«Heydər Əliyev: Azərbaycan dilçiliyi və Azərbaycan dili» mövzusunda elmi-nəzəri konfrans keçirilmişdir

Azərbaycan Milli Elmlər Akademiyası Nəsimi adına Dilçilik İnstitutunun gənc alimlər şurası ümummilli lider Heydər Əliyevin anadan olmasının 90-cı ildönümünə həsr edilmiş "Heydər Əliyev: Azərbaycan dilçiliyi və Azərbaycan dili" mövzusunda elmi-nəzəri konfrans keçirmişdir.

İnstitutdan AzərTAc-a bildirmişlər ki, konfransda müxtəlif elm və təhsil müəssisələrini təmsil edən gənc alimlər dilçiliyin müxtəlif istiqamətlərini əks etdirən maraqlı məruzələrlə çıxış etmişlər.

Qarşılıqlı fikir mübadiləsi şəraitində keçən tədbirdə "Türkiyə türkcəsinin xarici dil kimi tədrisində leksik adekvatlıq faktoruna istinada dair", "Variantlılığın tipoloji təsnifi haqqında", "Sintaktik sinonimlik dil hadisəsi kimi", "Nəsimi dilinin lüğət tərkibində isimlər", "Tərcümə zamanı leksik vahidlərin yaradılmasında kalka yolu" və digər mövzularda məruzələr dinlənilmiş, müzakirələr aparılmışdır.

Sonra konfransın təşkilatçısı, AMEA Nəsimi adına Dilçilik İnstitutunun gənc alimlər şurasının sədri, filologiya üzrə fəlsəfə doktoru S.Əliyeva tədbirin iştirakçılarına yeni nailiyyətlər arzulamış, gələcəkdə respublika və beynəlxalq elmi-nəzəri konfransların təşkilinin planlaşdırıldığını qeyd etmişdir.

Azərbaycan.-2013.- 2 iyun.- S.5.