«Cəlal Əliyev. Davamlı inkişaf üçün fotosintez tədqiqatları-2013» mövzusunda beynəlxalq konfransın iştirakçıları Dövlət Bayrağı Meydanı ilə tanış olmuşlar

Akademik Cəlal Əliyevin 85 illik yubileyinə həsr olunmuş "Cəlal Əliyev. Davamlı inkişaf üçün fotosintez tədqiqatları-2013" mövzusunda beynəlxalq konfransın iştirakçıları Dövlət Bayrağı Meydanında olmuşlar.

Beynəlxalq konfransın iştirakçılarının diqqətinə çatdırılmışdır ki, 2007-ci il noyabrın 17-də Prezident İlham Əliyev Bakıda Dövlət Bayrağı Meydanının yaradılması barədə sərəncam imzalamışdır. Elə həmin il dekabrın 30-da paytaxtın Bayıl qəsəbəsində Dövlət Bayrağı Meydanının təməli qoyulmuşdur. 2010-cu il sentyabrın 1-də isə Prezident İlham Əliyevin iştirakı ilə meydanının təntənəli açılış mərasimi olmuşdur. İnşa olunan dayağın hündürlüyü 162 metrdir.

Konfrans iştirakçıları Prezident İlham Əliyevin təşəbbüsü ilə meydanda səkkizguşəli ulduz formasında yaradılmış Dövlət Bayrağı Muzeyi ilə də tanış olmuşlar. Muzeydə müxtəlif dövrlərdə Azərbaycan ərazisində mövcud olan dövlətlərin bərpa olunan bayraqları nümayiş etdirilir. Burada həmçinin Azərbaycanın müxtəlif illərdə qəbul olunan konstitusiyaları, dövlət atributları da vardır.

Muzeydə Ginnes dünya rekordları təşkilatının Azərbaycanın dövlət bayrağı dirəyinin dünyada ən hündür bayraq dirəyi olduğunu təsdiq edən sertifikat da nümayiş olunur.

Qonaqlar Dövlət Bayrağı Meydanından zəngin təəssüratla ayrılmışlar.

AzərTAc

Azərbaycan.-2013.- 8 iyun.- S.7.