Azərbaycanda iqtisadi islahatlar sosial siyasətlə tamamlanır

Bu istiqamətdə qazanılan nailiyyətlər Nazirlər Kabinetinin cari ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunmuş iclasında da vurğulanıb

Prezident İlham Əliyevin sədrliyi ilə Nazirlər Kabinetinin 2013-cü ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunmuş iclasında ilin ötən aylarına aid göstəricilərin müsbət olduğu qeyd edilib. Altı ay ərzində ölkə iqtisadiyyatının dinamik inkişaf etdiyi, qarşıya qoyulmuş vəzifələrin müvəffəqiyyətlə icra olunduğu göstərilib.

Yarım il ərzində ümumi daxili məhsul 5 faiz artıb. Qeyri-neft sektorunda artfım 11 faiz təşkil edib. Bu da qarşıya qoyulmuş məqsədə - 10 il ərzində qeyri-neft sektorunu iki dəfə artırmaq hədəfinə çatmağa inam yaradan faktdır.

Ölkə iqtisadiyyatının ayrı-ayrı sahələrində qazanılan nailiyyətlər ürəkaçandır. Maddi imkanlarımız genişlənir, valyuta ehtiyatlarımız artır. Bununla da, həm ölkənin gücü artır, həm insanların güzəranı daha da yaxşılaşır və onların sabaha inamı çoxalır. Bütün bunları dünya birliyi də görür və yüksək qiymətləndirir.

Sevindirici haldır ki, dünyanın aparıcı qurumları Azərbaycanda həyata keçirilən islahatları bəyənir. Ölkəmizin bu sahədəki təcrübəsi bir çoxları tərəfindən öyrənilir. Başqa sözlə, Azərbaycan öz yolu ilə gedir. Yəni, bizdə islahatlar köklü xarakter daşıyır. Başqa sözlə, bir sıra ölkələrdə iqtisadi vəziyyət insanlara ziyan dəymək hesabına sağlamlaşdırılır. Məsələn, iş yerləri ixtisar edilir, maaşlar kəsilir, iş gününün saatları çoxaldılır, pensiya yaşı artırılır.

Azərbaycanda isə əsaslı iqtisadi islahatlar güclü sosial siyasətlə tamamlanır. Nəticədə əhalinin gəlirləri artır. Bu hal hətta dünyada iqtisadi böhranın tüğyan etdiyi dövrdə də özünü göstərməkdədir. Yəni, Azərbaycanda aparılan əsaslı iqtisadi islahatlar ilk növbədə məhz insanların rifahının yüksəldilməsi, yaşayışının daha da yaxşılaşması məqsədini güdür.

Əhalinin sosial vəziyyətinin əsas göstəricilərindən biri əməkhaqqının səviyyəsidir. Bu baxımdan ölkəmizdə maaşların getdikcə artması insanların maddi vəziyyətinin daha da yaxşılaşmasını sübut edir. Son 6 ayda da maaşlar artıb. Bu gün Azərbaycanda orta aylıq əməkhaqqı 520 dollar səviyyəsindədir. Orta aylıq pensiyalar isə 200 dollar təşkil edir.

Sözügedən tədbirdə Prezident İlham Əliyev bu məsələ barədə danışarkən demişdir: "Gələn illərdə bu rəqəmlər artacaqdır. Bu rübdə vətəndaşların pensiyaları da, əməkhaqları da artırılacaqdır. Gələn illərdə də eyni siyasət aparılacaqdır. Bir daha demək istəyirəm ki, iqtisadi islahatlar çox güclü sosial siyasətlə dəstəklənməlidir. Hesab edirəm ki, ölkəmizin bu sahədə əldə etdiyi uğurlar nümunə ola bilər".

Regionların sosial-iqtisadi inkişaf proqramlarının uğurlu həlli də insanların rifah halına müsbət təsir edir. Dövlət başçısı bölgələrə səfərləri zamanı vəziyyətlə yerindəcə tanış olur və müvafiq göstərişlər verir. İndi bütün rayonlarda inkişaf, canlanma və bunun nəticəsində insanların gözəl əhval-ruhiyyəsi var. Quruculuq, abadlıq işləri geniş vüsət alıb. Kəndlər və şəhərlər daha da abadlaşdırılır, onların ərazisində istehsal təyinatlı yeni müəssisələr yaradılır. Yeni sənaye müəssisələri isə məşğulluq probleminin həllində müsbət rol oynayır. Belə ki, əhali üçün çoxsaylı iş yerləri açılır.

Bütün bu tədbirlərin nəticəsidir ki, Azərbaycanda işsizliyin səviyyəsi aşağıdır. Bu ilin əvvəlində işsizlik səviyyəsi 5 faizdən bir az çox idi. İlin sonuna kimi isə bu rəqəmin daha da azalacağı gözlənilir. Baxmayaraq ki, 5 faiz səviyyəsində işsizlik istənilən ölkə üçün heç də pis göstərici deyil. Xatırladaq ki, bəzi inkişaf etmiş ölkələrdə işsizlik 10, 15, hətta 25 faiz səviyyəsinə çatır.

Ölkəmizdə məşğulluq probleminin uğurlu həlli üçün ardıcıl tədbirlər həyata keçirilir. Təsadüfi deyil ki, 10 il bundan əvvəl qarşıya qoyulmuş əsas vəzifələrdən biri məhz işsizliyin aradan qaldırılması idi. Həmin vəzifə müvəffəqiyyətlə yerinə yetirilərək o vaxtdan bəri 1 milyon 180 min yeni iş yeri açılıb. Bu tendensiya indi də ardıcıl surətdə davam etdirilir. Elə ötən yarım ildə ölkədə 55 min yeni iş yeri yaradılıb. Onlardan 45 mini daimi iş yerləridir. Ölkədə aparılan sənayeləşmə siyasəti, iqtisadi siyasətlə bağlı təşəbbüslər yeni iş yerlərinin daha da çoxalmasına imkan yaradacaq.

Azərbaycanda manatın məzənnəsinin sabit olması da əhalinin maddi vəziyyətinə müsbət təsir göstərir. Odur ki, manatın məzənnəsinin sabitliyi ilk növbədə böyük sosial məna daşıyır. Ölkəmizdə insanların əmanətləri dövlət tərəfindən qorunur. O da maraqlı faktdır ki, bu ilin 6 ayında əhalinin pul gəlirləri 7 faizdən çox artdığı halda, inflyasiya cəmi 2 faiz olub.

Eləcə də ölkə Prezidentinin müvafiq fərmanına əsasən keçmiş SSRİ Əmanət Bankının ölkəmizin vətəndaşları olan əmanətlçilərinə 2012-ci il iyunun 1-dən başlayaraq 597 milyon manat məbləğində vəsaitin cari il iyunun 30-dək olduqca qısa müddət ərzində ödənilməsi əhalinin maddi vəziyyətinin yaxşılaşdırılmasına göstərilən qayğının daha bir təzahürüdür.

Qaçqın və məcburi köçkünlərin sosial müdafiəsinin gücləndirilməsi daim diqqət mərkəzindədir. Təkcə bir faktı qeyd etmək kifayətdir ki, onların yaşayış şəraitinin yaxşılaşdırılması üçün cari ilin icmal və dövlət büdcələrindən üst-üstə 283 milyon manat, o cümlədən Prezidentin Ehtiyat Fondundan 14 milyon manat, dövlət büdcəsinin cari və əsaslı xərclərindən 111 milyon manat, Dövlət Neft Fondunun büdcəsindən 158 milyon manat vəsait ayrılıb.

Ötən yarım il ərzində bütün dövlət proqramlarının və layihələrin uğurla icra olunması, investisiya proqramlarında elm, təhsil, səhiyyə, sosial təminat, mədəniyyət və idman obyektlərini özündə birləşdirən sosial layihələrin həyata keçirilməsi də əhalinin sosial rifahına, rahat yaşayışına yönəldilən tədbirlərdir. Elektrik enerjisi və təbii qaz təchizatı, içməli su və kanalizasiya sistemlərinin yaradılması, magistral yolların çəkilişi, kənd yollarının yenidən qurulması və yeni yolların inşası, meliorasiya və irriqasiya tədbirlərinin genişləndirilməsi də bu məqsədə xidmət edir.

Nazirlər Kabinetinin iclasında ölkə Prezidenti ötən müddətdə qazanılmış bütün bu uğurlara istinad edərək gələn illərdə daha böyük nailiyyətlərin əldə olunacağına, qarşıya qoyulan vəzifələrin müvəffəqiyyətlə yerinə yetiriləcəyinə dərin inamını bildirib.

Flora SADIQLI,

Azərbaycan.-2013.- 20 iyul.- S.5.