Dmitri Yablonski: «Heydər Əliyev Fondunun təşəbbüsü ilə həyata

 keçirilən bu layihə bütün dünyada mədəniyyətin inkişafına böyük töhfədir»

 

"Heydər Əliyev Fondunun təşəbbüsü ilə həyata keçirilən bu layihə bütün dünyada mədəniyyətin inkişafına böyük  töhfədir. Qəbələ festivalı xarici qonaqlara Azərbaycan mədəniyyətini tanıtmaqla yanaşı, çoxsaylı yerli musiqisevərləri dünya bəstəkarlarının klassik əsərləri və məşhur musiqiçilərlə yaxından tanış edir".

Bu sözləri V Qəbələ Beynəlxalq Musiqi Festivalının bədii rəhbərlərindən biri, dünya şöhrətli məşhur violonçel ifaçısı, "Yeni Rusiya" Dövlət Simfonik Orkestrinin dirijoru Dmitri Yablonski AzərTAc-a müsahibəsində demişdir.

D.Yablonski festivalın ərsəyə gəlməsində müstəsna xidmətləri olan Azərbaycanın birinci xanımı, Heydər Əliyev Fondunun prezidenti, UNESCO-nunİSESCO-nun xoşməramlı səfiri Mehriban Əliyevaya musiqiçilərə göstərdiyi diqqət və qayğıya görə dərin minnətdarlığını bildirmişdir.

Dmitri Yablonski V Qəbələ Beynəlxalq Musiqi Festivalının təşkilatçılığını yüksək qiymətləndirmiş, musiqisevərlərin təxminən iki həftə davam edəcək festivalda bir çox dünya şöhrətli musiqi kollektivlərinin maraqlı konsert proqramından həzz almaq imkanı əldə edəcəklərinə əminliyini bildirmişdir.

Bu musiqi bayramı proqramının əvvəlkilərlə müqayisədə çox zəngin olduğunu söyləyən D.Yablonski iştirakçılar və qonaqlar arasında məşhur kollektivlərin, müasir ifaçılıq sənətinin zirvəsində duran dünya şöhrətli ustad sənətkarların olmasını festivalın gündən-günə artan nüfuzunun bariz nümunəsi kimi qiymətləndirmişdir. O demişdir: "Qəbələyə toplaşan dünyanın məşhur mədəniyyət xadimləri təqdim etdikləri konsertlərlə böyük tamaşaçı auditoriyasına əsl musiqi bayramı yaşadırlar. Festival çərçivəsində keçirilən konsertlərin hər birinin özünəməxsus gözəlliyi vardır. Buradakı bir konsert digərlərindən fərqlənir. Hər gün buraya Bakıdan, Qəbələdən və ətraf rayonlardan yüzlərlə tamaşaçının, o cümlədən xarici vətəndaşların gəlməsi insanların bu festivala olan böyük marağından xəbər verir".

 

Azərbaycan.-2013.- 27 iyul.- S.8.