Xarici İşlər Nazirliyində Azərbaycan və

Türkiyə münasibətləri müzakirə olunmuşdur

Azərbaycanın xarici işlər naziri Elmar Məmmədyarov iyulun 17-də Türkiyənin xarici işlər naziri Əhməd Davudoğlunun başçılıq etdiyi nümayəndə heyəti ilə görüşmüşdür.

AzərTAc xəbər verir ki, görüşdə bütün sahələrdə ikitərəfli münasibətlərin yüksək səviyyəsi vurğulanmışdır.

E.Məmmədyarov bildirmişdir ki, görüşdə birgə iqtisadi, enerji və nəqliyyat layihələri razılaşdırılmışdır. Tərəflər Bakı-Tbilisi-Qars dəmir yolunun imkanlarını da müzakirə etmişlər. Nazirin sözlərinə görə, NATO-nun Əfqanıstandakı qoşunlarının çıxarılması üçün həmin dəmir yolundan istifadə oluna bilər. E.Məmmədyarov demişdir: "Məlumdur ki, 2014-cü ildə qoşunların Əfqanıstandan çıxarılması planlaşdırılır və biz hesab edirik ki, həmin məqsədlər üçün Bakı-Tbilisi-Qars dəmir yolundan istifadə oluna bilər. Biz çalışmalıyıq ki, sözügedən dəmir yolu tezliklə işə salınsın".

E.Məmmədyarovun sözlərinə görə, ikitərəfli münasibətlər, Dağlıq Qarabağ münaqişəsinin nizamlanması məsələləri də danışıqlar mövzusu olmuşdur. Bundan əlavə, nazirlər TANAP və TAP birgə layihələrinin həyata keçirilməsini müzakirə etmişlər. Görüşdə o da vurğulanmışdır ki, iki ölkə beynəlxalq qurumlarda həmişə bir-birini dəstəkləmiş və bundan sonra da dəstəkləyəcəkdir.

Danışıqlar zamanı bütün sahələrdə ikitərəfli münasibətlərin yüksək səviyyəsindən məmnunluq ifadə olunduğunu bildirən Əhməd Davudoğlu demişdir: "Biz qardaşlıq münasibətləri və strateji əhəmiyyətli münasibətlər kimi səciyyələndirdiyimiz Azərbaycan-Türkiyə münasibətlərinin bugünkü vəziyyətinə şadıq. Biz Azərbaycanın müasir inkişafını ölkə hökumətinin uğuru sayırıq". A.Davudoğlunun sözlərinə görə, Türkiyədə Azərbaycanın iqtisadi yüksəlişini və inkişafını müşahidə edirlər.

Ə.Davudoğlu Ermənistan-Azərbaycan, Dağlıq Qarabağ münaqişəsi haqqında jurnalistlərin suallarına cavab verərək demişdir ki, ATƏT-in Minsk qrupunun üzvü olan Türkiyə münaqişənin nizama salınması prosesində bundan sonra da iştirak etməyə hazırdır. O demişdir: "ATƏT-in Minsk qrupu 20 il ərzində bu prosesdə bir nəticəyə nail ola bilməyibsə, tərəflər özlərinə "nə üçün?" sualını verməlidirlər". Onun sözlərinə görə, Bakı və Ankaranın Ermənistan-Azərbaycan münaqişəsinin həlli istiqamətində fəal işləmələri bu gün hamıya məlumdur. Türkiyə naziri demişdir: "Zənnimcə, Türkiyənin həmin problemin nizama salınması prosesində fəal iştirak etməsinə imkan yaradılması onun həlli üçün faydalı ola bilərdi".

Azərbaycan.-2013.- 18 iyul.- S.4.