Milli Mətbuat Gününə həsr olunmuş sərgi açılmışdır

Ağsu Rayon Mərkəzi Kitabxanasının oxu zalında 22 iyul - Milli Mətbuat Gününə həsr edilmiş sərgi açılmışdır.

Sərgidə böyük maarifçi demokrat, təbiətşünas alim, ictimai xadim Həsən bəy Zərdabinin yaratdığı milli mətbuatımızın qaranquşu olan "Əkinçi" qəzeti ilə başlanan Azərbaycan mətbuatının tarixi və inkişaf mərhələləri, jurnalistikanın inkişafında böyük xidmətləri olan görkəmli şəxsiyyətlər barədə onlarla kitab, broşür, qəzet nümunələri, sənədlərin surətləri və s. nümayiş etdirilir.

Sərgini ziyarət edən yeniyetmə və gənclər 1875-ci il iyulun 22-də işıq üzü görən, cəmi 56 nömrəsi buraxılan, çar senzurasının təzyiqləri nəticəsində bağlanmaq məcburiyyətində qalan "Əkinçi" qəzeti və onun ətrafında toplaşan maarifçi, vətənpərvər ziyalılar barədə ətraflı məlumatlar ala bilirlər.

Sərgidə həmçinin ikinci dəfə müstəqillik qazanan Azərbaycanda ümummilli lider Heydər Əliyevin siyasi iradəsi ilə söz və mətbuat azadlığını məhdudlaşdıran senzuranın aradan qaldırılması, qəzetlərin nəşriyyatlara borclarının dondurulması və sonradan bu borcların silinməsi, KİV-in fəaliyyətini tənzimləyən qanunvericilik bazasının yaradılması barədə geniş məlumat verilir. Prezident İlham Əliyevin KİV nümayəndələri üçün yaşayış evinin inşası ilə əlaqədar imzaladığı müvafiq sərəncamın surəti də nümayiş etdirilən sənədlər arasındadır. Sərgi iyulun sonunadək fəaliyyət göstərəcəkdir.

Azərbaycan.-2013.- 21 iyul.- S.5.