Moskvada SSRİ-nin və Azərbaycanın xalq artisti Tamara Sinyavskayaya «Dostluq» ordeni təqdim edilmişdir

 

Azərbaycan Prezidenti İlham Əliyevin sərəncamı ilə məşhur müğənni, SSRİ-nin Azərbaycanın xalq artisti Tamara Sinyavskaya "Dostluq" ordeni ilə təltif edilmişdir. Müğənni Azərbaycan dövlətinin bu yüksək mükafatına "Azərbaycan mədəniyyətinin populyarlaşdırılması sahəsində xidmətlərinə görə" layiq görülmüşdür.

Moskvada görkəmli musiqi mədəniyyəti xadimi, müğənni pedaqoq Tamara Sinyavskayaya "Dostluq" ordeninin təqdim olunmasına həsr edilmiş mərasim keçirilmişdir.

Azərbaycan Respublikası Prezidenti Administrasiyasının Humanitar siyasət məsələləri şöbəsinin müdiri Fatma Abdullazadə təntənəli tədbiri açaraq Azərbaycan Respublikasının Prezidenti İlham Əliyevin Azərbaycanın xalq artisti Tamara Sinyavskayaya təbrik məktubunu dövlət başçısının "T.İ.Sinyavskayanın "Dostluq" ordeni ilə təltif edilməsi haqqında" sərəncamını oxumuşdur.

Məktubda deyilir: "Sizin opera səhnəsinə ilk gəlişinizdən başlayaraq sənətşünaslar səsinizin bənzərsiz tembrini, böyük fitri istedadınızı şəxsiyyətinizin heyrətamiz cazibəsini qeyd etmişlər. Nüfuzlu beynəlxalq müsabiqələrdə qazandığınız mükafatlar nadir istedadınızın yüksək peşəkarlığınızın təsdiqidir. Böyük metso-sopranoların ənənələrinin davamçısı kimi Siz məxsusi ifaçılıq tərzinizi formalaşdırmağa, opera teatrı salnaməsində həmişəlik yaşayacaq parlaq səhnə obrazları yaratmağa nail olmusunuz".

Məktubda daha sonra qeyd edilir ki, Tamara Sinyavskayaya xas olan incə musiqi zövqü onun konsert fəaliyyətində klassik repertuarı rus xalq mahnıları müasir estrada ilə harmonik şəkildə əlaqələndirməklə müxtəlif janrlarda uğur qazanmasına imkan vermişdir.

Azərbaycan Prezidentinin məktubunda deyilir: "Bu gün Sizin zəngin təcrübənizin gənc müğənnilərə çatdırılmasına yönəlmiş pedaqoji fəaliyyətiniz, heç şübhəsiz, yeni mədəni elitanın formalaşmasına şərait yaradır.

Siz Azərbaycanın böyük dostu kimi bizim musiqi mədəniyyətimizi həmişə ləyaqətlə təmsil etmiş, Azərbaycan-Rusiya mədəni əlaqələrinin inkişafına və genişlənməsinə töhfə vermisiniz. Əminəm ki, bundan sonra da belə olacaqdır".

Sonra F.Abdullazadə "Dostluq" ordenini SSRİ-nin və Azərbaycanın xalq artisti Tamara Sinyavskayaya təqdim etmişdir.

Tamara Sinyavskaya layiq görüldüyü şərəfə görə Azərbaycan Prezidenti İlham Əliyevə minnətdarlığını bildirmişdir. Müslüm Maqomayevin vəfatından sonra ad gününü qeyd etmədiyini bildirən T. Sinyavskaya demişdir: "Hələlik yalnız emosiyalardır, çünki hər şey bu qədər gözlənilməz oldu. Müslüm sağ olanda mənim ad günlərimi təşkil edirdi. Onun vəfatından təxminən 5 il keçir. Bu müddətdə mən bir dəfə də olsa, ad günümü qeyd etməmişəm. Bu gün isə bütün dostlarım toplaşmışlar və bu, mənə çox xoşdur".

Mərasimdə Rusiya Dövlət Duması sədrinin müavini Lyudmila Şvetsova, məşhur həkim və ictimai xadim, tibb elmləri doktoru, professor Leonid Roşal və başqaları çıxış etmişlər. Onlar Tamara Sinyavskayanın Azərbaycanın "Dostluq" ordeni ilə təltif olunmasını yüksək qiymətləndirmiş, müğənnini bu təltif münasibətilə təbrik edərək əmin olduqlarını bildirmişlər ki, Azərbaycan-Rusiya münasibətləri, o cümlədən mədəniyyət sahəsində əlaqələr bundan sonra da inkişaf edəcəkdir.

SSRİ xalq artisti Yelena Obraztsova AzərTAc-a müsahibəsində demişdir: "Mən çox şadam ki, Azərbaycan Prezidenti Tamara Sinyavskayanın yaradıcılığını bu cür yüksək qiymətləndirmiş və onu təbrik etmişdir. Bizim Tamaranın ad gününü Azərbaycan daha möhtəşəm, hətta Rusiyada olduğundan daha yaxşı qeyd etmişdir".

Yaxın vaxtlarda Bakıya gələcəyini bildirən Y.Obraztsova demişdir: "Mən yenə sizin xalqla birlikdə olacağam və mən xoşbəxtəm. Mən sizinlə fəxr edirəm".

Tədbirdə Rusiyanın tanınmış mədəniyyət xadimləri, Moskvadakı Azərbaycan diasporunun nümayəndələri iştirak etmişdir.

 

 

Fəridə ABDULLAYEVA,

AzərTAc-ın xüsusi müxbiri

 

Moskva

 

Azərbaycan.-2013.- 9 iyul.- S.5.