Yaponiyada Xocalı soyqırımı qurbanlarının xatirəsinə həsr edilmiş tədbirlər davam edir

Yaponiyada Xocalı soyqırımının 21-ci ildönümü ilə əlaqədar Azərbaycanın bu ölkədəki səfirliyi tərəfindən təşkil olunmuş tədbirlər davam edir.

Fevralın 22-də səfirlik tərəfindən Yaponiyanın parlamentinə, Nazirlər Kabinetinə, digər dövlət qurumlarına, bu ölkədə fəaliyyət göstərən diplomatik nümayəndəliklərə və KİV-lərə erməni millətçilərinin 21 il əvvəl törətdiyi qanlı faciə haqqında məlumat göndərilmişdir. Məlumatda qeyd edilmişdir ki, Xocalıda baş verənlər təkcə Azərbaycan xalqına qarşı soyqırımı deyil, bəşəriyyət, insanlıq əleyhinə törədilmiş qanlı cinayətdir. Qara dənizdən Xəzər dənizinədək olan ərazidə "Böyük Ermənistan" dövləti yaratmaq kimi xəstə xülyanın əsiri olmuş erməni millətçilərinin xalqımıza qarşı törətdikləri bu növbəti kütləvi qırğın zamanı 613 nəfər öldürülmüş, 487 nəfər şikəst olmuş, 1275 dinc sakin - qocalar, uşaqlar, qadınlar əsir götürülərək ağlasığmaz zülmə, təhqir və həqarətlərə məruz qalmışlar. 150 nəfərin taleyi hələ də məlum deyildir. Soyqırımı zamanı insanlar xüsusi qəddarlıqla öldürülmüş, diri-diri yandırılmış, başlarının dərisi soyulmuş, bədən əzaları və başları kəsilmiş, gözləri çıxarılmış, hamilə qadınların qarnı süngü ilə deşik-deşik edilmişdir.

Vurğulanmışdır ki, dinc əhaliyə qarşı törədilmiş qırğın beynəlxalq hüququn normalarına və prinsiplərinə əsasən məhz soyqırımıdır və artıq bir neçə ölkə, eləcə də bir sıra beynəlxalq təşkilatlar bu qanlı cinayəti məhz Xocalı soyqırımı kimi tanımışlar.

Xocalı soyqırımının 21-ci ildönümü ilə əlaqədar, eyni zamanda, səfirlikdə faciəni əks etdirən müxtəlif nəşrlərdən və fotoşəkillərdən ibarət sərgi də təşkil edilmişdir. Səfirliyə müraciət edən Yaponiya vətəndaşlarına faciə, onun səbəbləri və nəticələri haqqında ətraflı məlumat verilir. Onlara Heydər Əliyev Fondu tərəfindən hazırlanmış və səfirliyə göndərilmiş materiallar, o cümlədən kitablar və broşürlər paylanır.

Fevralın 22-də açılmış sərgi ayın sonunadək davam edəcəkdir.

Vüqar AĞAYEV,

AzərTAc-ın xüsusi müxbiri

Tokio

Azərbaycan.-2013.- 27 fevral.- S.6.