Əqidə və mövqe sahibi

Yaxşı insan Allahın Yerdəki elçisidir - demişlər. Dostları, onu tanıyanlar Yaşar müəllim haqqında danışanda ilk ifadə məhz "yaxşı insan" sözü olur. Yaşar müəllim birinci görüşdən insanların yadında qalır, onlarda xoş və səmimi ovqat yaradır.

Söhbət müstəqilliyin ilk dövründə Azərbaycan Respublikasının Milli Məclisinin vitse-spikeri olmuş, sabiq millət vəkili, uzun müddət Azərbaycan Respublikasının Çin Xalq Respublikasındakı fövqəladə və səlahiyyətli səfiri vəzifəsində işləmiş, bir çox elmi məqalələrin və monoqrafiyaların müəllifi, səfir, həkim, ictimai xadim, ən əsası, sadə və səmimi insan Yaşar Əliyevdən gedir.

Yaşar Əliyev 1948-ci il iyul ayının 5-də Bakı şəhərində anadan olub. İxtisasca həkim olan Yaşar müəllim uzun illər Semaşko (indiki Musa Nağıyev) adına 1 saylı şəhər klinik xəstəxananın baş həkimi vəzifəsində çalışıb. Bu yerdə bir anlığa Yaşar Əliyevin gənclik dostu, Sumqayıt Şəhər İcra Hakimiyyətinin başçısı Eldar Əzizovun onun haqqında dediklərinə diqqət yetirək:

- Biz Yaşar Əliyevlə səksəninci illərin ortalarından tanışıq. O zaman mən Azərbaycan Komsomolu Mərkəzi Komitəsində çalışırdım. Bizim tanışlığımız qısa müddət ərzində səmimi dostluğa çevrildi. Yaşar Əliyev çox saf adamdır, dostluğa olduqca sadiqdir. Həyatda belə insanlar az-az olurlar. Bir dəfə xatırlayıram, respublika Komsomolunun Mərkəzi Komitəsində işləyərkən bir əməkdaşımızın davranışı ilə bağlı çoxlu söz-söhbətlər gəzirdi. Bu şəxs həm də qan xəstəsi olduğuna görə onu işdən çıxara bilmirdim. Bir gün Yaşar müəllim mənə zəng vurub dedi ki, bilirəm, sənin işçin haqqında müxtəlif söhbətlər var, onu mənim yanıma göndər.

Onun bu hərəkəti dostluğa sədaqətin, səmimi təəssübkeşliyin bir nümunəsi idi.

Yaşar müəllim qətiyyətli, aydın mövqe sahibidir. Taleyüklü məqamlarda xalqının mənafeyi baxımından ən doğru, dürüst olanı seçməsi, lazımi anda cəsarət göstərməsi onun mühüm xüsusiyyətlərdəndir. Milli Məclisin deputatı olarkən, eyni zamanda, Milli Şuranın da üzvü idi. Həmin dövrdə isə ölkədə gərginlik, ziddiyyətlər gündən-günə artırdı. Xalq birmənalı şəkildə Heydər Əliyevin hakimiyyətə gəlməsini dəstəkləyirdi. Bu ərəfədə Yaşar Əliyev növbəti dəfə öz prinsipial mövqeyini nümayiş etdirdi. O vaxt deputatlar məsələ qaldırmışdılar ki, Heydər Əliyev Milli Şuranın tərkibinə salınsın. İqtidarda olan indiki müxalifət isə buna qarşı çıxırdı. Həmin anda Yaşar Əliyev öz mandatından Heydər Əliyevin xeyrinə imtina edəcəyini bildirdi və ciddi bir mövqe ortaya qoydu. Bu hərəkəti ilə Yaşar Əliyev bir daha sübut etdi ki, o, Azərbaycanın nicatı naminə ən düzgün mövqedədir, millətini, xalqını sevən vətənpərvər insandır!

Yaşar Əliyev həm də yüksək intellekt sahibidir. Onun intellekti geniş spektri əhatə edir. Bu insanla istənilən sahədə rahatlıqla danışmaq olar. Gözəl həmsöhbət, müsahib kimi maraqlı şəxsdir. Məqsədyönlülük, yenilikçilik, prinsipiallıq onun xarakterik xüsusiyyətləri içərisində ayrıca vurğulanmalıdır. O, harada çalışmasından asılı olmayaraq, heç zaman dostlarını unutmur, onları daim yad edir.

Yaşar Əliyev çox gözəl auraya malikdir. Belə ki, onunla bir dəfə oturub söhbət edən hər kəs bu insanı qətiyyən yaddan çıxara bilmir. Milli-mənəvi dəyərlərə bağlılıq, yüksək mədəniyyət, alicənablıq kimi keyfiyyətlər Yaşar Əliyevin portretinə xas ştrixlərdir. Yüksək erudisiyası, təmkini, gələcəyə inam hissi başqaları üçün daim örnəkdir. İndiyədək bir nəfər belə tapılmaz ki, onun haqqında mənfi mənada nəsə bir söz desin. Hamı birmənalı şəkildə Yaşar müəllimin dəyərli ziyalı, yaxşı insan olduğunu təsdiqləyir.

1988-ci ildən Milli Azadlıq Hərəkatının fəal iştirakçılarından olan Yaşar Əliyev 1990-cı ildə Azərbaycan Respublikası Ali Sovetinə keçirilən seçkilərdə deputat seçilir. Və həmin andan etibarən ictimai-siyasi sahədəki fəaliyyəti bu insanın həyatının bir parçasına çevrilir. Müstəqillik Aktının hazırlanmasında və qəbul olunmasında, ulu öndərin rəhbərliyi altında müstəqil Azərbaycan Respublikasının ilk Konstitusiyasının işlənməsində, Yeni Azərbaycan Partiyasının yaradılması və təşkilatlanmasında - bütün taleyüklü problemlərin həllində fəal iştirak edir, öz mövqeyini ortaya qoyur.

YAP İcra Aparatının rəhbəri Əli Əhmədov Yaşar Əliyevin ictimai-siyasi fəaliyyəti ilə bağlı deyir:

- Hər şeydən öncə, Yaşar müəllim əsl vətəndaşdır, alovlu vətənpərvərdir! Onun bütün fəaliyyəti, duyğuları və düşüncələri vətənpərvərlik mövqeyi üzərində qurulub. Əgər biz Azərbaycanın taleyüklü məsələlərinin həll olunduğu ötən əsrin 80-90-cı illərinə nəzər salsaq, həmin mübarizlər içərisində Yaşar müəllimi ön sıralarda görərik. Yaşar Əliyev Azərbaycanın müstəqillik tarixində öz izini qoyan insanlardan biridir.

Siyasi baxışlarında hər zaman sabit və prinsipial olan Yaşar müəllim ölkənin bütün düşüncə sahibləri kimi ümummilli liderin hakimiyyətə qayıdışını şərtləndirən amilləri yaxşı dərk edir, gündən-günə ağırlaşan ictimai-siyasi vəziyyətdən, torpaqlarımızın ermənilər tərəfindən işğal edilməsindən, Azərbaycanın öz müstəqilliyini itirmək təhlükəsi ilə üz-üzə qalmasından ciddi narahatlıq keçirirdi. Yaşar Əliyev Azərbaycanın nicatı baxımından ən düzgün mövqeyi - ulu öndər Heydər Əliyevin siyasi kursuna sadiqlik xəttini seçmişdi. O, parlamentin üzvü kimi xalqın təkidli tələbi ilə Heydər Əliyevin hakimiyyətə qayıtması fikrini cəsarətlə səsləndirən şəxslərdən olmuşdur. Ümummilli liderin siyasi kursunu dönmədən müdafiə etmiş, Heydər Əliyevin rəhbərliyi altında həyata keçirilən dövlət quruculuğu prosesinə layiqli töhfəsini vermişdir. Heydər Əliyev siyasətinə dərindən sədaqət bu şəxsiyyəti bir siyasətçi, bir vətəndaş, vətənpərvər insan kimi fərqləndirən mühüm amillərdəndir.

Yaşar Əliyev cavan yaşlarından siyasətə qoşulub və mən onu həm də təcrübəli parlamentari hesab edirəm. O, səriştəli diplomatdır. Ömür yolu olduqca maraqlı keçib, fəaliyyət sahəsi çoxşaxəliliyi ilə seçilib. Gənc yaşlarından həkim kimi səhiyyə sisteminin inkişafı üçün çalışıb. Həyatının müəyyən mərhələsindən sonra yeni bir fəaliyyət istiqamətinə keçib. Uzun illər Azərbaycanı bir çox beynəlxalq tədbirlərdə təmsil edib. Azərbaycanın Çin Xalq Respublikasındakı fövqəladə və səlahiyyətli səfiri kimi fəaliyyət göstərib. Bu vəzifədə də özünün təcrübəsi, dünyagörüşü, yüksək mədəniyyəti, mütərəqqi yanaşmaları, işə ciddi münasibəti ilə digər diplomatlardan seçilməyi, fərqlənməyi bacarıb. Biz Çində səfərlərdə olarkən Yaşar Əliyevin bir diplomat, səfir kimi sanbalının, nüfuzunun, layiqli xidmətinin şahidi olduq. O, həkim kimi fəaliyyət göstərəndə də, ictimai-siyasi xadim və diplomat kimi çalışanda da eyni şəkildə insani keyfiyyətlərə malik olub. Bu baxımdan mən Yaşar Əliyevin həm ölkə daxilində, həm də ölkədən kənarda böyük nüfuzunun, bir sözlə, xüsusi çəkisinin olduğunu deyə bilərəm.

Azərbaycanın Çin Xalq Respublikasındakı fövqəladə və səlahiyyətli səfiri kimi fəaliyyət göstərən Yaşar müəllim Azərbaycan həqiqətlərinin tanıdılmasında, Dağlıq Qarabağ münaqişəsinin Çin ictimai mühitinə təqdim edilməsində ciddi işlər görüb.

Yaşar Əliyevin diplomat kimliyini xarici işlər nazirinin müavini Xələf Xələfov belə xarakterizə edir:

- Yaşar Əliyevi əvvəla dövlət adamı kimi tanıyıram. Onun həyatı və fəaliyyəti çoxşaxəli olmuşdur. İstər ictimai, istər siyasi, istərsə də diplomatik sahədə xidmətləri yalnız xalqının, dövlətinin mənafeyinə yönəlib. İşgüzarlığı, bacarığı, çevik idarəçiliyi, həm də alimliyi ilə Azərbaycanın ziyalı elitasında layiqli qiymətini çoxdan alıb. Yaşar Əliyevin son 20 ildəki fəaliyyəti gözümüz önündə olub. Mən onun vitse-spiker olduğu dövrü və daha sonrakı ictimai fəaliyyətini xatırlayıram. Yaşar Əliyev siyasətdə səviyyəli bir şəxs kimi həmişə diqqətdə olmuşdur. Eyni zamanda bilirəm ki, o, Heydər Əliyev prinsiplərinə hər zaman sədaqətlə xidmət göstərmişdir. Yaşar Əliyev Çin Xalq Respublikası kimi bir dövlətdə Azərbaycan Respublikasının fövqəladə və səlahiyyətli səfiri olmuş, orada Azərbaycanı layiqincə təmsil etmişdir. Onun siyasətdə qazandığı "müsbət insan" imici bu insanın siyasi və diplomatik kimliyinə hər zaman dəstək vermişdir.

Yaşar Əliyevin müsbət insani keyfiyyətləri gənc nəsil diplomatlarımız üçün də örnəkdir. Çünki onun qayğıkeşliyi, insana münasibəti, yüksək mədəniyyəti, proseslərə yanaşma tərzi, milli ideallara bağlı şəxsiyyət olması digərləri üçün daim mayak rolunu oynayır. Xidmətləri dövlət tərəfindən yüksək qiymətləndirilmiş və "Şöhrət" ordeni ilə təltif olunmuşdur. Bu gün Yaşar müəllim diplomat kimi fəaliyyət göstərməsə də, həmişə yanımızdadır. Onunla əlaqə saxlayır, məsləhətlərinə qulaq asırıq. Düşünürəm ki, bu cür dəyər sahiblərini hər zaman qorumalı və onlara qiymət verməliyik.

Yaşar müəllim 1994-2000-ci illərdə Azərbaycan Respublikası Milli Məclisinin Sədr müavini olub. 2000-2002-ci illərdə ikinci çağırış Azərbaycan Respublikasının parlamentinə üzv seçilib, həmin illərdən etibarən Qara Dəniz İqtisadi Əməkdaşlıq Təşkilatı Parlament Assambleyasının iki dəfə vitse-prezidenti kimi fəaliyyət göstərib. Uzun müddət İran-Azərbaycan dövlətlərarası komissiyasının sədri olub. Bu sahədəki fəaliyyəti o qədər uğurlu və səmərəli olub ki, Yaşar Əliyev Qara Dəniz İqtisadi Əməkdaşlıq Təşkilatı Parlament Assambleyasının Fəxri fərmanı, Qara Dəniz İqtisadi Əməkdaşlıq Təşkilatı Parlament Assambleyasının 20 illiyi ilə əlaqədar təsis olunan xüsusi medalla təltif edilib. Milli Məclisin Regional idarəetmə komitəsinin sədri Arif Rəhimzadə Yaşar Əliyev haqqında dedi:

- Yaşar Əliyevi mən hələ Azərbaycanın ən ağır, təbəddülalarla dolu dövründən tanıyıram. O zaman Milli Məclis ən gərgin anlarını yaşayırdı. Yaşar müəllimi sözü bütöv, aydın mövqeyi olan, yoldaşlıqda möhkəm, mədəni bir insan kimi xarakterizə edə bilərəm. O, çoxlarının deyə bilmədiyi sözləri ucadan səsləndirən, görə bilmədiyi işləri reallaşdırmaqda özündə cürət tapan bir insandır. Mənim yadıma gəlir, Xalq Cəbhəsinin dövründə ümummilli lider Heydər Əliyevin Milli Şuraya seçilməsinin qarşısını almaq üçün müxtəlif çirkin oyunlar gedirdi. Onlar bəhanə gətirirdilər ki, Heydər Əliyev Milli Məclisin üzvü deyil. Belə olan anda Milli Məclisin deputatı Yaşar Əliyev öz mandatını ulu öndər Heydər Əliyevə verəcəyini bildirdi. Bu, o zaman qətiyyətli, cəsarətli mövqe idi. Sonrakı illərdə işlədiyi müddət ərzində də hər zaman Vətənini sevən, aydın fikri, saf əqidəsi olan qətiyyətli dövlət adamı kimi seçilib. Yaşar müəllim ictimai-siyasi fəaliyyəti ilə yanaşı, bacarıqlı səhiyyə təşkilatçısı kimi də uğur qazanıb. Onun haqqında ancaq bunu demək olar: Yaşar müəllim yaxşı yoldaşdır, yaxşı dostdur!

Prezident İlham Əliyev 2003-cü ildən etibarən ölkəmizin həm siyasi, həm də iqtisadi cəhətdən qüdrətlənməsinə, güclənməsinə çox böyük töhfələr verib. Azərbaycan artıq dünyada qəbul olunan, tanınan və özünəməxsus inkişaf yolunu müəyyənləşdirən unikal dövlətə çevrilib. Dünyanın heç bir ölkəsində bu tempdə inkişaf nəzərə çarpmayıb. Prezident İlham Əliyevin Azərbaycana rəhbərlik etdiyi dövr yaradıcılıq, quruculuq dövrüdür. Dövlət başçısının həyata keçirdiyi siyasətin əsas hədəfi ölkə vətəndaşlarının rifah halının yaxşılaşdırılması və hər bir vətəndaşın öz ölkəsində rahat yaşamasını, fəaliyyət göstərməsini təmin etməkdir. Bütün sahələrdə qazanılan uğurlar cənab İlham Əliyevin titanik fəaliyyəti, qətiyyəti sayəsində əldə olunub. Azərbaycan cəmiyyəti, ölkənin hər bir vətəndaşı ulu öndər Heydər Əliyevin müəyyənləşdirdiyi bu siyasətin Prezident İlham Əliyev tərəfindən uğurla davam etdirildiyini bilir. Ölkə başçısının apardığı daxili və xarici siyasətə öz töhfəsini verən insanlardan biri də məhz Yaşar Əliyevdir. Bu şəxsiyyət istər səfir olduğu zamanlarda, istərsə də sonrakı dövrlərdə ulu öndər Heydər Əliyevin müəyyənləşdirdiyi siyasətin Prezident tərəfindən uğurla həyata keçirilməsi yönündə ardıcıl işlər aparıb. Məhz elə bu görülən işlərin nəticəsidir ki, Prezident İlham Əliyevin imzaladığı sərəncamla ölkənin ictimai-siyasi həyatında fəal iştirakına görə Yaşar Tofiqi Əliyevə bu günlərdə Azərbaycan Respublikası Prezidentinin fərdi təqaüdü verilib. Bu da onun göstəricisidir ki, dövlət və dövlətçilik naminə görülən heç bir iş əsla unudulmur və yaddan çıxmır.

Bu yazıda biz bir "yaxşı insan"ın - Yaşar Əliyevin obrazını yaratmağa çalışdıq. Yaşar Əliyevin həyatı və fəaliyyəti bir məktəbdir. Onun "yaxşı insan" imici isə gün keçdikcə daha yüksəklərə ucalır.

Oktay HACIMUSALI

Azərbaycan.-2013.- 5 iyul.- S.6.