Bakıda «Sosial-iqtisadi inkişafda sahibkarlığın rolu: «Türkiyə-Azərbaycan

təcrübəsi» mövzusunda beynəlxalq praktik konfrans keçirilmişdir

İyunun 3-də Bakı Biznes Mərkəzində "Sosial-iqtisadi inkişafda sahibkarlığın rolu: Türkiyə-Azərbaycan təcrübəsi" mövzusunda beynəlxalq praktik konfrans keçirilmişdir.

İqtisadi İnkişaf Nazirliyinin Aparat rəhbəri Samir Vəliyev uğurla həyata keçirilən sosial-iqtisadi siyasət nəticəsində ölkəmizin iqtisadiyyatında davamlı inkişafın təmin olunduğunu, sahibkarlıq fəaliyyətinin genişləndiyini vurğulamışdır. Bildirilmişdir ki, ölkədə sahibkarlığın inkişaf etdirilməsi sahəsində həyata keçirilmiş məqsədyönlü tədbirlər nəticəsində özəl bölmənin ÜDM-dəki çəkisi 80 faizi ötmüşdür.

Aparat rəhbəri ölkəmizdəki genişmiqyaslı inkişaf və quruculuq proseslərinə xarici tərəfdaşlar tərəfindən böyük maraq göstərildiyini qeyd etmiş, özəl bölmənin inkişafı sahəsində bir sıra ölkələrlə, o cümlədən Türkiyə ilə əməkdaşlıq və təcrübə mübadiləsinin həyata keçirildiyini diqqətə çatdırmışdır.

Türkiyənin Azərbaycandakı səfiri İsmayıl Alper Coşqun ölkələrimiz arasında əlaqələrin tarixi köklərə söykəndiyini qeyd etmiş, müxtəlif sahələrdə uğurla inkişaf edən əməkdaşlığımız barədə məlumat vermişdir.

Türkiyənin Özyeğin Universitetinin rektoru Erhan Erkut ölkəmizin sosial-iqtisadi inkişafından məmnunluğunu ifadə etmiş, iki dost ölkə arasında iqtisadi-ticarət əlaqələrinin genişlənməsində sahibkarlığın xüsusi rolunu vurğulamışdır.

Sahibkarlar (İşəgötürənlər) Təşkilatları Milli Konfederasiyasının prezidenti Məmməd Musayev, Azərbaycan Milli Elmlər Akademiyasının İqtisadiyyat İnstitutunun direktoru İsa Alıyev çıxışlarında ölkənin dinamik iqtisadi inkişafında, dövlət proqramlarından irəli gələn vəzifələrin icrasında və sosial məsələlərin həllində sahibkarların yaxından iştirak etdiyini bildirmiş, sahibkarlıq fəaliyyətinin daha da genişləndirilməsi sahəsində tədqiqatların əhəmiyyətini diqqətə çatdırmışlar.

İqtisadi İnkişaf Nazirliyinin İqtisadi İslahatlar Elmi Tədqiqat İnstitutunun direktoru Vilayət Vəliyev "Azərbaycan 2020: gələcəyə baxış" İnkişaf Konsepsiyasının əsas hədəfləri və ölkə regionlarında sahibkarlığın inkişafı barədə danışmışdır.

Konfransda "Azərbaycanda sahibkarlığın inkişaf perspektivləri", "Sahibkarlıq sahəsində Türkiyə təcrübəsi", "Biznes tədrisinin inkişaf istiqamətləri", "Azərbaycanda ixracın və investisiyaların təşviqində sahibkarlığın rolu", "Kiçik və orta sahibkarlığın inkişafı və ATİB" mövzularında məruzələr dinlənilmişdir.

Konfrans çərçivəsində Türkiyə nümayəndə heyəti ilə ikitərəfli görüş keçirilmiş, sahibkarlığın inkişafı sahəsində əməkdaşlığın genişləndirilməsi barədə fikir mübadiləsi aparılmış, bu istiqamətdə beynəlxalq təcrübənin, o cümlədən Türkiyə təcrübəsinin öyrənilməsinin əhəmiyyəti vurğulanmışdır.

AzərTAc

Azərbaycan.-2013.- 4 iyun.- S.7.