Moldova ombudsmanının çıxışı dünya birliyinin Ermənistanın işğalçı siyasəti ilə barışa bilmədiyini sübut edir

Moldova ombudsmanının Ermənistan parlamentində çıxışı dünya birliyinin Ermənistanın militarist və işğalçı siyasəti ilə barışa bilmədiyini sübut edir.

AzərTAc xəbər verir ki, bu sözləri Azərbaycanın Xarici İşlər Nazirliyinin mətbuat xidmətinin rəhbəri Elman Abdullayev Moldova ombudsmanının Ermənistan parlamentində çıxış edərək bu ölkənin işğalçı siyasətini pisləməsini və Xocalıda azərbaycanlılara qarşı soyqırımı törətməsini şərh edərkən demişdir.

E.Abdullayev vurğulamışdır ki, bu çıxış xüsusilə insan hüquqları üzrə ixtisaslaşan bir çox beynəlxalq təşkilatlar üçün nümunə ola bilər. İnsan hüquqlarının kütləvi şəkildə pozulması beynəlxalq birliyin diqqətindən kənarda qalmamalıdır, dünya ictimaiyyəti bu kimi hallara sərt reaksiya verməlidir. Söhbət Azərbaycan ərazilərində aparılan etnik təmizləmə siyasətindən və insanların öz yurdlarından zorla qovulmasından gedir. Bu, təkcə cəsarətli deyil, həm də 20 ildən artıqdır hüquqları pozulan milyondan artıq qaçqın və məcburi köçkünün müdafiəsinə yönəlmiş obyektiv addımdır. Ermənistan anlamalıdır ki, Xocalıda insanlığa qarşı törədilmiş cinayəti, etnik təmizləmələri, sərhədlərin zorla dəyişdirilməsi cəhdlərini gizlətmək mümkün deyildir.

Azərbaycan.-2013.- 6 iyul.- S.9.