Türkiyənin Bayburt şəhərində XIX Beynəlxalq Dədə Qorqud mədəniyyət və sənət festivalı başa çatmışdır

Türkiyənin Bayburt şəhərində XIX Beynəlxalq Dədə Qorqud mədəniyyət və sənət festivalı başa çatmışdır.

"Miras" Mədəni İrsin Öyrənilməsinə Kömək İctimai Birliyindən (İB) AzərTAc-a bildirmişlər ki, festival çərçivəsində Azərbaycan Mədəniyyəti Günləri keçirilmiş, Bayburt qonaq evində ziyafət verilmişdir.

Ziyafətdə Azərbaycan nümayəndə heyəti ilə yanaşı, Bayburt valisi Həsən İpək, Bayburt bələdiyyəsinin sədri Hacı Ali Polat, "Bekder" dərnəyinin sədri Mete Emir, şəhər ictimaiyyətinin nümayəndələri, eləcə də Off road və yamac paraşütü yarışlarına qatılmaq üçün Bayburta gəlmiş idmançılar iştirak etmişlər.

"Bekder"in sədri Mete Emir, Bayburt bələdiyyəsinin sədri Hacı Ali Polat, Bayburt valisi Həsən İpək mərasimdə çıxış etmişlər.

"Miras" İB-nin sədri Fariz Xəlilli XXI Beynəlxalq Dədə Qorqud mədəniyyət və sənət festivalının 2015-ci ildə Azərbaycanda keçirilməsi ilə bağlı festivalın təşkilat komitəsinə müraciət etmişdir.

Azərbaycanlı aşpaz Ziya Şahbazovun hazırladığı milli mətbəximizin nümunələri və şirniyyatlar qonaqlara təqdim olunmuşdur.

Tədbirdə Azərbaycanın aşıq və muğam sənəti ifaçılarının, Azərbaycan Dövlət Uşaq Filarmoniyasının rəqs qrupunun çıxışları maraqla qarşılanmışdır.

Festivalın son günündə nümayəndə heyəti Aydıntəpə yeraltı şəhər abidəsini ziyarət etmiş, Aydıntəpə yaylasına çıxmışdır. Yaylada festivalın yekun tədbiri keçirilmişdir.

Azərbaycan.- 2013.- 13 iyul.- S.8.