Xocalı soyqırımı qurbanlarının xatirəsi xarici ölkələrdə anılmışdır

Vaşinqton

Fevralın 26-da Xocalı qətliamının 21-ci ildönümü ilə əlaqədar doğma Azərbaycanımızda və həmvətənlərimizin yaşadıqları dünyanın hər bir guşəsində olduğu kimi, Vaşinqtonda keçirilmiş xüsusi mərasimdə də faciə qurbanlarının xatirəsi ehtiramla anılmışdır.

Azərbaycanın Birləşmiş Ştatlardakı səfirliyi və ABŞ Azərbaycanlıları Şəbəkəsi tərəfindən Vaşinqton şəhərində fəaliyyət göstərən Höte adına Alman Mədəniyyət Mərkəzində təşkil olunmuş mərasimdə diplomatik korpusun, ABŞ-ın dövlət qurumlarının, təhsil ocaqlarının, araşdırma mərkəzlərinin və yerli ictimaiyyətin nümayəndələri, eləcə də Azərbaycan, türk, yəhudi və digər icmaların təmsilçiləri iştirak etmişlər.

Azərbaycanın ABŞ-dakı səfirliyindən AzərTAc-a bildirmişlər ki, tədbirdə Xocalı soyqırımı qurbanlarının əziz xatirəsi bir dəqiqəlik sükutla yad edilmişdir.

Toplantıda Azərbaycanın ABŞ-dakı səfiri Elin Süleymanov, ABŞ Konqresinin İllinoys ştatından seçilmiş üzvü Rəndi Haltqren (Randy Hultgren), ABŞ Azərbaycanlıları Şəbəkəsinin həmtəsisçisi Adil Bağırov və Vaşinqtonda fəaliyyət göstərən Qarabağ Fondunun icraçı direktoru Diana Altman çıxış edərək Xocalı soyqırımının dəhşətli nəticələrindən danışmışlar.

Səfir Elin Süleymanov 1992-ci ilin şaxtalı fevral günlərində Xocalıda yaşayan həmvətənlərimizin düçar olduqları qətliam və erməni qəsbkarlarının insanlığa sığmayan vəhşiliklərini faktların və rəqəmlərin dili ilə diqqətə çatdırmış, bu qırğının xalqımızın qan yaddaşında buraxdığı izlərdən söz açmışdır. O, həmçinin Ermənistan-Azərbaycan, Dağlıq Qarabağ münaqişəsinin tezliklə, ədalətli şəkildə həll edilməsinin vacibliyini vurğulamış, eyni zamanda, xalqımızın münaqişə boyu məruz qaldığı məşəqqətlərə baxmayaraq, öz ənənəvi tolerantlığını qoruyub-saxladığını söyləmişdir.

Konqresmen Rəndi Haltqren Azərbaycan xalqının dostu olaraq Xocalıda faciəvi şəkildə həyatlarını itirmiş insanların xatirəsini yad etmək üçün mərasimə qatıldığını bildirmiş və öz tərəfindən bir müttəfiq kimi ABŞ-ın ölkəmizin inkişafı və rifahına verdiyi dəstəyin artırılması üçün səylərini davam etdirəcəyini diqqətə çatdırmışdır.

ABŞ Azərbaycanlıları Şəbəkəsinin həmtəsisçisi Adil Bağırov öz növbəsində erməni hərbi qüvvələrinin Xocalıda törətdikləri qanlı hadisələrin soyqırımı kimi qiymətləndirilməsi barədə ABŞ-ın bir neçə ştatı tərəfindən qəbul edilən qətnamələr və eləcə də Ağ evin internet səhifəsində Xocalı faciəsi ilə bağlı həyata keçirilmiş uğurlu petisiya kampaniyasının daşıdığı əhəmiyyət haqqında fikirlərini bölüşmüşdür.

Qarabağ Fondunun icraçı direktoru Diana Altman tədbir iştirakçılarını Xocalı soyqırımının başvermə səbəbləri, o cümlədən şəhərin coğrafi mövqeyi, Azərbaycan üçün malik olduğu tarixi və mənəvi dəyəri, yerli əhalinin faciəyədək yaşadığı ağır günlər barədə məlumatlandırmışdır.

Tədbir iştirakçıları həmçinin Xocalı soyqırımı ilə bağlı Heydər Əliyev Fondunun dəstəyi ilə təşkil edilmiş fotosərgi və Qarabağ Fondunun təqdimatında azərbaycanlı rəssam Nərminə Vəliyevanın Xocalıya dair əsərləri ilə tanış olmuşlar.

Mərasim amerikalı musiqiçilər Şele Falk və Sindi Rozenberqin skripka və kontrabasda ifa etdikləri qəmgin musiqi sədaları altında Xocalı qurbanlarının adlarının toplantı zalındakı böyük ekranda bir-bir əks olunması ilə başa çatmışdır.

Malayziya

Azərbaycan Respublikası Prezidenti Administrasiyasının sərəncamı ilə təsdiq edilmiş Xocalı soyqırımının iyirmi birinci ildönümünün keçirilməsi ilə bağlı tədbirlər planına uyğun olaraq ölkəmizin Malayziyadakı səfirliyi Kuala Lumpur şəhərində anma mərasimi təşkil edilmişdir.

Yerli ictimaiyyət nümayəndələrinin, dövlət qurumlarını təmsil edən şəxslərin, Azərbaycanın aidiyyəti orqanları ilə əməkdaşlıq edən Malayziya şirkətlərinin əməkdaşlarının iştirak etdikləri tədbirdə əvvəlcə Xocalı soyqırımı qurbanlarının xatirəsi bir dəqiqəlik sükutla yad edilmişdir.

Azərbaycanın Malayziyadakı səfiri Tahir Kərimov Xocalı soyqırımı, Ermənistanın işğalçılıq siyasəti, Azərbaycana qarşı elan olunmamış müharibə, Ermənistanın işğalçı qoşunları tərəfindən törədilmiş müharibə cinayətləri haqqında ətraflı danışmışdır. Səfir Xocalı soyqırımına hüquqi qiymət verilməsi prosesindən, dünya ictimaiyyətinin diqqətinin bu faciəli hadisəyə yönəldilməsindən danışmış və bəzi ölkələrin parlamentlərində Xocalı cinayətinin milli zəmində həyata keçirilmiş soyqırımı olaraq təsdiqləndiyini vurğulamışdır.

Mərasim keçirilən salonda Xocalı soyqırımı ilə bağlı kitablardan, jurnallardan ibarət stend hazırlanmışdır. Həmin materiallar mərasim iştirakçılarına paylanmışdır.

Ankara

Ankaranın Kızılcahamam rayonunda Xocalı soyqırımı qurbanlarının xatirəsi anılmışdır.

Azərbaycanın Türkiyədəki səfirliyi və Kızılcahamam bələdiyyəsinin təşkil etdikləri tədbirdə Azərbaycan Respublikasının Prezidenti Administrasiyası İctimai-siyasi məsələlər şöbəsinin müdiri Əli Həsənov, Milli Məclisin deputatları Yaqub Mahmudov və Musa Qasımlı, Ankaranın Kızılcahamam bələdiyyəsinin sədri Coşkun Ünal, diaspor təşkilatlarımızın və ictimaiyyətin nümayəndələri, Ankarada təhsil alan tələbələrimiz iştirak etmişlər.

Şəhidlərimizin əziz xatirəsi bir dəqiqəlik sükutla yad edilmiş, Azərbaycanın və Türkiyənin dövlət himnləri səslənmişdir.

Xocalı soyqırımı ilə bağlı Heydər Əliyev Fondu tərəfindən türk dilində hazırlanmış müfəssəl sənədli film nümayiş etdirilmişdir.

Tədbirdə Ankaranın Kızılcahamam bələdiyyəsinin sədri Coşkun Ünal, Azərbaycan Respublikası Milli Məclisinin deputatları Yaqub Mahmudov, Musa Qasımlı, "Xocalıya ədalət!" beynəlxalq kampaniyasının Türkiyə təmsilçisi Gözde Kılıç və Azərbaycanın Türkiyədəki səfiri Faiq Bağırov çıxış edərək XX əsrin dəhşətli faciəsi olan Xocalı soyqırımı, torpaqlarımızın işğalından danışmışlar.

Sonra tədbir iştirakçılarına səfirliyimiz və Kızılcahamam bələdiyyəsinin dəstəyi ilə inşası davam etdirilən Xocalı soyqırımı abidəsi ilə bağlı məlumat verilmişdir.

Tədbir iştirakçıları Xocalı soyqırımı ilə bağlı təşkil edilmiş fotosərgi ilə də tanış olmuşlar.

Ankarada keçirilmiş bütün tədbirlərdə "Xocalıya ədalət!" kampaniyası çərçivəsində imzalar toplanmışdır.

Litva

Litvada Xocalı faciəsinin 21-ci ildönümü ilə bağlı silsilə tədbirlər davam etdirilir.

Azərbaycanın Litvadakı səfirliyindən AzərTAc-a bildirmişlər ki, bir neçə gün əvvəl Avropa kinematoqrafçılarının lentə aldıqları "Sonu olmayan dəhliz" sənədli filminin Vilnüsdə təqdimatı keçirilmişdir. Litva kütləvi informasiya vasitələrində Xocalı soyqırımına həsr olunmuş müxtəlif yazı və məqalələr dərc olunmuş, səfir Həsən Məmmədzadənin müsahibələri yayımlanmışdır.

Soydaşlarımız fevralın 25-də Ermənistanın Litvadakı səfirliyinin qarşısında etiraz aksiyası keçirmişlər. Vilnüs şəhər meriyasının icazəsi ilə keçirilən piketdə "Günəş" assosiyasiyasının, Litva azərbaycanlı gənclər təşkilatı AYOL-un üzvləri, həmçinin Litvada yaşayan soydaşlarımız Ermənistan səfirliyi qarşısında "Xocalıya ədalət!" şüarları səsləndirmiş, öz haqlı tələblərini irəli sürmüşlər. Piket Azərbaycan himninin ifası ilə sona çatmışdır.

Litvanın ikinci böyük şəhəri Kaunasda da AYOL və İngiltərədə fəaliyyət göstərən "Odlar yurdu" cəmiyyəti "Xocalıya ədalət!" adlı aksiya keçirmişlər. Tədbir fevralın 26-da tələbələr, üzərində "Justice for Khojaly" yazıları olan köynək geyinərək əllərində Xocalı faciəsini əks etdirən bir sıra müxtəlif mesajlı plakatlarla Kaunas şəhərinin mərkəzi Laisves (Azadlıq) prospektində dinc etiraz şüarlarını səsləndirmişlər. Bununla yanaşı, xiyaban boyu Xocalı faciəsi qəddarlığını əks etdirən ingilis və Litva dillərində foto və posterlər sərgilənmişdir. Sərgiyə maraq göstərən və informasiya əldə etmək istəyən yerli əhaliyə, həmçinin əcnəbi tələbələrə Litva və ingilis dillərində bukletlər paylanmışdır.

Azərbaycan.-2013.- 28 fevral.- S.11.