Azərbaycan ilə Türkiyə arasında metrologiya sahəsində əməkdaşlığa dair anlaşma memorandumu imzalanmışdır

İstanbulda Azərbaycan Respublikasının Standartlaşdırma, Metrologiya və Patent üzrə Dövlət Komitəsi (SMPDK) ilə Türkiyənin Elmi və Texnoloji Araşdırma Şurasının Milli Metrologiya İnstitutu (UME) arasında anlaşma memorandumu imzalanmışdır.

SMPDK-dan AzərTAc-a bildirilmişdir ki, sənədi komitə yanında Dövlət Metrologiya Xidmətinin rəisi Oktay Abbasov və UME-nin direktoru vəzifəsini icra edən Fatih Üstüner imzalamışlar.

Anlaşma Memorandumuna əsasən, hər iki ölkənin müvafiq qurumları metrologiya sahəsində elmi və texniki əməkdaşlığı davam etdirmək məqsədi ilə bu sahədə normativ-texniki sənədlərin hazırlanması, elmi-texniki bilik mübadiləsi və imkanların genişləndirilməsi, fiziki kəmiyyətlərin milli etalonlarının inkişafı, təkmilləşdirilməsi və s. istiqamətlərdə əməkdaşlıq edəcəklər.

Səfər çərçivəsində SMPDK yanında Dövlət Metrologiya Xidmətinin Bakıda tikilməkdə olan yeni inzibati-laboratoriya binasının tikinti layihəsinin UME tərəfindən metroloji ekspertizasının aparılması ilə bağlı razılıq əldə olunmuşdur. Dövlət Metrologiya Xidmətinin nümayəndələri UME-nin etalon laboratoriyaları ilə də yaxından tanış olmuşlar.

Azərbaycan.-2013.- 4 iyun.- S.7.