Bakıda «Çin və
Azərbaycanın iqtisadi inkişaf
fenomeni vətəndaşların sosial-iqtisadi hüquqlarının
inkişafı kontekstində» mövzusunda
Beynəlxalq konfrans keçirilmişdir
İyulun 1-də Bakıda AMEA İnsan Hüquqları və Çin Müasir Beynəlxalq Münasibətlər institutlarının birgə təşkilatçılığı ilə "Çin və Azərbaycanın iqtisadi inkişaf fenomeni vətəndaşların sosial-iqtisadi hüquqlarının inkişafı kontekstində" mövzusunda Beynəlxalq konfrans keçirilmişdir.
AzərTAc xəbər verir ki, tədbirdə Milli Məclisin deputatları, müvafiq nazirlik və komitələrin nümayəndələri, beynəlxalq təşkilatların təmsilçiləri, alimlər və kütləvi informasiya vasitələrinin nümayəndələri iştirak etmişlər.
Konfransın
açılışında AMEA İnsan Hüquqları
İnstitutunun direktoru, Milli Məclisin deputatı Aytən
Mustafayeva qeyd etmişdir ki, Azərbaycan-Çin münasibətlərinin
çox qədim tarixi var və bu münasibətlər
minilliklər ərzində formalaşmışdır. Xalqlarımız
və ölkələrimiz arasında ikitərəfli
qarşılıqlı əməkdaşlıq bu gün də dinamik inkişaf edir, iqtisadi, siyasi, elmi və s. sahələri əhatə edir.
Azərbaycan Respublikası hazırda dünyanın nəhəng
iqtisadi, siyasi, elmi, milli-mədəni, milli-dini
mərkəzlərindən olan Çin Xalq Respublikası
ilə əlaqələrə prioritet əhəmiyyət
verir. Bu baxımdan
AMEA-nın İnsan Hüquqları İnstitutu da ikitərəfli
əməkdaşlığa
töhfəsini verməkdədir.
İnsan Hüquqları İnstitutu artıq Çinin Müasir Beynəlxalq Münasibətlər Akademiyası və Sosial Elmlər Akademiyasının Hüquq İnstitutu ilə əməkdaşlıq müqavilələri imzalamışdır. Müasir Beynəlxalq Münasibətlər Akademiyası ilə imzalanan əməkdaşlıq müqaviləsinə əsasən, birgə konfransların keçirilməsi, hər iki qurum əməkdaşlarının məqalələrinin həmin ölkələrin elmi jurnallarında çap olunması və təcrübə mübadiləsi keçirilməsi nəzərdə tutulmuşdur. Artıq İnsan Hüquqları İnstitutu "Dirçəliş-XXI əsr" jurnalını və ingilis dilində olan bir neçə vacib nəşri Çinin adı çəkilən akademiyasına təqdim etmişdir. Eyni zamanda, institut tərəfindən akademiyanın "Contemporary İnternational Relations" jurnalının son 2 ildə nəşr olunmuş nömrələri də alınıb öyrənilməkdədir.
A.Mustafayeva bildirmişdir
ki, bu gün
Çin də, Azərbaycan da iqtisadi cəhətdən
sürətlə inkişaf etməkdədir.
Həm Azərbaycan,
həm də Çin regionda liderlik statuslarını qoruyub saxlayır. İnsan Hüquqları İnstitutu
iki ölkə arasında strateji əlaqələrin qurulması,
sosial-iqtisadi hüquqların
təmin olunması istiqamətində həyata
keçirilən siyasətin
elmi-nəzəri əsasları,
həmçinin siyasi
aspektləri əhatə
edən əlaqə və münasibətlər
barədə tövsiyələr
işləyib hazırlamışdır.
AMEA-nın vitse-prezidenti,
Milli Məclisin deputatı, akademik İsa Həbibbəyli Azərbaycan ilə Çin arasında elmi əlaqələrin inkişaf etdirilməsinin vacibliyindən danışmışdır. Bu gün Çində bütün sahələrlə
yanaşı, elm sahəsi
də sürətlə
inkişaf edir. Çində müasir elmi
nailiyyətlərin tətbiqi
ilə eyni zamanda, qədim Çin elminin zəngin ənənələrindən
də istifadə edilməkdədir. Son illər ölkəmizin müxtəlif sahələrdə,
o cümlədən elmi
sahədə Çin
ilə əməkdaşlığı
təqdirəlayiq hesab
edilməlidir. Sevindirici haldır
ki, AMEA-nın İnsan Hüquqları İnstitutu da bu istiqamətdə töhfəsini verir.
Bu cür əməkdaşlıq
münasibətləri Çinin
digər elmi-tədqiqat
institutları ilə də yaradılacaq və elmimizin inkişafına, xalqlarımızın
rifahına xidmət edəcəkdir.
Çin
Xalq Respublikasının
ölkəmizdəki səfiri
Xun Tşyuin bildirmişdir ki, Azərbaycanın müstəqilliyinin
ilk illərində ölkələrimiz
arasında ticarət dövriyyəsi 1,5 milyon dollar təşkil etmişdi. Ötən il isə
bu rəqəm 1 milyard dolları ötmüşdür. Bu göstərici iki ölkə arasında əlaqələrin inkişaf
tempini yaxşı xarakterizə edir. Çin və Azərbaycan arasında ənənəvi
olaraq dostluq münasibətləri mövcuddur.
Ölkələrimiz və xalqlarımız
arasında artıq uzun əsrlərdir ki, tarixi, mədəni
və iqtisadi əlaqələr qurulmuşdur.
Çin
Azərbaycan ilə əlaqələrin inkişafına
böyük əhəmiyyət
verir.
Diplomat vurğulamışdır ki, Azərbaycan və Çin müstəqillik və ərazi bütövlüyü
kimi vacib aspektlər də daxil olmaqla hər
iki ölkənin köklü maraqlarına
aid məsələlərdə bir-birini dəstəkləyirlər. Eyni zamanda,
əməkdaşlığımız yalnız iqtisadi sahə ilə məhdudlaşmır. Çin və
Azərbaycan arasında
humanitar və mədəniyyət sahələrində
qarşılıqlı əlaqələr
uğurla inkişaf etmişdir. Azərbaycanın bir sıra təhsil müəssisələrində
Çin Mədəniyyət
mərkəzləri açılmış
və Çin dili tədris olunur. Bu, ölkələrimizin
arasında münasibətlərin
sonrakı inkişafı
üçün yüksək
potensialın olduğunu
göstərir.
Çin Müasir Beynəlxalq Münasibətlər Akademiyasının
Rusiya və MDB Ölkələri İnstitutunun
direktoru Fen Yuszün Azərbaycan-Çin münasibətlərinin
indiki səviyyəsindən
məmnunluq duyduğunu
ifadə etmişdir. O, Çin
iqtisadiyyatında son illər
baş verən inkişaf meyilləri barədə məlumat verərək, intensiv qarşılıqlı səfərlərin,
elmi-praktik konfransların,
fikir mübadilələri
aparmağın məqsədəuyğunluğunu
qeyd etmişdir.
Daha sonra plenar sessiya işinə başlamışdır.
Milli Məclisin İqtisadi siyasət komitəsinin sədri, akademik Ziyad Səmədzadənin
"Çinin iqtisadi
reform fenomeni və onun dünya iqtisadiyyatının inkişafında
rolu", Milli Məclisin deputatı Vahid Əhmədovun "Azərbaycan-Çin iqtisadi
əlaqələri, azad
iqtisadi zonalar",
AMEA İnsan Hüquqları
İnstitutunun nümayəndəsi
Elşən Nəsibovun
"Çin və Azərbaycan: vətəndaşların
sosial-iqtisadi hüquqlarının
təmin olunması yolunda dövlətlərin
həyata keçirdikləri
siyasətin məzmunu
- oxşarlıqlar və
uyğunluqlar kontekstində"
mövzusunda məruzələri
dinlənilmişdir.
Sessiyalarla davam edən tədbirdə "Çin
iqtisadiyyatının strateji
transformasiyasının məzmunu
və fonu", "Çin və Azərbaycan arasında iqtisadi əlaqələr",
"Çin və Azərbaycan arasında əməkdaşlığın perspektivi və vəziyyəti", "Çində
və Azərbaycanda modernləşmə: müasir
çağırışlar və ənənə"
və digər mövzularda məruzələr
dinlənilmişdir.
Müzakirələr
zamanı Çin və Azərbaycanın iqtisadi
inkişafı kontekstində insan hüquqlarının
müdafiəsi məsələləri ətrafında da
geniş fikir mübadiləsi aparılmış,
iştirakçılar müzakirə olunan məsələlərlə
bağlı təklif və mülahizələrini
bildirmişlər.
Azərbaycan.-2013.- 2 iyul.- S.10.