana Vətən Partiyasının sədr müavini Zahid Oruc isə deyir ki, bu gün siyasəti mənəviyyat müstəvisində təhlil etməmək qaydası az qala onun əlifbasına çevrilib. Lakin diplomatiya da gərək normal bir hədəfə hesablansın və nəticə versin. Onun fikrincə, Türkiyə dövlət başçısı Sarkisyanı prezident seçilməsi münasibətilə təbrik edəndə hansı məqsədləri güddüyünü və ona nail olmaq ehtimalını hesablamaq o qədər də çətin deyil: "Yəhudilərə münasibət Avropada mədəniyyət göstəricisinə çevrilib. Xolokostu inkar insanlıq mövqeyi sayılmır və BMT xüsusi qərar çıxarıb ki, bütün xalqlar yəhudu qırğınlarını tanısın və onların dərdinə şərik olsun. Ermənilərə münasibət də uzun on illərin təbliğatının nəticəsi olaraq belə bir şəkil alıb ki, Abdullah Gül Avropa mədəniyyətinə və sivil münasibətlərə adi bir protokol jesti etmək istəyib. Lakin nəyin hesabına? Biz bu yerdə qətiyyən Qarabağın işğalını və Azərbaycanın müharibə gerçəkliyini türk Prezidentin üzərinə mənəvi öhdəlik kimi qoymaq istəmirik. Ola bilsin ki, qardaş ölkənin siyasi və taktiki planları bəzən qeyri-rasional addımlar atmağı tələb edə bilər. Hətta bu yerdə türk-erməni tarixi düşmənçiliyi və saxta soyqırımı kampaniyasını da arxa plana keçirmək mümkündür. Lakin heç uzaq keçmişə getmədən elə seçki tamaşasını bütövlükdə izləmək yetərdi ki, bu təbrikdən geri durasan və saxta diplomatik mesajı verməyəsən". Zahid Orucun sözlərinə görə, Ermənistanda bütün namizədlərin əsas platforması Ağrı dağı ideallarından, antitürk bəyanatlarından və Qarabağ platformasından ibarət olubsa, belə marafonun və seçki kriminallığının qalibini necə təbrik etmək olar?Axı sabah həmin qələbənin müəllifi Türkiyəyə ərazi iddiaları kimi verdiyi vədləri yerinə yetirməyə çalışacaq. Onda Sarkisyanı avantürist adlandırmağa əsaslar türk diplomatiyasının əlindən çıxmış olacaq: "Biz heç demokratiyadan danışmırıq. Bəşər Əsədi insanlıq düşməni adlandıran Türkiyə siyasi elitasının əlində on minlərlə fakt sübut edir ki, bəşəri cinayətkar olan Sarkisyan nəinki azərbaycanlıları, eləcə də erməniləri qətlə yetirərək, onların gələcəyini işğal edərək dövlət başçısı "seçilib". Ona görə yüz protokol pozulsa da, Allahın mizan-tərəzisinin düzlüyü naminə Şeytanı təbrik etməzlər!".

Milli Dirçəliş Hərəkatı Partiyasının sədri, deputat Fərəc Quliyev isə bildirdi ki, bir-birinə tarixən bağlı olan, iki qardaş ölkə arasında ayrı-seçkilik salmaq düzgün deyil: "Biz Azərbaycan və Türkiyə arasındakı müttəfiqliyi anlayırıq və buna hörmətlə yanaşırıq. Azərbaycan daim Türkiyəni özünə qardaş ölkə hesab edib və bu gün də yüksək münasibətlərimiz davam edir. Biz bütün məsələlərdə qardaş dövlətlə məsləhətləşməyə də hazırıq. Ancaq təəccüblüsü ondadır ki, xarici siyasətimizi birgə müzakirə etdiyimiz və ortaq bayraq, ortaq ordu yaratmaq ideyası ortaya atıldığı bir vaxtda belə bir addımın atılması bizi çox məyus edir. Əgər Türkiyə dövlətinin başında duran bir şəxs belə davranış nümayiş etdirirsə, biz buna adekvat cavabımızı verməliyik və hesab eləmirik ki, bu, Türkiyənin iradəsidir. Bizim də iradımız Türkiyəyə yox, məhz Abdullah Gülün özünədir".

Deputat eyni zamanda bildirdi ki, bir vaxt Türkiyə Prezidenti qondarma prezident Serj Sarkisyana qarşı yanlış davranaraq onun üçün xüsusi kreslo hazırlatdırıb, hətta evində xüsusi yemək də bişirtdirib. Ancaq əvəzində Sarkisyan Ermənistana qayıtdıqdan sonra başqa iddialarından danışıb. İndi isə yenə onun tərəfindən Azərbaycanı narazı salacaq jestin edilməsi hər bir kəsdə təəssüf doğurub: "Bir daha deyirəm ki, bu məsələ yalnız təəssüf doğurub və biz yenə də belə halların ortaya çıxdığı vaxt öz etirazımızı bildirəcəyik".

Rəşad BAXŞƏLİYEV

Azərbaycan.-2013.- 27 fevral.- S.6.