Sarayevo şəhərinin mərkəzi meydanında «Xocalıdan

Srebrenitsaya» adlı foto və rəsm sərgisi açılmışdır

Bosniya və Herseqovinanın paytaxtı Sarayevo şəhərində "Xocalıya Ədalət" Kampaniyasının təşəbbüsü ilə təşkil edilən "Xocalıdan Srebrenitsaya: Soyqırımı və etnik təmizləmənin qarşısının alınması" adlı beynəlxalq simpoziumun nəticəsi olaraq Sarayevo şəhərinin mərkəzi Marşal Tito meydanında "Xocalıdan Srebrenitsaya" adlı foto və rəsm sərgisi açılmışdır.

Tədbirin təşkilatçısı olan Dialoq və Əməkdaşlıq Uğrunda İslam Konfransı Gənclər Forumu Avrasiya Regional Mərkəzindən AzərTAc-a bildirmişlər ki, Azərbaycan Respublikası Dini Qurumlarla İş üzrə Dövlət Komitəsi və Azərbaycan Respublikası Prezidenti yanında Gənclər fondunun dəstəyi ilə təşkil edilən sərginin açılışında komitənin sədri E.İskəndərov, bu ölkədəki diplomatik korpusun əməkdaşları, Xocalıya Ədalət Kampaniyasının Avropadakı nümayəndələri iştirak etmişlər. Sərgidə rəssam Nazim Məmmədovun Xocalı qətliamını əks etdirən rəsm əsərləri, həmçinin Xocalıda çəkilmiş fotoşəkillər nümayiş etdirilir. Sərgi bir həftə davam edəcəkdir.

Verilən məlumata görə, sərgi ilə yanaşı iyulun 11-də - Srebrenitsa soyqrımını anım günündə Bosniyanın ən iri ticarət mərkəzi "Sarayevo Mall"un fasadında quraşdırılmış monitorda gün boyu Xocalı və Srebrenitsa soyqırımıları zamanı dinc əhalinin itkilərini əks etdirən rəqəmlər nümayiş etdirilmişdir. Sərgi və pano Srebrenitsa soyqırımı qurbanlarının anım mərasimində iştirak üçün Sarayevoya gələn çoxsaylı nümayəndə heyətlərinin, şəhər sakinlərinin və turistlərin marağına səbəb olmuşdur.

Azərbaycan.-2013.- 13 iyul.- S.5.