UNESCO-nun baş direktoru İrina Bokovanın Gəncənin 4 min illik yubileyi ilə əlaqədar təbrik məktubu bu qədim şəhərin sakinləri arasında böyük rezonans doğurmuşdur

Xəbər verdiyimiz kimi, UNESCO-nun baş direktoru İrina Bokova Nizami Gəncəvi Beynəlxalq Mərkəzinə ünvanladığı müraciətdə Azərbaycan xalqını qədim Gəncə şəhərinin təməlinin qoyulmasının 4 min illik yubileyi münasibətilə təbrik etmişdir.

AzərTAc xəbər verir ki, bu barədə ümumşəhər toplantısında ətraflı danışılmış və UNESCO-nun baş direktorunun təbrik məktubunun mətni oxunmuşdur.

Məktubda qeyd edilir ki, qədim "İpək yolu"nun üstündə yerləşən Gəncə şəhəri bu yol boyu mövcud olan ticarət və mədəni əlaqələrin qurulmasında böyük rol oynamışdır. Gəncə həmişə UNESCO-nun ideyası olan dialoq və qarşılıqlı anlaşmanın əsasında duran bilik, elm və müxtəlif insanların tolerantlığının qovşağı olmuşdur. Bu ruha malik Gəncə tarixin bütün dövrlərində filosofların, şairlərin, alimlərin məkanı olmuşdur. Təsadüfi deyildir ki, məhz dahi Nizami Gəncəvi və Məhsəti Gəncəvi burada yaşamış və yaratmışlar.

Toplantıda Gəncə Şəhər İcra Hakimiyyətinin başçısı Elmar Vəliyev, AMEA-nın Gəncə Elmi Mərkəzinin direktoru Fuad Əliyev, Gəncə Dövlət Universitetinin rektoru Yadigar Əliyev, tədqiqatçı-alım Tofiq Xəlilov və başqaları çıxış edərək Gəncənin əsl tarixinin dəqiqləşdirilməsində misilsiz xidmətləri olan Azərbaycan dövlətinin başçısı İlham Əliyevə və milli dəyərlərimizin qoruyucusu, Heydər Əliyev Fondunun prezidenti, UNESCO-nun və İSESCO-nun xoşməramlı səfiri Mehriban xanım Əliyevaya minnətdarlıqlarını bildirmişlər.

Azərbaycan.-2013.- 4 iyul.- S.4.