Ailə, Qadın və Uşaq Problemləri üzrə Dövlət Komitəsinin sədri Şamaxıda vətəndaşları qəbul etmişdir

İyulun 5-də Ailə, Qadın və Uşaq Problemləri üzrə Dövlət Komitəsinin sədri Hicran Hüseynova Şamaxıda vətəndaşları qəbul etmişdir.

AzərTAc xəbər verir ki, Prezident İlham Əliyevin mərkəzi icra hakimiyyəti orqanlarının rəhbərlərinin bölgələrdə vətəndaşların qəbul olunması, onların problem və təkliflərinin öyrənilməsi və operativ həlli ilə əlaqədar verdiyi tapşırıqlar çərçivəsində keçirilən qəbulda Şamaxı, Ağsu, Göyçay və İsmayıllı rayonlarından gəlmiş sakinlər iştirak etmişlər.

Heydər Əliyev Mərkəzində keçirilən qəbulda bu gün qadınları daha çox narahat edən məsələlər barədə onların fikir və təklifləri dinlənilmiş, işgüzar müzakirələr aparılmışdır. Xüsusilə bəzi hallarda qızların təhsildən yayınmaları, erkən nikahın, boşanmaların yaratdığı problemlər, qadın sahibkarlara dəstək məsələləri ilə əlaqədar daha çox müraciətlər olmuşdur. Qəbulda eyni zamanda işlə təminat, alimentlərin ödənilməsindəki çətinliklər və s. barədə də müraciətlər dinlənilmişdir.

Qəbul zamanı bir çox şikayətlər operativ surətdə həllini tapmış, bəzi məsələlər əlaqədar təşkilatlar tərəfindən araşdırılmaq və vətəndaşları vaxtında məlumatlandırmaq üçün nəzarətə götürülmüşdür.

Qəbula gələnlər onların şikayət və təkliflərinin dinlənilməsi üçün yaradılan şəraitdən, görülən operativ tədbirlərdən razı qaldıqlarını bildirmişlər.

Azərbaycan.-2013.- 6 iyul.- S.10.